ന്യൂഡല്ഹി: ഇന്ത്യയുടെ ഒളിമ്പിക്സ് ബോക്സറും ലോകതാരവുമായ ബോക്സര് മേരികോമും മുന് ഭര്ത്താവും തമ്മിലുള്ള വഴക്ക് പരസ്യമായ ആരോപണങ്ങളിലേക്ക്. കുറച്ചു കാലമായി വേര്പിരിഞ്ഞിരിക്കുന്ന ഇരുവരും പരസ്പരം ആരോപണങ്ങള് ഉന്നയിച്ച് രംഗത്ത് വന്നിരിക്കുകയാണ്. മേരികോമിന്റെ പരപുരുഷ ബന്ധത്തിലാണ് വിവാഹബന്ധം വേര്പെടുത്തിയതെന്നും സ്വന്തം കരിയര് കൂടി ഉപേക്ഷിച്ചാണ് കുടുംബം നോക്കിയതെന്നും കഴിഞ്ഞ ദിവസം മൂന് ഭര്ത്താവ് ഓണ്ലര് നടത്തിയ പ്രസ്താവനയ്ക്ക് മറുപടിയുമായി ഇന്ന് മേരികോമും രംഗത്ത് വന്നു.
കുടുംബത്തിന് വേണ്ടി ഓണ്ലര് ഒരു ത്യാഗവും ചെയ്തിട്ടില്ലെന്ന് മേരിയുടെ പക്ഷം. ബോക്സിംഗില് അഞ്ച് തവണ ലോക ചാമ്പ്യനായ മേരി, കുടുംബത്തിന്റെ ഏക ആശ്രയവും വരുമാനവും താനായിരുന്നെന്നും ഓണ്ലര് ആകെ ചെയ്തത് 'വീട്ടില് ഉറങ്ങുക' മാത്രമാണെന്നും അവകാശപ്പെട്ടു.
''എന്തൊരു വിജയകരമായ കരിയര്? തെരുവുകളില് ഫുട്ബോള് കളിച്ചിരുന്നു. സത്യം പറഞ്ഞാല്, അയാള്ക്ക് ഒരു രൂപ പോലും സമ്പാദിക്കാന് കഴിഞ്ഞില്ല. അയാള് ദിവസം മുഴുവന് ഉറങ്ങുമായിരുന്നു. കുടുംബത്തെ പോറ്റാന് റിങ്ങില് ഞാന് കഠിനാധ്വാനം ചെയ്തപ്പോള് ഓണ്ലര് തന്റെ ബാങ്ക് അക്കൗണ്ട് ഊറ്റിയെടുത്തു. വീട്ടിലെ സ്ത്രീയുടെ വരുമാനത്തിലാണ് അവന് ജീവിച്ചിരുന്നത്. എനിക്ക് വളരെ സങ്കടം തോന്നി. ഞാന് വളരെയധികം സമ്പാദിച്ചിരുന്നു. എന്റെ എല്ലാ വിശ്വാസങ്ങളും അയാളായിരുന്നു. എന്നാല് ഒടുവില് എന്റെ അക്കൗണ്ട് ഏതാണ്ട് കാലിയാണെന്ന് ഞാന് കണ്ടെത്തി.'' അവര് പറഞ്ഞു.
ഓണ്ലര് മേരിയുടെ അവകാശവാദങ്ങളെ നിഷേധിച്ചുകൊണ്ട് രംഗത്ത് വന്നു.'' ഒരു തിരഞ്ഞെടുപ്പില് മത്സരിക്കാന് താന് ഗണ്യമായ ഒരു തുക ചെലവഴിച്ചെന്നും രാഷ്ട്രീയ രംഗത്തേക്ക് പ്രവേശിക്കാനുള്ള തീരുമാനം മേരികോം നിര്ബ്ബന്ധിപ്പിച്ച് എടുത്തതായിരുന്നു. 2016-ല്, രാജ്യസഭയില് തെരഞ്ഞെടുക്കപ്പെട്ട്് പാര്ലമെന്റ് അംഗമായി മേരികോം നാമനിര്ദ്ദേശം ചെയ്യപ്പെട്ടു. അവരുടെ കാലാവധി അവസാനിക്കുമ്പോള്, അവര് എന്നെ മത്സരിക്കാന് പ്രേരിപ്പിച്ചു.' അദ്ദേഹം പറഞ്ഞു.
വിവാഹിതരാകുമ്പോള് ഓണ്ലറിന്റെ കയ്യില് നയാപൈസ ഇല്ലായിരുന്നെന്നാണ് മേരി പറയുന്നത്. എന്നാല് ഈ സമയത്ത് താന് ഷില്ലോങ്ങിലെ എക്സൈസ് ആന്ഡ് കസ്റ്റംസ് വകുപ്പിലെ കരാര് പ്രകാരമുള്ള ഫുട്ബോള് കളിക്കാരനായിരുന്നു എന്നും യുപിഎസ്സി പരീക്ഷകള്ക്ക് തയ്യാറെടുക്കുകയാണെന്നും ഓണ്ലര് പറഞ്ഞു. മേരിയുടെ ഒരു എലൈറ്റ് ബോക്സര് ആകാനുള്ള സ്വപ്നം സാക്ഷാത്കരിക്കാന് താന് തന്റെ കരിയര് ത്യജിച്ചുവെന്ന് അദ്ദേഹം വാദിക്കുന്നു.
'ഞങ്ങള് കണ്ടുമുട്ടിയപ്പോള് ഞാന് യുപിഎസ്സിക്ക് തയ്യാറെടുക്കുകയായിരുന്നു. ഞാനും ഒരു കോണ്ട്രാക്റ്റ് ഫുട്ബോള് കളിക്കാരനായിരുന്നു... എന്റെ കരിയര് ഉപേക്ഷിച്ച് അവളെ പിന്തുണയ്ക്കാന് അവള് എന്നോട് അഭ്യര്ത്ഥിച്ചു. കുട്ടികളെ വളര്ത്താന് അവള് എന്നോട് ആവശ്യപ്പെട്ടു. അവള്ക്ക് ബോക്സിംഗില് അഭിനിവേശമുണ്ടായിരുന്നു, ഞാന് അവളെ സ്നേഹിച്ചു. അവളുടെ അഭിനിവേശം ഞങ്ങളുടെ അഭിനിവേശമാണെന്ന് ഞാന് കരുതി. അവള് ആഴ്ചകളോളം മാസങ്ങളോളം അകലെയായിരുന്നു. ഞാന് കുട്ടികളെ വളര്ത്തി. ഞാന് അവരെ കുളിപ്പിച്ചു, ഭക്ഷണം നല്കി, കോച്ചിംഗിന് കൊണ്ടുപോയി, വീട് നടത്തിക്കൊണ്ടുപോയി!' പറഞ്ഞു.
പരമ്പരാഗത ദമ്പതികളുമായി താരതമ്യപ്പെടുത്തുമ്പോള് അവരുടെ വിവാഹത്തിലെ റോളുകള് വിപരീതമാണെന്ന് ഓണ്ലര് സമ്മതിച്ചു, പക്ഷേ അത് അവളുടെ പണത്തോടുള്ള ആഗ്രഹത്തേക്കാള് സ്നേഹം കൊണ്ടാണെന്ന് വാദിച്ചു.
