ആളുകളെ സംബന്ധിച്ച് ഏറ്റവും ബുദ്ധിമുട്ടുള്ള കാര്യമാണ് തുണിയലക്ക്. എന്നാല്‍ സാങ്കേതിക വിദ്യകളുടെയും നൂതന ആശയങ്ങളുടെയും ഇക്കാലത്ത് ഇതിനെല്ലാം പരിഹാരം കണ്ടെത്താന്‍ മനുഷ്യന് കഴിഞ്ഞു. വസ്ത്രങ്ങള്‍ അലക്കാന്‍ വാഷിംഗ് മെഷീന്‍ വന്നതോടെ സ്ത്രീകളുടെ ജോലിഭാരം പകുതിയോളം കുറഞ്ഞെങ്കിലും, ഉണങ്ങിയ വസ്ത്രങ്ങള്‍ മടക്കിവെക്കുക എന്നത് ഇപ്പോഴും പലര്‍ക്കും മടുപ്പുള്ള കാര്യമാണ്. എന്നാല്‍ ഇതിനൊരു ലളിതമായ പരിഹാരവുമായി രംഗത്തെത്തിയിരിക്കുയാണ് ഇവിടെ ഒരു വിദ്യാര്‍ത്ഥി. തുണി മടക്കിവക്കാനുള്ള യന്ത്രമാണ് വിദ്യാര്‍ത്ഥി വികസിപ്പിച്ചെടുത്തത്.
ഫ്‌ലാറ്റ് ബോര്‍ഡുകള്‍, ഹിഞ്ചുകള്‍, ലിവറുകള്‍ തുടങ്ങിയ ലളിതമായ വസ്തുക്കള്‍ ഉപയോഗിച്ചാണ് ഈ ഉപകരണം നിര്‍മ്മിച്ചിരിക്കുന്നത്. ഇടത്, വലത്, താഴെ എന്നിങ്ങനെ മൂന്ന് പാനലുകള്‍ കൃത്യമായ ക്രമത്തില്‍ ചലിപ്പിക്കുന്നതിലൂടെ സെക്കന്‍ഡുകള്‍ക്കുള്ളില്‍ ഏത് വസ്ത്രവും ചതുരാകൃതിയില്‍ മടക്കി വെക്കാന്‍ ഇതിലൂടെ സാധിക്കും. സ്‌കൂള്‍ യൂണിഫോം ധരിച്ച വിദ്യാര്‍ത്ഥി ഷര്‍ട്ടും മുണ്ടും വളരെ വേഗത്തില്‍ മടക്കി കാണിക്കുന്ന വീഡിയോ ഇതിനോടകം ദശലക്ഷക്കണക്കിന് ആളുകളാണ് കണ്ടത്. സ്ലീവുകളും വശങ്ങളും കൃത്യമായി ഒതുക്കി മടക്കുന്ന ഈ രീതി ഏറെ കൗതുകകരമാണ്.
വീഡിയോ വൈറലായതോടെ സമൂഹമാധ്യമങ്ങളില്‍ ഈ കൊച്ചു മിടുക്കന് വലിയ പ്രശംസയാണ് ലഭിച്ചുകൊണ്ടിരിക്കുന്നത്. വന്‍കിട കമ്പനികളില്‍ നിന്നോ അത്യാധുനിക ലാബുകളില്‍ നിന്നോ മാത്രമല്ല, സാധാരണ ക്ലാസ് മുറികളില്‍ നിന്നും സമൂഹത്തിന് ഉപകാരപ്രദമായ വലിയ മാറ്റങ്ങള്‍ ഉണ്ടാകാം എന്നതിന്റെ തെളിവാണ് ഈ കണ്ടുപിടിത്തമെന്ന് പലരും അഭിപ്രായപ്പെട്ടു. സമയം ലാഭിക്കാന്‍ സഹായിക്കുന്ന ഇത്തരം ലളിതമായ സാങ്കേതിക വിദ്യകള്‍ സാധാരണക്കാര്‍ക്ക് ഏറെ പ്രയോജനപ്പെടുമെന്ന് നെറ്റിസണ്‍സ് ചൂണ്ടിക്കാട്ടുന്നു.
Comments