കൊച്ചി: അഞ്ചരക്കണ്ടി ഡെന്റല് കോളേജ് വിദ്യാര്ത്ഥി നിതിന് രാജിന്റെ മരണത്തില് പ്രതികരിച്ച് ആക്ടിവിസ്റ്റ് ടി എസ് ശ്യാംകുമാര്. കേരളത്തില് നടക്കുന്ന ആദ്യത്തെ സംഭവമല്ലിതെന്നും അവസാനത്തേത് ആണെന്ന് താന് കരുതുന്നില്ലെന്നും ടി എസ് ശ്യാംകുമാര് പറഞ്ഞു. ജാതി വിഷയത്തെ ആഴത്തില് അഭിസംബോധന ചെയ്യുന്നതില് നാം സമ്പൂര്ണമായി പരാജയപ്പെട്ടെന്ന് അദ്ദേഹം പറഞ്ഞു.
'പുരോഗമന കേരളമാണെന്നും കമ്യൂണിസ്റ്റ് കേരളമാണെന്നും നാം പറയാറുണ്ട്. ഇത് കണ്ണൂരാണ് സംഭവിച്ചതെന്ന് നാം വളരെ പ്രാധാന്യത്തോടെ കാണണം. ജാതി വിഷയത്തെ ആഴത്തില് അഭിസംബോധന ചെയ്യുന്നതില് നാം സമ്പൂര്ണമായി പരാജയപ്പെട്ടിരിക്കുന്നുവെന്നതാണ് ഇത് തെളിയിക്കുന്നത്. നിതിന് രാജിന്റേത് ആത്മഹത്യയല്ല, കൊലപാതകമാണ്. എന് കെ റാമും, സംഗീത നമ്പ്യാരുമടക്കമുള്ള ഡോക്ടര്മാരുടെ നേതൃത്വത്തിലാണ് അത് നടന്നത്. നീതിയുടെ പക്ഷത്ത് നില്ക്കുന്ന ഒരു അധ്യാപകന് എങ്കിലും കണ്ണൂര് ഡെന്റല് കോളേജില് ഉണ്ടായിരുന്നെങ്കില് ആ വിദ്യാര്ത്ഥിക്ക് അത്തരമൊരു ഹിംസ നേരിടേണ്ടി വരില്ലായിരുന്നു', ടി എസ് ശ്യാംകുമാര് പറഞ്ഞു.
