ന്യൂഡല്ഹി: ഇറാനില് നിന്നും ക്രൂഡ് ഓയിലുമായി ഇന്ത്യയിലേക്ക് തിരിച്ച കപ്പല് അവസാനനിമിഷം ചൈനയിലേക്ക് വഴിതിരിച്ചു വിട്ടു. ആറുലക്ഷം ബാരല് ക്രൂഡ് ഓയില് ഉണ്ടായിരുന്ന കപ്പലാണ് വഴിതിരിച്ചുവിട്ടത്. ക്രൂഡ് ഓയിലിന്റെ പണമിടപാടിലെ സാങ്കേതിക പ്രശ്നങ്ങളാണ് കാരണമെന്നാണ് സൂചന. ഗുജറാത്ത് തീരത്ത് എത്തേണ്ടിയിരുന്ന കപ്പലാണ് ചൈനയിലേക്ക് തിരിച്ചത്.
ഗുജറാത്തിലെ വാഡിനാര് തുറമുഖം ലക്ഷ്യമാക്കി ആറ് ലക്ഷം ബാരല് അസംസ്കൃത എണ്ണയുമായി നീങ്ങുകയായിരുന്ന 'പിങ് ഷുന്' എന്ന കപ്പലാണ് യാത്ര റദ്ദാക്കി ചൈനയിലെ ഡോംഗിയിങ് തുറമുഖത്തേക്ക് തിരിച്ചത്. നീണ്ട ഏഴ് വര്ഷത്തെ ഇടവേളയ്ക്ക് ശേഷം ഇറാനില് നിന്ന് ഇന്ത്യയിലേക്ക് ക്രൂഡ് ഓയിലുമായി എത്തിയതായിരുന്നു കപ്പല്. സാധാരണയായി അന്താരാഷ്ട്ര എണ്ണ വ്യാപാരങ്ങളില് പണമടയ്ക്കാന് 30 മുതല് 60 ദിവസം വരെ സാവകാശം ലഭിക്കാറുണ്ട്. എന്നാല്, ഈ കപ്പലിന്റെ കാര്യത്തില് ചരക്ക് ഇറക്കുന്നതിന് മുന്പ് തന്നെ പണം നല്കണമെന്നോ അല്ലെങ്കില് ഉടനടി സെറ്റില്മെന്റ് നടത്തണമെന്നോ ഉള്ള കര്ശന നിലപാട് ഇറാന് സ്വീകരിച്ചതാണ് ഇന്ത്യയ്ക്ക് തിരിച്ചടിയായത്.
അമേരിക്കന് ഉപരോധം നിലനില്ക്കുന്നതിനാല് ആഗോള ബാങ്കിങ് ആശയവിനിമയ സംവിധാനമായ സ്വിഫ്റ്റില് നിന്ന് ഇറാന് വിലക്കുണ്ട്. ഈ സാഹചര്യത്തില് ബാങ്കുകള് വഴി പണമയക്കാന് കഴിയില്ല. കടലില് കെട്ടിക്കിടക്കുന്ന ഇറാനിയന് എണ്ണ വാങ്ങാന് അമേരിക്ക നല്കിയ 30 ദിവസത്തെ ഇളവ് ഏപ്രില് 19-ന് അവസാനിക്കാനിരിക്കെയാണ് ഈ നാടകീയ നീക്കങ്ങള് നടന്നത്. 2018 വരെ ഇന്ത്യയുടെ ആകെ എണ്ണ ഇറക്കുമതിയുടെ 11.5% ഇറാനില് നിന്നായിരുന്നു. എന്നാല് 2019 മേയ് മാസത്തിന് ശേഷം ഇന്ത്യ ഇറാനില് നിന്ന് എണ്ണ വാങ്ങിയിട്ടില്ല.
അമേരിക്കന് ഉപരോധം കര്ശനമായതോടെയായിരുന്നു ഇന്ത്യ ഇറാനില് നിന്നും അകന്നു നിന്നത്. ഏഴ് വര്ഷത്തിന് ശേഷം എണ്ണവാങ്ങല് പുനരാരംഭിക്കാനിരുന്ന ഈ എണ്ണ വ്യാപാരം പരാജയപ്പെട്ടത് ഊര്ജ്ജ വിപണിയില് വലിയ ചര്ച്ചകള്ക്ക് വഴിവെച്ചിരിക്കുകയാണ്. നിലവില് ഉപരോധങ്ങള് മറികടന്ന് റഷ്യയില് നിന്നാണ് ഇന്ത്യ വലിയ തോതില് എണ്ണ ഇറക്കുമതി ചെയ്യുന്നത്.
