കൊച്ചി: വയനാട് ഉരുള്പൊട്ടല് ദുരിതബാധിതര്ക്കായി കോണ്ഗ്രസ് പിരിച്ച ഫണ്ട് എവിടെ എന്ന ചോദ്യങ്ങള്ക്ക് ഒടുവില് മറുപടിയുമായി കോണ്ഗ്രസ് രംഗത്ത്. ദുരിതബാധിതര്ക്കായി പിരിച്ച ഫണ്ടിന്റെ അക്കൗണ്ട് തിരുവനന്തപുരത്തെ ധനലക്ഷ്മി ബാങ്കിന്റെ ബ്രാഞ്ചിലാണെന്ന് എ.ഐ.സി.സി ജനറല് സെക്രട്ടറി കെ.സി. വേണുഗോപാല് പറഞ്ഞു. പിരിഞ്ഞുകിട്ടിയതിനേക്കാള് കൂടിയ വിലയ്ക്കാണ് ഭൂമി വാങ്ങിയതെന്നും ബാക്കി തുക കെ.പി.സി.സി അക്കൗണ്ടില് നിന്ന് നല്കിയെന്നും അദ്ദേഹം വ്യക്തമാക്കി. കോണ്ഗ്രസ് വയനാട്ടിലേക്ക് പിരിച്ച ഫണ്ട് എവിടെയെന്ന ചോദ്യം മുഖ്യമന്ത്രി അടക്കമുള്ളവര് ഉന്നയിച്ചിരുന്നു. ഇത് കോണ്ഗ്രസിനെ പ്രതിരോധത്തിലാക്കിയിരുന്നെങ്കിലും ഇക്കാര്യത്തില് ഒരു വ്യക്തത പാര്ട്ടി വരുത്തിയിരുന്നില്ല. കോണ്ഗ്രസ് വാഗ്ദാനം ചെയ്ത വീടുകളുടെ നിര്മ്മാണ പ്രവൃത്തി ആരംഭിക്കാത്തതും വിമര്ശനത്തിന് ഇടയാക്കിയിരുന്നു. ഇതിനിടെയാണ് കെ.സിയുടെ മറുപടി.
മുണ്ടക്കൈ ചൂരല്മല ദുരന്തബാധിതര്ക്കായി 100 വീടുകള് നിര്മ്മിക്കുമെന്നായിരുന്നു കോണ്ഗ്രസിന്റെ പ്രഖ്യാപനം. ഫെബ്രുവരിയില് മേപ്പാടി കുന്നമ്പറ്റയില് കോണ്ഗ്രസ് വാങ്ങിയ സ്ഥലത്ത് രാഹുല് ഗാന്ധി തറക്കല്ലിട്ടിരുന്നു. കുന്നമ്പറ്റയില് പദ്ധതിക്കായി 3.26 ഏക്കര് ഭൂമി രജിസ്റ്റര് ചെയ്തതായി പ്രിയങ്ക ഗാന്ധി പറഞ്ഞിരുന്നു. 2.18 ഏക്കര് ഭൂമി കൂടി വാങ്ങിയിട്ടുണ്ട്. മറ്റൊരിടത്ത് അഞ്ചേക്കര് വാങ്ങുന്നതിനായുള്ള ചര്ച്ചകള് നടക്കുന്നതായും പ്രിയങ്ക അന്ന് വ്യക്തമാക്കിയിരുന്നു. എന്നാല് നിര്മ്മാണ പ്രവര്ത്തനം ആരംഭിക്കാത്തതിനെതിരെ ഡി.വൈ.എഫ്.ഐ ക്യാംപയിനുമായി രംഗത്തെത്തുകയും ചെയ്തിരുന്നു.
കോണ്ഗ്രസ് അക്കൗണ്ട് എവിടെയെന്ന് വെളിപ്പെടുത്താന് മുഖ്യമന്ത്രി പ്രതിപക്ഷ നേതാവിനെ വെല്ലുവിളിച്ചിരുന്നു. മുണ്ടക്കൈ ചൂരല്മല ദുരന്തബാധിതരെ സഹായിക്കാനെന്ന പേരില് പിരിച്ച പണമെത്ര എന്ന് മുഖ്യമന്ത്രി ചോദിച്ചു. 'എന്റെയും കെ.പി.സി.സി പ്രസിഡന്റിന്റെയും സംയുക്ത അക്കൗണ്ടിലാണ് പണമുള്ളത്' എന്ന് പ്രതിപക്ഷ നേതാവ് പറഞ്ഞിട്ടുണ്ടല്ലോ. എത്ര പണം കൈയിലുണ്ട്? ആ അക്കൗണ്ട് ഏത് ബാങ്കിലാണ്? എന്നും മുഖ്യമന്ത്രി ചോദിച്ചിരുന്നു.
വയനാട് ദുരിതാശ്വാസത്തിനായി പിരിച്ച ഓരോ രൂപയ്ക്കും കൃത്യമായ കണക്കുകള് മുഖ്യമന്ത്രി പൊതുജനങ്ങള്ക്ക് മുന്നില് വെച്ചിട്ടുണ്ട്. സുതാര്യതയാണ് ഞങ്ങളുടെ ശക്തിയെന്നും ജനവിശ്വാസമാണ് ഞങ്ങളുടെ മൂലധനമെന്നും അദ്ദേഹം പറഞ്ഞു. കണക്ക് പൊതുജനത്തിന് മുന്നില് വെക്കാന് കഴിയാത്തവര്ക്ക് ധാര്മ്മികത പറയാന് അവകാശമില്ലെന്നും മുഖ്യമന്ത്രി കൂട്ടിച്ചേര്ത്തു. കെ.സി. വേണുഗോപാലിന്റെ മറുപടിയോടെ ഫണ്ട് വിവാദത്തില് പുതിയ വഴിത്തിരിവുണ്ടായിരിക്കുകയാണ്.
