തിരുവനന്തപുരം: പാലക്കാടും തൃശൂരും ഇളക്കിമറിച്ച ശേഷം മടങ്ങിയ പ്രധാനമന്ത്രിക്ക് പിന്നാലെ പ്രതിപക്ഷനേതാവും പ്രചരണത്തിന് കേരളത്തില് എത്തുന്നു. യുഡിഎഫിന്റെ പ്രചരണത്തിനായി രാഹുല്ഗാന്ധി ഇന്ന് കേരത്തില് എത്തും. കോട്ടയം, പത്തനംതിട്ട ജില്ലകളിലെ യുഡിഎഫ് സ്ഥാനാര്ത്ഥികള്ക്കായി രാഹുല്ഗാന്ധി വിവിധ പ്രചരണയോഗങ്ങളില് പങ്കെടുക്കും.
ആറന്മുള, കോന്നി, റാന്നി, തിരുവല്ല മണ്ഡലങ്ങളിലെ സംയുക്ത സമ്മേളനം രാഹുല്ഗാന്ധി ഉദ്ഘാടനം ചെയ്യും. ഉച്ച കഴിഞ്ഞ് രണ്ടുമണിക്ക് പുതുപ്പള്ളി മണ്ഡലത്തിലെ പാമ്പാടിയില് ചാണ്ടി ഉമ്മന്റെ തിരഞ്ഞെടുപ്പ് പ്രചാരണത്തിനാണ് ആദ്യം എത്തുന്നത്. തുടര്ന്ന് കോട്ടയം മണ്ഡലത്തിലും ഏറ്റുമാനൂര് മണ്ഡലത്തിലും എത്തും. ലോക്സഭാ പ്രതിപക്ഷ നേതാവ് രാഹുല് ഗാന്ധിയുടെ സംസ്ഥാനത്തെ തെരഞ്ഞെടുപ്പ് പ്രചരണ പര്യടനത്തിന് നാളെ കണ്ണൂരില് തുടക്കം കുറിക്കുമെന്നു ഡി.സി.സി. പ്രസിഡന്റ് മാര്ട്ടിന് ജോര്ജ് അറിയിച്ചു.
രാവിലെ കണ്ണൂര് വിമാനത്താവളത്തില് ഇറങ്ങുന്ന രാഹുല് ഹെലികോപ്ടറില് കലക്ടറേറ്റ് മൈതാനിയിലെത്തും. 10ന് പോലീസ് മൈതാനത്ത് നടക്കുന്ന യോഗത്തില് രാഹുല് പ്രസംഗിക്കും. കണ്ണൂര് ജില്ലയിലെ 11 നിയമസഭാ മണ്ഡലങ്ങളിലെയും യു.ഡി.എഫ്. സ്ഥാനാര്ഥികളും യോഗത്തില് പങ്കെടുക്കും. കണ്ണൂരിലെ പൊതുയോഗശേഷം രാഹുല് കോഴിക്കോട്ടേക്കു തിരിക്കും.
രാഹുല് ഗാന്ധി എത്തുന്നതിന് തുടര്ന്ന് കോട്ടയം നഗരത്തില് അടക്കം ഉച്ചയ്ക്ക് ശേഷം ഗതാഗത നിയന്ത്രണവും ഏര്പ്പെടുത്തിയിട്ടുണ്ട്. ഇന്നലെ പ്രധാനമന്ത്രി കേരളത്തില് എത്തി ഇരു മുന്നണികള്ക്കും എതിരെ ആഞ്ഞടിച്ചതിന് പിന്നാലെയാണ് രാഹുല് ഗാന്ധിയും വരുന്നത്.
മുഖ്യമന്ത്രി പിണറായി വിജയന്റെ തിരഞ്ഞെടുപ്പ് പ്രചാരണം ഇന്ന് ചവറ, കൊല്ലം, കൊട്ടാരക്കര, ചടയമംഗലം എന്നീ നാലു മണ്ഡലങ്ങളിലാണ്. നടക്കുന്ന തിരഞ്ഞെടുപ്പ് കണ്വെന്ഷനുകള് ഉദ്ഘാടനം ചെയ്ത് സംസാരിക്കും. രാവിലെ 10 മണിക്ക് ഹോട്ടല് ബീച്ച് ഓര്ക്കിഡില് മുഖ്യമന്ത്രി മാധ്യമങ്ങളെ കാണും. ഇതിനിടെ വീട്ടിലെത്തി വോട്ട് രേഖപ്പെടുത്തിക്കുന്ന 'ഹോം വോട്ടിങ്' സംസ്ഥാനത്തെ എല്ലാ നിയോജക മണ്ഡലങ്ങളിലും ഇന്ന് ആരംഭിക്കും. ഇതിനുള്ള മുന്നൊരുക്കം പൂര്ത്തിയായതായി മുഖ്യതിരഞ്ഞെടുപ്പ് ഓഫിസര് ഡോ. രത്തന് യു. ഖേല്ക്കര് അറിയിച്ചു.
