ആകാശത്തുനിന്നും മഴപോലെ ചിലന്തികള് പെയ്തിറങ്ങുന്ന ദൃശ്യങ്ങള് അടുത്തിടെ സോഷ്യല് മീഡിയയില് വ്യാപകമായി പ്രചരിച്ചിരുന്നു. എന്നാല് ഇത് ഈ വര്ഷം നടന്ന ഒരു സംഭവമല്ല എന്നതാണ് വാസ്തവം. 2013ല് ബ്രസീലില് നടന്ന അപൂര്വ്വമായ ഒരു പ്രതിഭാസത്തിന്റെ വീഡിയോയാണ് ഇപ്പോള് വീണ്ടും വൈറലായിക്കൊണ്ടിരിക്കുന്നത്. 'അനെലോസിമസ് എക്സിമിയസ്' എന്ന ശാസ്ത്രീയ നാമത്തില് അറിയപ്പെടുന്ന 'സോഷ്യല് സ്പൈഡറുകളാണ്' ഇത്തരത്തില് ആകാശത്തുനിന്നും കൂട്ടമായി താഴേക്ക് പതിച്ചത്.
സാധാരണ ചിലന്തികളില് നിന്നും വ്യത്യസ്തമായി വലിയ കോളനികളായി ജീവിക്കുന്നവരാണ് ഇക്കൂട്ടര്. ഏകദേശം 25 അടിയോളം പൊക്കവും അഞ്ചടിയോളം വീതിയുമുള്ള പടുകൂറ്റന് വലകളാണ് ഇവര് നെയ്യുന്നത്. ആയിരക്കണക്കിന് ചിലന്തി സ്പീഷീസുകള്ക്കിടയില് വെറും 23 ഇനം മാത്രമാണ് ഇത്തരത്തില് സംഘമായി കാണപ്പെടുന്നത്. ഒരു ഭീമന് വലയ്ക്കുള്ളില് ഏകദേശം 50,000ത്തിലേറെ ചിലന്തികള് വരെ അധിവസിക്കാറുണ്ട്. ബ്രസീലിലെ സാന്റോ ആന്റണിയോ ഡ പ്ലാറ്റിനയില് ശക്തമായ കാറ്റില് ഇത്തരം കോളനികള് തകരുകയും ചിലന്തികള് കാറ്റിനൊപ്പം പറന്ന് താഴേക്ക് പതിക്കുകയുമായിരുന്നു.
തെക്കേ അമേരിക്കന് രാജ്യങ്ങളായ പനാമ, ബ്രസീല്, അര്ജന്റീന എന്നിവിടങ്ങളിലാണ് ഇവയെ പ്രധാനമായും കണ്ടുവരുന്നത്. വല നെയ്യുന്നതിലും അത് കേടുപാടുകള് കൂടാതെ സൂക്ഷിക്കുന്നതിലും ഇരയെ പിടിക്കുന്നതിലുമെല്ലാം ഇവര് പരസ്പര സഹകരണത്തോടെ പ്രവര്ത്തിക്കുന്നു. തങ്ങളുടെ വലയില് കുടുങ്ങുന്ന, ശരീരത്തേക്കാള് വലിപ്പമുള്ള ജീവികളെപ്പോലും കീഴ്പ്പെടുത്താന് ഈ കൂട്ടായ പരിശ്രമം ഇവയെ സഹായിക്കുന്നു. ചില പ്രദേശങ്ങളില് ഒരു കിലോമീറ്റര് ചുറ്റളവില് ഇത്തരം നാല്പതോളം കോളനികള് വരെ കാണാന് സാധിക്കാറുണ്ട്.
എന്തുകൊണ്ടാണ് ഇവ ഇത്തരത്തില് കൂട്ടമായി ജീവിക്കുന്നത് എന്നതിന് ഗവേഷകര് പ്രധാനമായും രണ്ട് കാരണങ്ങളാണ് ചൂണ്ടിക്കാട്ടുന്നത്. ഇവ ജീവിക്കുന്ന പ്രദേശങ്ങള് കനത്ത മഴ ലഭിക്കുന്ന ഇടങ്ങളായതിനാല് വലിയ വലകള് നശിക്കാതെ സംരക്ഷിക്കാന് വലിയൊരു സംഘത്തിന്റെ അധ്വാനം ആവശ്യമാണ്. കൂടാതെ, വലിപ്പമേറിയ ഇരകളെ പിടികൂടി ആഹാരമാക്കാന് ഒറ്റയ്ക്ക് സാധിക്കാത്തതിനാലും ഇവര് പരസഹായം തേടുന്നു. പ്രകൃതിയിലെ അതിജീവനത്തിനായി ഈ കൊച്ചു ജീവികള് നടത്തുന്ന അതിശയിപ്പിക്കുന്ന കൂട്ടായ്മയുടെ ഉദാഹരണമാണ് സോഷ്യല് സ്പൈഡറുകള്.
