വിജയവാഡ: എച്ച്ഐവി ബാധിതയായ സർക്കാർ ജീവനക്കാരി ബലാത്സംഗത്തിനിരയായി. വിജയവാഡയിലെ പാല്നാട് ജില്ലയിലുള്ള മാചേർല എന്ന ഗ്രാമത്തിലാണ് സംഭവം. അജ്ഞാതനായ ഒരാൾ വീട്ടിൽ കയറി 35 കാരിയായ യുവതിയെ കത്തി കാണിച്ച് ബലാത്സംഗം ചെയ്യുകയും തുടർന്ന് ഇരുമ്പ് വടികൊണ്ട് ആക്രമിക്കുകയും ചെയ്തതായി പൊലീസ് പറഞ്ഞു. ഗുരുതരമായി പരിക്കേറ്റ യുവതി ചികിത്സയിലാണ്.
വ്യാഴാഴ്ച വൈകുന്നേരമാണ് സംഭവം നടന്നത്. കുടിക്കാൻ വെള്ളം ചോദിച്ചാണ് പ്രതി യുവതിയുടെ വീട്ടിലെത്തിയത്. തുടർന്ന് വീട്ടിൽ ആളില്ലെന്ന് ഉറപ്പായതോടെ യുവതിയെ ആക്രമിക്കുകയായിരുന്നു. യുവതിയെ തുണി ഉപയോഗിച്ച് കെട്ടിയിട്ടതിന് ശേഷം കത്തി കാണിച്ച് ഭീഷണിപ്പെടുത്തിയാണ് ബലാത്സംഗം ചെയ്തത്. താൻ എച്ച്ഐവി ബാധിതയെന്ന് പറഞ്ഞപ്പോൾ യുവതിയുടെ സ്വകാര്യഭാഗത്ത് ഇരുമ്പുകമ്പി കുത്തിയിറക്കുകയും ക്രൂരമായി മർദ്ദിക്കുകയും ചെയ്തു. സംഭവത്തിന് പിന്നാലെ പ്രതി സ്ഥലത്ത് നിന്ന് കടന്നുകളഞ്ഞു.
