ദോഹ: ഖത്തറിലെ പ്രവാസി മലയാളി സമൂഹത്തിന് താങ്ങും തണലുമാകുന്ന പ്രവാസി വെൽഫെയറിന്റെ സേവന പ്രവർത്തനങ്ങളിൽ പുതിയൊരു അധ്യായം കൂടി. പ്രവാസി വെൽഫെയർ തൃശൂർ ജില്ലാ കമ്മ്യൂണിറ്റി സർവീസ് വകുപ്പിന്റെ നേതൃത്വത്തിൽ ആവിഷ്കരിച്ച 'വെൽഫെയർ ബോക്സ്' പദ്ധതിക്ക് ഔദ്യോഗിക തുടക്കമായി.
പ്രവാസി വെൽഫെയർ ഹാളിൽ നടന്ന ചടങ്ങിൽ സംസ്ഥാന വൈസ് പ്രസിഡന്റ് ലത കൃഷ്ണ പദ്ധതിയുടെ ഉദ്ഘാടനം നിർവഹിച്ചു. പ്രവാസികൾക്കിടയിലെ പ്രയാസമനുഭവിക്കുന്നവർക്ക് കൈത്താങ്ങാകുക എന്നലക്ഷ്യത്തോടെയാണ് ഈ പദ്ധതി നടപ്പിലാക്കുന്നത്.
ചടങ്ങിൽ ജില്ലാ പ്രസിഡൻ്റ് അലി ഹസൻ അദ്ധ്യക്ഷത വഹിച്ചു. കമ്മ്യൂണിറ്റി സർവീസ് ജില്ലാ അദ്ധ്യക്ഷൻ ജ്യോതി നാഥ് പദ്ധതി വിശദീകരിച്ചു. ഖത്തറിലെ മലയാളി സമൂഹത്തിന് കൈത്താങ്ങായി പ്രവാസി വെൽഫെയറിൻ്റ നിരവധി സേവനപദ്ധതികളിൽ ഒന്നാണിത് എന്ന് അദ്ദേഹം പറഞ്ഞു. ആദ്യ വെൽഫെയർ ബോക്സ് സമർപ്പണം ഗുരുവായൂർ മണ്ഡലം പ്രസിഡൻ്റ് ലത്തീഫ് നിർവഹിച്ചു. മണലൂർ മണ്ഡലം പ്രസിഡൻ്റ് ഇബ്രാഹിംകുട്ടി കൊടുങ്ങല്ലൂർ മണ്ഡലം പ്രസിഡൻ്റ് റാഷിദ് എന്നിവരും അവരുടെ മണ്ഡലങ്ങളിൽ നിന്നും സമാഹരിച്ച വിഭവങ്ങൾ കൈമാറി. ചടങ്ങിൽ സംസ്ഥാന വൈസ് പ്രസിഡൻ്റ് അനീസ് മാള, സംസ്ഥാന വർക്കിംഗ് കമ്മിറ്റിയംഗം മജീദലി എന്നിവർ സംബന്ധിച്ചു. ജില്ലാ ജനറൽ സെക്രട്ടറി നിഷാദ് ഗുരുവായൂർ സ്വാഗതവും ജില്ലാ വൈസ് പ്രസിഡൻ്റ് ഉമർ കളത്തിങ്കൽ നന്ദിയും പറഞ്ഞു.
ഷഫീക്ക് അറയ്ക്കൽ
