ന്യൂയോര്ക്ക് : മദ്ധ്യേഷ്യയിലെ പോരാട്ടം മറ്റൊരു തലത്തിലേക്ക് മാറിക്കൊണ്ടിരിക്കെ വലിയ ചര്ച്ചയായി അമേരിക്കയുടെ പേഴ്സണല് റിക്കവറി ജോയിന്റ് പബ്ലിക്കേഷന്. ശത്രുരാജ്യത്ത് ഒരു വിമാനം തകര്ന്നാല്, ഉടന് തന്നെ പൈലറ്റിനെ വീണ്ടെടുക്കാനും ശത്രുക്കള്ക്ക് രഹസ്യവിവരങ്ങള് ലഭിക്കുന്നത് തടയാനും യുഎസ് സൈന്യം ആസൂത്രണം ചെയ്തിട്ടുള്ള സുസജ്ജമായ പദ്ധതികളില് ഒന്നാണ് ഇത്.
വൈമാനികരുടെ സുരക്ഷ സൈനികരുടെ ജീവന് സംരക്ഷിക്കുക എന്നതാണ് ഇതിലെ പ്രഥമ പരിഗണന. വിമാനത്തിലെ ആധുനിക റഡാറുകള്, ആശയവിനിമയ സംവിധാനങ്ങള്, ആയുധങ്ങള് എന്നിവ ശത്രുക്കളുടെ കയ്യില് അകപ്പെടാതിരിക്കാന് വേണ്ടിയാണ് ഈ സംവിധാനം. ഒരു വിമാനം തകര്ന്നാലുടന് പ്രത്യേക പരിശീലനം ലഭിച്ച രക്ഷാസേനയെ വിന്യസിക്കുന്നു. എയര്ഫോഴ്സ് പാരാറെസ്ക്യൂ ജമ്പേഴ്സ്, നേവി സീല്സ് ആര്മി സ്പെഷ്യല് ഓപ്പറേഷന്സ് യൂണിറ്റുകള് എന്നിവ ഇതില് ഉള്പ്പെടുന്നു. ഡ്രോണുകള്, സാറ്റലൈറ്റുകള്, നിരീക്ഷണ വിമാനങ്ങള് എന്നിവ പൈലറ്റിന്റെ ലൊക്കേഷന് തത്സമയം നിരീക്ഷിക്കുകയും രക്ഷാപ്രവര്ത്തകര്ക്ക് വഴികാട്ടുകയും ചെയ്യുന്നു.
തകര്ന്ന വിമാനത്തിന്റെ അവശിഷ്ടങ്ങള് വീണ്ടെടുക്കാന് കഴിയാത്ത സാഹചര്യമാണെങ്കില്, ശത്രുക്കള്ക്ക് സാങ്കേതികവിദ്യ ചോര്ത്താന് കഴിയാത്ത വിധം വ്യോമാക്രമണത്തിലൂടെ അവ നശിപ്പിക്കാറുണ്ട്. വിമാനത്തില് നിന്ന് പൈലറ്റ് ഇജക്ട് ചെയ്ത് രക്ഷപ്പെട്ടാല്, ശത്രുക്കളുടെ കണ്ണില്പ്പെടാതെ ഒളിച്ചിരിക്കുക എന്നതാണ് അവരുടെ പ്രധാന ദൗത്യം. സര്വൈവല്, ഇവേഷന്, റെസിസ്റ്റന്സ്, എസ്കേപ്പ് ട്രെയിനിംഗിലൂടെ പൈലറ്റുമാര്ക്ക് ഒളിച്ചിരിക്കാനും രഹസ്യമായി ആശയവിനിമയം നടത്താനുമുള്ള പ്രത്യേക പരിശീലനം നല്കുന്നുണ്ട്.
ഇറാന് വെടിവെച്ചിട്ട യുഎസ് എഫ്-15ഇ (F-15E) സ്ട്രൈക്ക് ഈഗിള് വിമാനത്തിലെ ഒരു സൈനികനെ രക്ഷപ്പെടുത്തിയിട്ടുണ്ട്. രണ്ടാമത്തെ പൈലറ്റിനായുള്ള തിരച്ചില് തുടരുകയാണ്. ഇറാന്റെ ആക്രമണത്തില് ഒരു യുഎസ് എ-10 (A-10) വിമാനവും തകര്ന്നതായി റിപ്പോര്ട്ടുകളുണ്ട്. അമേരിക്കന് സൈന്യത്തിന് അത്യാധുനിക നൈറ്റ് വിഷന് ഉപകരണങ്ങളും ഇന്ഫ്രാറെഡ് ആശയവിനിമയ സംവിധാനങ്ങളും ഉള്ളതിനാല് ശത്രുക്കളുടെ കണ്ണില്പ്പെടാതെ പൈലറ്റിനെ കണ്ടെത്താന് യുഎസ് സേനയ്ക്ക് സാധിക്കുമെന്ന് വിദഗ്ധര് വിലയിരുത്തുന്നു.
