പൊതു ഇടങ്ങളില് പാന് മുറുക്കി തുപ്പുന്ന ചില ഇന്ത്യക്കാരുടെ മോശം ശീലത്തിനെതിരെ പല വിദേശ രാജ്യങ്ങളും പരാതിപ്പെടുന്നത് പതിവാണ്. ഇതിനിടെയാണ് നേപ്പാളിലെത്തിയ രണ്ട് ഇന്ത്യന് വിനോദസഞ്ചാരികളെ അവിടുത്തെ ഒരു സ്വദേശി പരസ്യമായി തിരുത്തുന്ന വീഡിയോ പുറത്തുവന്നത്. റെയില്വേ സ്റ്റേഷനുകളും ബസ് സ്റ്റാന്ഡുകളും മെട്രോ സ്റ്റേഷനുകളും വരെ ഇത്തരം പ്രവൃത്തികള് കൊണ്ട് മലിനമാക്കുന്നതിനെതിരെ വലിയ പ്രതിഷേധം നിലനില്ക്കുന്നുണ്ട്. റോഡില് തുപ്പിയ ഇന്ത്യക്കാരെ രാജു ലാമിച്ചനെ എന്ന നേപ്പാള് സ്വദേശിയാണ് ഉടന് തന്നെ ചോദ്യം ചെയ്തത്.
'ഇത് ഇന്ത്യയല്ല സഹോദരാ, ഇത് നേപ്പാളാണ്, ഇവിടെ മലിനമാക്കരുത്' എന്ന് പറഞ്ഞുകൊണ്ട് രാജു യുവാക്കളെക്കൊണ്ട് തന്നെ ആ സ്ഥലം വെള്ളമൊഴിച്ച് വൃത്തിയാക്കിച്ചു. വലിയൊരു രാജ്യത്ത് നിന്ന് വന്നിട്ട് ഇത്തരത്തില് പെരുമാറുന്നതിന് മുമ്പ് ആലോചിക്കണമെന്നും യുവാക്കള് പറഞ്ഞ 'സോറി' കൊണ്ട് മാത്രം കാര്യമായില്ലെന്നും അദ്ദേഹം ഓര്മ്മിപ്പിച്ചു. പൊതു ശുചിത്വത്തിന്റെ പ്രാധാന്യത്തിലേക്ക് വിരല് ചൂണ്ടുന്ന ഈ വീഡിയോ നിമിഷങ്ങള്ക്കകമാണ് സോഷ്യല് മീഡിയയില് തരംഗമായത്. സ്വന്തം നാടിന്റെ വൃത്തി കാത്തുസൂക്ഷിക്കാനുള്ള രാജുവിന്റെ ആര്ജ്ജവത്തെ നിരവധി പേര് അഭിനന്ദിച്ചു.
വൈറലായ വീഡിയോ ഇതിനോടകം 36 ലക്ഷത്തിലധികം ആളുകളാണ് കണ്ടത്. ഇന്ത്യക്കാരെ ഒന്നടങ്കം ആക്ഷേപിക്കുന്നതിനെതിരെ ചിലര് രംഗത്തെത്തിയപ്പോള്, പൊതു ഇടങ്ങളിലെ അനാദരവിനെ ഭൂരിഭാഗം പേരും രൂക്ഷമായി വിമര്ശിച്ചു. സ്വന്തം രാജ്യത്തോടുള്ള സ്നേഹമാണ് രാജു കാണിച്ചതെന്നും ഇത്തരം തെറ്റുകള് തിരുത്തപ്പെടേണ്ടതാണെന്നും പലരും അഭിപ്രായപ്പെട്ടു.
