പ്രായം 99, പക്ഷേ സാഹസികതയ്ക്ക് ഒട്ടും കുറവില്ല! വിമാനത്തിന്റെ ചിറകിൽ സുരക്ഷാ ബെൽറ്റിൽ ബന്ധിക്കപ്പെട്ട് ആകാശത്തിലൂടെ പറന്ന് ലോക റെക്കോർഡ് സ്വന്തമാക്കിയിരിക്കുകയാണ് ഹെൽഗ ഡഫി എന്ന മുത്തശ്ശി. ജർമനിയിൽ ജനിച്ച് ഇംഗ്ലണ്ടിൽ താമസിക്കുന്ന ഹെൽഗ, ലോകത്തിലെ ഏറ്റവും പ്രായം കൂടിയ വനിതാ വിങ് വാക്കർ എന്ന റെക്കോർഡാണ് സ്വന്തമാക്കിയത്. ടെലിവിഷനിൽ 97കാരിയായ ബെറ്റി ബ്രോമേജ് സമാനമായ സാഹസം നടത്തുന്നത് കണ്ടതോടെയാണ് തനിക്കും ഇത് പരീക്ഷിക്കണമെന്ന ആഗ്രഹം ഹെൽഗയ്ക്കുണ്ടായത്.
ഇംഗ്ലണ്ടിലെ ഗ്ലോസ്റ്റർഷെയറിലുള്ള സർക്കൻസ്റ്ററിലെ ആർഎഫ്സി റെൻഡ്കോംബ് എയർഫീൽഡിലായിരുന്നു ഹെൽഗയുടെ സാഹസിക പ്രകടനം. ചെറിയ വിമാനത്തിന്റെ മുകളിലെ ചിറകിൽ പ്രത്യേക സുരക്ഷാ സംവിധാനങ്ങളോടെ ബന്ധിക്കപ്പെട്ടാണ് അവർ ആകാശത്തേക്ക് പറന്നത്. 99-ാം വയസ്സിൽ ഇത്തരമൊരു സാഹസത്തിന് മുതിർന്ന ഹെൽഗയുടെ പ്രകടനം ഗിന്നസ് വേൾഡ് റെക്കോർഡ്സ് അധികൃതർ അംഗീകരിച്ചു. 2026 ഒക്ടോബർ 16ന് 99 വയസ്സും 21 ദിവസവും പ്രായമുള്ളപ്പോഴാണ് ഹെൽഗ ഈ നേട്ടം കൈവരിച്ചത്.
തനിക്ക് പേടിയേക്കാൾ ആവേശമായിരുന്നു അനുഭവപ്പെട്ടതെന്ന് ഹെൽഗ പറഞ്ഞു. ഏഴ് മക്കളുള്ള കുടുംബത്തിലെ മൂത്ത കുട്ടിയായിരുന്ന ഹെൽഗ, ഈ നേട്ടത്തിൽ തന്റെ പിതാവ് അഭിമാനിക്കുമെന്നാണ് വിശ്വസിക്കുന്നത്. ഹെൽഗയുടെ മരുമക്കളായ ജാക്കി റോസും ജൂലി പ്രീസും ഈ സാഹസിക പറക്കൽ നേരിൽ കണ്ടിരുന്നു. പ്രായം 99 ആയെങ്കിലും വർഷങ്ങൾക്ക് മുമ്പുണ്ടായിരുന്ന അതേ സ്വതന്ത്രമായ വ്യക്തിത്വം ഇപ്പോഴും തനിക്കുണ്ടെന്ന് തെളിയിക്കാനാണ് ഹെൽഗ ആഗ്രഹിച്ചതെന്ന് ജാക്കി പറഞ്ഞു.
റെക്കോർഡ് നേട്ടത്തിനൊപ്പം ജീവകാരുണ്യ പ്രവർത്തനത്തിനും ഹെൽഗ തന്റെ സാഹസികത ഉപയോഗിച്ചു. വിൽറ്റ്ഷയർ ആൻഡ് ബാത്ത് എയർ ആംബുലൻസ് എന്ന അടിയന്തര വ്യോമസേവനത്തിനായി 1,300 പൗണ്ടിലധികം സമാഹരിക്കാനും ഈ പ്രകടനത്തിലൂടെ സാധിച്ചു. ഹെൽഗയുടെ നേട്ടത്തെ അഭിനന്ദിച്ച മുൻ റെക്കോർഡ് ജേതാവ് ബെറ്റി ബ്രോമേജ്, 100 വയസ്സാകുമ്പോൾ വീണ്ടും ഈ സാഹസം നടത്തി റെക്കോർഡ് തിരിച്ചുപിടിക്കുമെന്ന് തമാശയായി പറഞ്ഞു. പ്രായം വെറും അക്കമാണെന്ന് തെളിയിച്ച ഹെൽഗയുടെ നേട്ടം ഇപ്പോൾ സമൂഹമാധ്യമങ്ങളിലും ശ്രദ്ധ നേടുകയാണ്.
Comments