കുടുംബാംഗങ്ങള്ക്കും സുഹൃത്തുക്കള്ക്കുമൊപ്പം തന്റെ 44 ാം ജന്മദിനം ആഘോഷിച്ച് നടന് അല്ലു അര്ജുന്. 2026 ഏപ്രില് എട്ടിന് നടന്ന ജന്മദിനാഘോഷങ്ങള്ക്കിടെ ഹൈദരാബാദിലെ അല്ലു അര്ജുന്റെ വസതിക്കുപിന്നില് നിരവധി ആരാധകരാണ് തടിച്ചുകൂടിയത്.
രാത്രി വൈകിയും വീടിനുമുന്നില് നിലയുറപ്പിച്ച ആരാധകര് മൊബൈല് ഫോണുകളിലെ ഫ്ളാഷ് ലൈറ്റുകള് തെളിയിച്ചുകൊണ്ട് പ്രിയതാരത്തിന്റെ ജന്മദിനം ആഘോഷമാക്കി. ഇതിന്റെ ദൃശ്യങ്ങള് അല്ലു അര്ജുന്റെ സഹോദരന് അല്ലു സിരിഷ് ഇന്സ്റ്റഗ്രാമിലൂടെ പങ്കുവെച്ചിട്ടുണ്ട്. നിങ്ങള് എപ്പോഴും ഇങ്ങനെ ആഘോഷിക്കപ്പെടട്ടെ എന്ന് കുറിച്ചുകൊണ്ടാണ് അല്ലുവിന് ആശംസകള് നേര്ന്ന് അല്ലു സിരിഷ് വീഡിയോ പങ്കുവെച്ചത്.
അല്ലു അര്ജുന്റെ ഭാര്യ സ്നേഹ റെഡ്ഡിയും ബര്ത്ത്ഡേ ആഘോഷത്തിന്റെ വീഡിയോ ഇന്സ്റ്റഗ്രാം സ്റ്റോറിയായി പങ്കുവെച്ചിട്ടുണ്ട്. അല്ലു അര്ജുന് പിറന്നാള് കേക്ക് മുറിക്കുന്ന ദൃശ്യങ്ങളാണ് വീഡിയോയിലുളളത്. കേക്ക് മുറിച്ച് സ്നേഹയ്ക്ക് കൊടുക്കുന്നതും വീഡിയോയില് കാണാം. ഹാപ്പി ബര്ത്ത് ഡേ എന്നാണ് വീഡിയോയ്ക്കൊപ്പം സ്നേഹ കുറിച്ചത്.
അല്ലു അര്ജുന്റെ ഈ പിറന്നാള് ദിനത്തില് സിനിമാ ലോകത്തെയും ആരാധകശരയും ആവേശത്തിലാഴ്ത്തി താരത്തിന്റെ പുതിയ ചിത്രത്തിന്റെ പ്രഖ്യാപനമുണ്ടായത്. AA22xA6 എന്ന പേരില് ഇതുവരെ അറിയപ്പെട്ടിരുന്ന പ്രോജക്ടിന് രാക്ക എന്നാണ് ഔദ്യോഗികമായി പേരിട്ടിരിക്കുന്നത്. അറ്റ്ലിയാണ് ചിത്രം സംവിധാനം ചെയ്യുന്നത്. ദീപിക പദുകോണ് നായികയായി എത്തുന്ന ഈ ചിത്രത്തിന്റെ ഫസ്റ്റ്ലുക്ക് പോസ്റ്ററില് മൊട്ടയടിച്ച തലയും കൂര്ത്ത നഖങ്ങളുമുളള മനുഷ്യനും മൃഗവും ഒന്നിക്കുന്ന പോലുളള രൂപത്തിലാണ് അല്ലു അര്ജുന് പ്രത്യക്ഷപ്പെടുന്നത്.
