മലയാളത്തിന്റെ ലേഡി സൂപ്പര്സ്റ്റാര് മഞ്ജു വാര്യര് അന്നുമിന്നും പ്രേക്ഷകരുടെ ഹൃദയത്തില് തന്റേതായ ഒരിടം നേടിയെടുത്തിട്ടുണ്ട്. സല്ലാപം എന്ന ചിത്രത്തിലൂടെ സിനിമാലോകത്തേക്ക് കടന്നുവന്ന മഞ്ജു, വളരെ വേഗത്തില് മലയാളസിനിമയുടെ മുന്നിര അഭിനേത്രികളില് ഒരാളായി. വിവാഹജീവിതത്തോടെ മലയാള സിനിമയില് നിന്ന് ഇടവേളയെടുത്ത് തീര്ത്തും കുടുംബിനിയായി ഒതുങ്ങിയ മഞ്ജു, 14 വര്ഷത്തെ ഇടവേളയ്ക്ക് ശേഷമുള്ള രണ്ടാം വരവിലും പ്രേക്ഷകഹൃദയം കീഴടക്കി.
രണ്ടാം വരവില് മലയാളത്തില് മാത്രമല്ല തമിഴിലും മഞ്ജു പ്രേക്ഷകര്ക്ക് പ്രിയങ്കരിയായി പുരസ്കാരങ്ങളും വാരിക്കൂട്ടി. അഭിനയമികവു പോലെ മഞ്ജുവിന്റെ ഫിറ്റ്നെസ്സും പ്രായത്തെ തോല്പ്പിക്കുന്ന ചുറുചുറുക്കം സൗന്ദര്യവും എപ്പോഴും ചിരിക്കുന്ന മുഖവും പ്രേക്ഷകരുടെ മനസ്സ് കീഴടക്കാറുണ്ട്. പ്രായം റിവേഴ്സ് ഗിയറില് മാത്രമോടുന്ന താരത്തിന്റെ പല ചിത്രങ്ങളും ആരാധകരെ വിസ്മയിപ്പിക്കാറുമുണ്ട്.
ഇപ്പോഴിതാ ബ്ലാക്ക് ഔട്ട്ഫിറ്റില് എലഗന്റ് ലുക്കിലുള്ള ചിത്രങ്ങള് പങ്കിടുകയാണ് മഞ്ജു വാര്യര്. ബ്ലാക്ക് എ ലൈന് ഡ്രസ്സില് കോളജ് കുമാരിയെപ്പോലെയാണ് മഞ്ജു ചിത്രങ്ങളില് തിളങ്ങുന്നത്. ചിത്രങ്ങളില് ഏറ്റവും ആകര്ഷണീയത താരത്തിന്റെ സിഗ്നേച്ചര് സ്മൈലാണ്. നിമിഷനേരം കൊണ്ട് ട്രെന്ഡിംഗായ ചിത്രങ്ങള് ഏറ്റെടുക്കുകയാണ് ആരാധകര്.
താരത്തിന്റെ ഏറ്റവും പുതിയ ചിത്രം തന്റെ കരിയറില് തീര്ത്തും വ്യത്യസ്തമായി എത്തുന്ന ‘മിസ്റ്റര് എക്സാ’ണ്. ഗൗതം വാസുദേവ മേനോന്റെ അസിസ്റ്റന്റ് ഡയരക്ടര് ആയിരുന്ന മനുവിന്റെ രണ്ടാമത്തെ സിനിമയാണ് മിസ്റ്റര് എക്സ്. ഒരു ആക്ഷന് ഹീറോയിന് വേഷത്തിലാണ് താരം ഈ ചിത്രത്തിലെത്തുന്നത്. മഞ്ജു വാര്യരെക്കൂടാതെ, ആര്യ, ശരത് കുമാർ, ഗൗതം കാർത്തിക് എന്നിവരാണ് സിനിമയിലെ കേന്ദ്ര കഥാപാത്രങ്ങള്. അതുല്യ രവി, അനഘ, റൈസ വിൽസൺ എന്നിവരാണ് മറ്റുപ്രധാന വേഷങ്ങളിൽ എത്തുന്നത്. ഏപ്രില് 17 ന് തിയേറ്ററിലെത്തിയ ചിത്രം രാജ്യത്തെ ഭീഷണിപ്പെടുത്തിയ അഞ്ച് സംഭവങ്ങൾ ഇന്റലിജൻസ് ഏജൻസികൾ തടഞ്ഞതിനെ ആസ്പദമാക്കി ഒരുക്കിയതാണ്.
