തിരുവല്ല: തന്റെ വലംകൈയ്യെന്ന പ്രധാനമന്ത്രിയുടെ പരാമര്ശം തന്നില് ഉത്തരവാദിത്വബോധം കൂട്ടിയെന്ന് തിരുവല്ലയിലെ എന്ഡിഎ സ്ഥാനാര്ത്ഥി അനൂപ് ആന്റണി. പ്രധാനമന്ത്രിയുടെ തിരുവല്ലയിലെ സന്ദര്ശനത്തിന് ശേഷം ജനങ്ങള്ക്ക് തന്നോടുള്ള ആഭിമുഖ്യം കൂടിയെന്നും ബിജെപിദുര്ബ്ബലമായ പ്രദേശങ്ങളില് പോലും സ്വീകരിക്കാനായി നൂറുകണക്കിന് പേരാണ് വരുന്നതെന്നും ജയിച്ചുവന്നാല് തിരുവല്ലയില് വലിയ രീതിയിലുള്ള വികസനങ്ങള് സാധ്യമാക്കുമെന്നും അനൂപ് ആന്റണി പറഞ്ഞു.
നേരത്തേ മുതല് ബിജെപിയ്ക്ക് ശക്തമായ അടിത്തറയുള്ള മണ്ഡലമാണ് തിരുവല്ല. രണ്ടു പഞ്ചായത്തുകളില് ഭരണം നടത്തുകയും നേരത്തേ ഭരണത്തിലിരിക്കുകയും ചെയ്തിട്ടുണ്ട്. മുനിസിപ്പാലിറ്റിയിലും മതിയായ ശക്തിയുണ്ട്. അതില് നിന്നുമാണ് ഈ രീതിയിലേക്കുള്ള വളര്ച്ച ബിജെപി സാധ്യമാക്കിയത്. ഇതാണ് ഏറെ ആത്മവിശ്വാസമായി ബിജെപിയ്ക്ക് മാറിയത്. കഴിഞ്ഞ ദിവസം നടന്ന പ്രധാനമന്ത്രിയുടെ പരിപാടിയ്ക്ക് എത്തിയവരെല്ലാം ബിജെപിക്കാര് ആയിരുന്നില്ല. അതിനൊപ്പം ബിജെപിയുടെ പ്രവര്ത്തനങ്ങള് കുടിയാകുമ്പോള് തിരുവല്ലയില് എന്ഡിഎ വിജയിക്കും.
എഫ്സിആര്എ വിഷയം തിരിച്ചടിയാകില്ലെന്നും പറഞ്ഞു. പ്രശ്നത്തില് ക്രിസ്തീയ സംഘടനകള് എതിര്പ്പുമായി വന്നപ്പോള് കേന്ദ്രസര്ക്കാര് എങ്ങിനെയാണ് ഇടപെട്ടതെന്നും പ്രതികരിച്ചതെന്നും പ്രധാനമാണ്. രാജീവ് ചന്ദ്രശേഖറും താനുമെല്ലാം പ്രശ്നത്തില് കൃത്യമായി ഇടപെടുകയും കൃത്യമായ സന്ദേശം മേല്ഘടകത്തിന് നല്കുകയും ചെയ്തു. അത് അവഗണിക്കുന്നതിന് പകരം അതില് കൃത്യമായി കേന്ദ്രം ഇടപെട്ടു. ന്യൂനപക്ഷ മന്ത്രി കിരണ്റിജിജു പ്രതികരിച്ചു. പ്രധാനമന്ത്രി തന്നെ രംഗത്ത് വന്നു നിങ്ങള് കരുതുന്നത് പോലെയൊരു പ്രശ്നമില്ലെന്ന് ഉറപ്പ് നല്കുകയും ചെയ്തു. സിഎഎ വന്നപ്പോള് ഉണ്ടായത് പോലെയുള്ള തെറ്റിദ്ധാരണ പരത്തലാണെന്നും പറഞ്ഞു.
ബില്ല് മാറ്റി വെച്ചു എന്ന് പറയുന്നത് തന്നെ വലിയൊരു ഇടപെടലാണ്. ഇത്രയും വലിയൊരു രാജ്യത്ത് ഇത്രയും വലിയ ബില് മാറ്റിവെച്ചില്ലെങ്കിലും കുഴപ്പമില്ലായിരുന്നു. എന്നാല് പ്രധാനമന്ത്രി കേരളത്തെ കൈവിടില്ല എന്നതിന്റെ ഏറ്റവും വലിയ ഉദാഹരണമാണ് ബില് മാറ്റിവെച്ചത്. തെരഞ്ഞെടുപ്പ് കഴിയുമ്പോള് ചര്ച്ചകള് ഉള്പ്പെടെയുള്ള അടുത്ത ഘട്ടത്തിലേക്ക് കടക്കും. അതുകൊണ്ടു തന്നെ സഭകളിലും ക്രിസ്ത്യന്സിനാണെങ്കിലും പരസ്പരം ആശയവിനിമയം നടത്താനും മറ്റും ഏറെ സമയം കിട്ടും. മുമ്പ് കന്യാസ്ത്രീകളുടെ വിഷയം വന്നപ്പോഴും ക്രിസ്ത്യന് സംഘടനകള് കൃത്യമായ നിലപാടുകള് എടുത്തിരുന്നു. എന്നാല് പിന്നീട് വിഷയത്തില് കേന്ദ്രം ഇടപെട്ടപ്പോള് എല്ലാം മനസ്സിലായി ആ ചാപ്റ്റര് തന്നെ ക്ളോസായിപ്പോയി. സമാന സാഹചര്യം തന്നെയാകും എഫ്സിആര്എയുമായിട്ടും ഉണ്ടാകുക.
എന്നിരുന്നാലും താന് ഉള്പ്പെടെയുള്ളവര് വ്യക്തിപരമായി വിഷയത്തില് ഇടപെടുന്നുണ്ടെന്നും അതിന് വലിയ പ്രോത്സാഹനം കിട്ടുന്നുണ്ടെന്നും പറഞ്ഞു. തിരുവല്ല പ്രവാസികള് ഏറെയുള്ള സ്ഥലമാണ്. അവര് ലോകം കണ്ടിട്ടുള്ളവരാണ്. പ്രധാനമന്ത്രി നരേന്ദ്രമോദി എന്താണെന്നും അദ്ദേഹം ഇന്ത്യയെ ലോകത്ത് എവിടെയെത്തിച്ചു എങ്ങിനെയെത്തിച്ചു എന്നുമെല്ലാം വലിയ ധാരണയുള്ളവരാണ്. പ്രധാനമന്ത്രി വന്നുപോയതിന് ശേഷം വലിയ പ്രതികരണമാണ് വോട്ടര്മാരില് നിന്നും കിട്ടുന്നത്. ബിജെപി ദുര്ബ്ബലമായ മേഖലകളില് പോലും നൂറുകണക്കിന് ആളുകള് സ്വീകരിക്കാന് എത്തുകയാണ്. അത് എന്നോട് കാണിക്കുന്ന ബഹുമാനവും അടുപ്പവുമല്ല. പ്രധാനമന്ത്രിയോടുള്ള അടുപ്പവും സ്നേഹവുമാണ്.
