മലയാള സിനിമയിലെ പല റെക്കോർഡുകളും തകർത്താണ് മോഹൻലാൽ-തരുൺ മൂർത്തി ചിത്രം 'തുടരും' മുന്നേറുന്നത്. കേരളാ ബോക്സ് ഓഫീസിൽ സിനിമ വമ്പൻ കുതിപ്പാണ് നടത്തുന്നതും. നിലവിൽ കേരളാ ബോക്സ് ഓഫീസിൽ നിന്ന് ഏറ്റവും അധികം പണം നേടിയ ചിത്രം ജൂഡ് ആന്തണി ജോസഫ് സംവിധാനം ചെയ്ത 2018 ആണ്. ഈ റെക്കോർഡ് തുടരും അടുത്ത ദിവസങ്ങളിൽ തന്നെ മറികടക്കുമെന്നാണ് ആരാധകർ പ്രതീക്ഷിക്കുന്നത്. ഈ പ്രതീക്ഷ അവർ സമൂഹ മാധ്യമങ്ങളിലൂടെ പങ്കുവെക്കുന്നുമുണ്ട്. അത്തരത്തിൽ ഒരു ഫാൻ പേജിൽ വന്ന പോസ്റ്റും അതിന് ജൂഡിന്റെ മറുപടിയുമാണ് ഇപ്പോൾ ശ്രദ്ധ നേടുന്നത്.
ലാൽ കെയേഴ്സ് ഖത്തർ എന്ന പേജിൽ വന്ന പോസ്റ്റിനാണ് സംവിധായകൻ ജൂഡ് മറുപടി കൊടുത്തത്. കേരളാ ബോക്സ് ഓഫീസിലെ പുതിയ ടോപ് ഗ്രോസർ വരുന്നു എന്നാണ് പോസ്റ്റ്. ഇതിന് താഴെയായി 'ലാലേട്ടനെ വെച്ച് ഞാൻ തന്നെ ഇതും തൂക്കും' എന്നായിരുന്നു ജൂഡ് ആന്തണി ജോസഫിന്റെ മറുപടി. ജൂഡ് നൽകിയ ഈ മറുപടിക്ക് വലിയ കയ്യടി ലഭിക്കുന്നുണ്ട്. ഒരു സംവിധായകൻ ഇത്തരത്തിലാണ് പ്രതികരിക്കേണ്ടത് എന്ന് ചിലർ പറയുമ്പോൾ ജൂഡിന്റെ ഈ സ്വപ്നം സഫലമാകട്ടെ എന്നാണ് മറ്റു ചിലർ കുറിക്കുന്നത്.
