കൊച്ചി: കേരള മുഖ്യമന്ത്രി പിണറായി വിജയനെ തെലങ്കാനയിലെ വികസന മാതൃകകള് നേരില് കാണാന് ക്ഷണിച്ച് തെലങ്കാന മുഖ്യമന്ത്രി രേവന്ത് റെഡ്ഡി. കേരളത്തിലെ ഭരണസ്തംഭനത്തെയും വികസന മുരടിപ്പിനെയും പരോക്ഷമായി വിമര്ശിച്ചുകൊണ്ടായിരുന്നു അദ്ദേഹത്തിന്റെ ഈ ക്ഷണം. വരാനുള്ള വിമാനടിക്കറ്റ് അയച്ചുതരാമെന്നും പറഞ്ഞു.
കൊച്ചിയില് യുഡിഎഫിന്റെ തിരഞ്ഞെടുപ്പ് പ്രകടനപത്രിക പ്രകാശനം ചെയ്യുന്ന ചടങ്ങിലായിരുന്നു രേവന്ത് റെഡ്ഡിയുടെ പരിഹാസം. 'പിണറായി വിജയന്, എന്റെ നാട്ടിലേക്ക് വരൂ. താങ്കള്ക്ക് വരാനുള്ള വിമാനടിക്കറ്റ് ഞാന് അയച്ചുതരാം. അവിടെ നടന്ന വികസനങ്ങള് നേരില് കണ്ട് ബോധ്യ പ്പെടാം,' രേവന്ത് റെഡ്ഡി പറഞ്ഞു. കോണ്ഗ്രസ് പ്രകടനപത്രികയില് നല്കിയ എല്ലാ വാഗ്ദാനങ്ങളും തെലങ്കാനയില് നടപ്പിലാക്കി കഴിഞ്ഞുവെന്നും അവകാശപ്പെട്ടു. ദൈവത്തിന്റെ സ്വന്തം നാടായ കേരളത്തില് ദൈവത്തിന്റെ സ്വത്തിനുപോലും സുരക്ഷയില്ലാത്ത അവസ്ഥയാണെന്ന് അദ്ദേഹം കുറ്റപ്പെടുത്തി. പിണറായി വിജയനും നരേന്ദ്ര മോദിയും സഹോദരങ്ങളെപ്പോലെയാണ് പ്രവര്ത്തിക്കുന്നത്.
അതുകൊണ്ടാണ് മോദിയുടെ ജനവിരുദ്ധ നയങ്ങളെ എതിര്ക്കാന് പിണറായി ഭയപ്പെടുന്നതെന്നും പരിഹസിച്ചു. നരേന്ദ്ര മോദിയെപ്പോലെ മൃദുവായ രീതിയില് സംസാരിക്കാന് തനിക്ക് കഴിയില്ലെന്നും, മുഖ്യമന്ത്രിയുടെ തെറ്റുകളെ വിമര്ശിക്കാതിരിക്കാന് താന് മോദിയല്ലെന്നും പറഞ്ഞു. കേരളത്തിലെ രാഷ്ട്രീയ സാഹചര്യം മാറിക്കഴിഞ്ഞെന്നും ഇത്തവണ യുഡിഎഫിന് അനുകൂലമായ തരംഗമാണ് സംസ്ഥാനത്തുള്ളതെന്നും രേവന്ത് റെഡ്ഡി കൂട്ടിച്ചേര്ത്തു. വരാനിരിക്കുന്ന നിയമസഭാ തിരഞ്ഞെടുപ്പില് (2026) ഈ മാറ്റം പ്രതിഫലിക്കുമെന്ന ആത്മവിശ്വാസവും അദ്ദേഹം പ്രകടിപ്പിച്ചു.
