തായ്ലന്ഡിലെ ഹോട്ടല് ജീവനക്കാരിയോട് മോശമായി പെരുമാറുകയും അതിന്റെ ദൃശ്യങ്ങള് സമൂഹമാധ്യമങ്ങളിലൂടെ പ്രചരിപ്പിക്കുകയും ചെയ്ത ഇന്ത്യന് യുവാവിനെതിരെ വ്യാപക പ്രതിഷേധം. തായ്ലന്ഡില് ജോലി ചെയ്യുന്ന മോനു അസ്മി എന്ന യുവാവാണ് ഹൗസ് കീപ്പിങ് വിഭാഗത്തില് ജോലി ചെയ്തിരുന്ന വനിതാ ജീവനക്കാരിയെ ശല്യം ചെയ്യുകയും ബലമായി ചുംബിക്കുകയും ചെയ്തത്. തന്റെ അതിക്രമം യുവാവ് തന്നെ മൊബൈല് ഫോണില് പകര്ത്തി ഇന്സ്റ്റഗ്രാമില് പങ്കുവെച്ചതോടെയാണ് സംഭവം പുറംലോകമറിഞ്ഞത്.
വീഡിയോ വൈറലായതോടെ യുവാവിന്റെ നടപടി ആഗോളതലത്തില് ഇന്ത്യയുടെ പ്രതിച്ഛായക്ക് മങ്ങലേല്പ്പിക്കുന്നതാണെന്ന വിമര്ശനമാണ് വിവിധ കോണുകളില് നിന്ന് ഉയരുന്നത്. വിദേശരാജ്യങ്ങളില് ജോലി ചെയ്യുന്ന ഇന്ത്യക്കാര്ക്കും വിനോദസഞ്ചാരികള്ക്കും ഇത്തരം പ്രവണതകള് വരുംകാലങ്ങളില് തിരിച്ചടിയാകുമെന്ന് സോഷ്യല് മീഡിയയില് പലരും കുറിച്ചു. സേവന മേഖലയില് ജോലി ചെയ്യുന്ന സ്ത്രീകളോടുള്ള തികഞ്ഞ അനാദരവാണിതെന്നും, ഇത്തരക്കാര് രാജ്യത്തിന് നാണക്കേടാണെന്നും ചൂണ്ടിക്കാട്ടി യുവാവിനെതിരെ കര്ശന നടപടി വേണമെന്ന ആവശ്യവും ശക്തമായിട്ടുണ്ട്.
വിമര്ശനം കടുത്തതോടെ മോനു അസ്മി തന്റെ ഇന്സ്റ്റഗ്രാം പ്രൊഫൈലില് നിന്നും വിവാദ വീഡിയോകള് നീക്കം ചെയ്തു. സംഭവത്തില് ഇതുവരെ നിയമനടപടികളൊന്നും സ്വീകരിച്ചതായി റിപ്പോര്ട്ടുകളില്ല. യുവാവ് ജോലി ചെയ്യുന്ന ഹോട്ടല് അധികൃതരും വിഷയത്തില് ഇതുവരെ ഔദ്യോഗിക പ്രതികരണം നടത്തിയിട്ടില്ല.
