ലോകത്തെ നടുക്കിയ ആര്.എം.എസ് ടൈറ്റാനിക് ദുരന്തത്തില് നിന്ന് രക്ഷപ്പെട്ട യാത്രിക ധരിച്ചിരുന്ന ലൈഫ് ജാക്കറ്റ് ലേലത്തില് വിറ്റുപോയത് റെക്കോര്ഡ് തുകയ്ക്ക്. ടൈറ്റാനിക്കിലെ ഫസ്റ്റ് ക്ലാസ് യാത്രക്കാരിയായിരുന്ന ലോറ മേബല് ഫ്രാങ്കാറ്റെല്ലി ഉപയോഗിച്ചിരുന്ന ഈ ജാക്കറ്റിന് 670,000 പൗണ്ട് (ഏകദേശം 8.39 കോടി രൂപ) ആണ് വില ലഭിച്ചത്. ഇംഗ്ലണ്ടിലെ ദേവീസിലുള്ള ഹെന്റി ആല്ഡ്രിഡ്ജ് ആന്ഡ് സണ് എന്ന ലേലക്കമ്പനിയാണ് ഈ ചരിത്രശേഷിപ്പ് വിറ്റത്. പ്രതീക്ഷിച്ചതിലും ഇരട്ടി തുകയാണ് ഒരു അജ്ഞാതന് ഇതിനായി നല്കിയത്. ജാക്കറ്റിന് പുറമെ, ടൈറ്റാനിക്കിലെ ലൈഫ് ബോട്ടിലുണ്ടായിരുന്ന ഒരു സീറ്റ് കുഷ്യനും 3,90,000 പൗണ്ടിന് ലേലത്തില് വിറ്റുപോയി.
1912 ഏപ്രില് 15 ന് നടന്ന ദുരന്തസമയത്ത് ലോറ മേബല് തന്റെ ഭര്ത്താവിനും ഫാഷന് ഡിസൈനറായ ലൂസി ഡഫ് ഗോര്ഡനുമൊപ്പമാണ് ആദ്യത്തെ ലൈഫ് ബോട്ടില് കയറി രക്ഷപ്പെട്ടത്. ഈ ലൈഫ് ജാക്കറ്റിന് ലഭിച്ച വന്വില ടൈറ്റാനിക്കിലെ യാത്രക്കാരോടും ജീവനക്കാരോടുമുള്ള ലോകത്തിന്റെ ആദരവാണ് സൂചിപ്പിക്കുന്നതെന്ന് ലേലക്കാരനായ ആന്ഡ്രൂ ആല്ഡ്രിഡ്ജ് അഭിപ്രായപ്പെട്ടു. ഇംഗ്ലണ്ടില് നിന്ന് ന്യൂയോര്ക്കിലേക്കുള്ള കന്നിയാത്രയ്ക്കിടെ മഞ്ഞുമലയിലിടിച്ച് കപ്പല് മുങ്ങിയപ്പോള് 1,500 ഓളം പേര്ക്കാണ് ജീവന് നഷ്ടമായത്. ഏകദേശം 700 പേര് മാത്രമാണ് അന്ന് അത്ഭുതകരമായി രക്ഷപ്പെട്ടത്.
വടക്കന് അയര്ലന്ഡിലെ ഹര്ലാന്ഡ് ആന്ഡ് വോള്ഫ് കപ്പല്ശാലയില് നാല് വര്ഷമെടുത്താണ് ടൈറ്റാനിക് നിര്മ്മിച്ചത്. അക്കാലത്ത് 7.5 ദശലക്ഷം യു.എസ് ഡോളര് ചെലവഴിച്ച് നിര്മ്മിച്ച ഈ കൂറ്റന് കപ്പല് ആഡംബരത്തിന്റെ പര്യായമായിരുന്നു. യൂറോപ്പില് നിന്നുള്ള കുടിയേറ്റക്കാരെയും സമ്പന്നരെയും വഹിച്ചുകൊണ്ട് അറ്റ്ലാന്റിക് സമുദ്രം കുറുകെ കടക്കാനായി രൂപകല്പ്പന ചെയ്ത ടൈറ്റാനിക്, ഇന്നും ചരിത്രപ്രേമികള്ക്കിടയില് വിസ്മയമായി തുടരുന്നു. ദുരന്തത്തിന്റെ നൂറ്റാണ്ടുകള് പിന്നിടുമ്പോഴും കപ്പലുമായി ബന്ധപ്പെട്ട ഓരോ വസ്തുവിനും ലഭിക്കുന്ന വലിയ പ്രാധാന്യം ഇതിന്റെ തെളിവാണ്.
