ഒരു മാരുതി ആള്ട്ടോ കാറിന് പിന്നില് പതിച്ചിരിക്കുന്ന രസകരമായ ഇപ്പോള് സോഷ്യല് മീഡിയയില് പൊട്ടിച്ചിരി പടര്ത്തനുന്നത്. സ്റ്റിക്കറിലെ വാചകങ്ങള് ഇങ്ങനെയായിരുന്നു. 'അകലം പാലിക്കുക ഇഎംഐ അടച്ചു തീര്ക്കാനുണ്ട്.' മംഗളൂരുവിലെ സര്ക്യൂട്ട് ഹൗസ് റോഡിലൂടെ ഓടുന്ന കാറിലായിരുന്നു സ്റ്റിക്കര് പതിപ്പിച്ചിരുന്നത്. പരിചിതമായ ഒരു റോഡ് സുരക്ഷാ സന്ദേശത്തെ വാഹന വായ്പയുമായി ബന്ധിപ്പിച്ചുകൊണ്ടുള്ള ഈ തമാശ വളരെ പെട്ടെന്നാണ് ജനശ്രദ്ധ നേടിയത്.
ഇന്സ്റ്റാഗ്രാമില് പങ്കുവെച്ച ഈ വീഡിയോ ഇതിനോടകം ദശലക്ഷക്കണക്കിന് ആളുകള് കാണുകയും ലൈക്കുകള് നേടുകയും ചെയ്തു. ചിരിയും സഹതാപവും നിറഞ്ഞ പ്രതികരണങ്ങളാണ് വീഡിയോയ്ക്ക് ലഭിച്ചുകൊണ്ടിരിക്കുന്നത്. ഈ ടാഗ്ലൈന് ഒരു തമാശ നിറഞ്ഞ വാചകമായി കണക്കാക്കാം എങ്കിലും മിക്കവര്ക്കും അത് പെട്ടെന്ന് സ്വന്തം ജീവിതമായി ബന്ധിപ്പിക്കാനായി. അതിന് കാരണം മറ്റൊന്നുമായിരുന്നില്ല, സ്വന്തം വണ്ടിയുമായി റോഡിലേക്ക് ഇറങ്ങുമ്പോള് വണ്ടി ഒന്ന് തട്ടുകയോ മുട്ടുകയോ ചെയ്താല് പിന്നീട് വരുന്ന ബാധ്യതകളെക്കുറിച്ച് ചിന്തിക്കുന്നവരാണ് നമ്മളില് പലരും.
അതേസമയം തങ്ങള് നേരിടുന്ന സാമ്പത്തിക സമ്മര്ദ്ദങ്ങളെക്കുറിച്ച് ദൃശ്യങ്ങള് കണ്ട പലരും തമാശ നിറഞ്ഞ കുറിപ്പുകള് എഴുതി. ഇതുവരെ കണ്ടിട്ടുള്ളതില് വച്ച് ഏറ്റവും ബുദ്ധിപരമായ വാചകം എന്ന് ഇതിനെ വിശേഷിപ്പിച്ചവരുമുണ്ട്. ആ കാറിന്റെ അടുത്തു കൂടെ പോകുമ്പോള് എല്ലാവരും ഒന്ന് ശ്രദ്ധിച്ച് ഓടിക്കും എന്നായിരുന്നു ചില കമന്റുകള്. കാറുകളിലെ ഇത്തരത്തിലുള്ള രസകരമായ സ്റ്റിക്കറുകള് ഇതാദ്യമായല്ല സമൂഹ മാധ്യമങ്ങളില് തരംഗമാകുന്നത്. ദൈനംദിന ജീവിതത്തിലെ കാര്യങ്ങളെ നര്മ്മത്തില് ചാലിച്ചവതരിപ്പിക്കുന്ന ലളിതവും രസകരവുമായ ഇത്തരം വാചകങ്ങള് ജനങ്ങളിലേക്ക് എത്താന് വളരെ എളുപ്പമാണ്.
