കൊല്ക്കത്ത: പശ്ചിമബംഗാളിലെ മാല്ഡ സംഘര്ഷത്തിലെ മുഖ്യസൂത്രധാരന് മൊഫക്കറുള് ഇസ് ലാം പിടിയില്. അഖിലേന്ത്യ മജ്ലിസെ ഇത്തിഹാദുല് മുസ്ലിമീന് (എഐഎംഐഎം) നേതാവായ ഇയാളെ രാജ്യം വിടാനുള്ള ശ്രമത്തിനിടെ സിലിഗുഡിയില് നിന്നാണ് പോലീസ് അറസ്റ്റ് ചെയ്തത്. സംഭവവുമായി ബന്ധപ്പെട്ട് 35 പേരെ ഇതുവരെ അറസ്റ്റ് ചെയ്തതായും പോലീസ് അറിയിച്ചു. മാല്ഡ ജില്ലയില് എസ്ഐആര് പട്ടികയില് പേരുവെട്ടിയെന്ന ആരോപണത്തില് പ്രതിഷേധിച്ച് ജുഡീഷ്യല് ഉദ്യോഗസ്ഥരെ ഒന്പതുമണിക്കൂറിലേറെ തടഞ്ഞുവച്ചിരുന്നു.
അഭിഭാഷകനായ ഇസ്ലാം, 2021-ലെ പശ്ചിമ ബംഗാള് നിയമസഭാ തെരഞ്ഞെടുപ്പില് ഇതഹാര് മണ്ഡലത്തില് നിന്നുള്ള എഐഎംഐഎം സ്ഥാനാര്ത്ഥിയായിരുന്നു. മാള്ഡ സംഭവത്തിന്റെ മുഖ്യസൂത്രധാരനെന്ന് വിശേഷിപ്പിക്കപ്പെടുന്ന ഇദ്ദേഹത്തെ സിലിഗുഡിയിലെ ബാഗ്ഡോഗ്ര വിമാനത്താവളത്തില് വെച്ചാണ് പൊലീസ് പിടികൂടിയത്. വോട്ടര്പട്ടിക പുതുക്കുന്ന ചുമതലയിലായിരുന്ന മൂന്ന് വനിതകള് ഉള്പ്പെടെയുള്ള ഏഴ് ജുഡീഷ്യല് ഓഫീസര്മാരെയാണ് മാള്ഡയിലെ കാലിയാചക് 2 ബ്ലോക്ക് ഡെവലപ്മെന്റ് ഓഫീസില് വെച്ച് ജനക്കൂട്ടം തടഞ്ഞുവെച്ചത്.
സംഭവം ഉദ്യോഗസ്ഥരെ ഭയപ്പെടുത്താനും തെരഞ്ഞെടുപ്പ് പ്രക്രിയയെ അട്ടിമറിക്കാനുമുള്ള ആസൂത്രിത നീക്കമാണെന്ന് സുപ്രീം കോടതി നിരീക്ഷിച്ചു. സ്വമേധയാ കേസെടുത്ത കോടതി കേന്ദ്രസേനയെ വിന്യസിക്കാന് ഉത്തരവിടുകയും ഏപ്രില് 6ന് വെര്ച്വല് ഹിയറിങ്ങിന് ഹാജരാവാന് ബംഗാള് ഡിജിപിക്ക് നിര്ദേശം നല്കുകയും ചെയ്തിട്ടുണ്ട്. ജുഡീഷ്യല് ഓഫീസര്മാരെ തടഞ്ഞ സംഭവത്തില് പശ്ചിമ ബംഗാള് സര്ക്കാരിനെതിരെ സുപ്രീം കോടതി രൂക്ഷ വിമര്ശനവുമായി രംഗത്തെത്തി. നിയമം കയ്യിലെടുക്കാന് ആരെയും അനുവദിക്കില്ലെന്നും ഇത് ഞെട്ടിപ്പിക്കുന്ന സംഭവമാണെന്നും ചീഫ് ജസ്റ്റിസ് സൂര്യകാന്ത് പറഞ്ഞു.
ക്രിമിനല് കോടതി അലക്ഷ്യത്തിന് തുല്യമായ പ്രവൃത്തിയാണ് നടന്നതെന്ന് കോടതി നിരീക്ഷിച്ചു. സംഭവമുണ്ടായപ്പോള് കളക്ടറോ എസ്പിയോ സ്ഥലത്തെത്തിയില്ല എന്നത് സംസ്ഥാന ഭരണകൂടത്തിന്റെ പൂര്ണ പരാജയമാണ് വ്യക്തമാക്കുന്നതെന്നും മമത ബാനര്ജി സര്ക്കാരിനെ കോടതി അതിനിശിതമായി വിമര്ശിച്ചു. നിങ്ങളുടെ സംസ്ഥാനത്ത് നിങ്ങള് ഓരോരുത്തരും രാഷ്ട്രീയ ഭാഷ സംസാരിക്കുന്നുവെന്നും ഇത്രയും ധ്രുവീകരിക്കപ്പെട്ട ഒരു സംസ്ഥാനത്തെ ഇതുവരെ കണ്ടിട്ടില്ലെന്നും ചീഫ് ജസ്റ്റിസ് സൂര്യകാന്ത് പശ്ചിമ ബംഗാള് അഡ്വക്കേറ്റ് ജനറലിനോട് പറഞ്ഞു.
മാള്ഡയില് ജുഡീഷ്യല് ഓഫീസര്മാരെ തടഞ്ഞത് അതീവ ഗൗരവത്തോടെയാണ് കോടതി കാണുന്നത്. ബംഗാള് ചീഫ് സെക്രട്ടറി, ആഭ്യന്തര സെക്രട്ടറി, ഡിജിപി എന്നിവരുടെ പ്രവര്ത്തനം പരിതാപകരമാണെന്നും ചീഫ് ജസ്റ്റിസ് അധ്യക്ഷനായ ബെഞ്ച് വിമര്ശിച്ചു. നിര്ഭാഗ്യകരമായ കാര്യങ്ങളാണ് സംസ്ഥാനത്ത് നടക്കുന്നതെന്നും സുപ്രീം കോടതി കുറ്റപ്പെടുത്തി.
