ഉത്തര്പ്രദേശിലെ ഫത്തേപൂരില് സ്കൂള് വിദ്യാര്ത്ഥിനികളെ വഴിയില് തടഞ്ഞുനിര്ത്തി ശല്യം ചെയ്ത രണ്ട് യുവാക്കളെ പോലീസ് അറസ്റ്റ് ചെയ്തു. രാവിലെ സ്കൂളിലേക്ക് പോകുകയായിരുന്ന പെണ്കുട്ടികളെ ബൈക്കിലിരുന്ന് ഹോണടിച്ചും കമന്റുകള് പറഞ്ഞും ശല്യപ്പെടുത്തിയ ഇവര്, കുട്ടികള് നടന്നുപോകുമ്പോള് ബൈക്കില് പിന്തുടരുകയും കൈയില് പിടിക്കാന് ശ്രമിക്കുകയും ചെയ്തു. സമീപത്തെ വാഹനത്തിനുള്ളിലിരുന്ന ആരോ പകര്ത്തിയ ഈ ദൃശ്യങ്ങള് സമൂഹമാധ്യമങ്ങളില് വൈറലായതോടെയാണ് ഫത്തേപൂര് പോലീസ് അന്വേഷണം നടത്തി പ്രതികളെ വലയിലാക്കിയത്.
സംഭവത്തില് അറസ്റ്റിലായ യുവാക്കള്ക്കെതിരെ കടുത്ത നടപടികളാണ് പോലീസ് സ്വീകരിച്ചത്. പ്രതികള്ക്കെതിരെ പോക്സോ നിയമപ്രകാരമാണ് കേസെടുത്തിരിക്കുന്നത്. കൂടാതെ, ഇവര് കുറ്റകൃത്യത്തിന് ഉപയോഗിച്ച മോട്ടോര് സൈക്കിള് മോട്ടോര് വാഹന നിയമത്തിലെ സെക്ഷന് 207 പ്രകാരം പോലീസ് പിടിച്ചെടുത്തു. പെണ്കുട്ടികളെ ശല്യം ചെയ്യുന്നവര്ക്കെതിരെ വിട്ടുവീഴ്ചയില്ലാത്ത നടപടിയുണ്ടാകുമെന്ന് ഫത്തേപൂര് എസ്പി അഭിമന്യു മംഗ്ലിക് വ്യക്തമാക്കി.
അറസ്റ്റിന് പിന്നാലെ പോലീസ് സ്റ്റേഷനില് നിന്നുള്ള മറ്റൊരു വീഡിയോ കൂടി പുറത്തുവന്നത് സമൂഹമാധ്യമങ്ങളില് വലിയ ചര്ച്ചയായി. ശരിയായി നടക്കാന് പോലും കഴിയാത്ത അവസ്ഥയില്, കീറിയ ഷര്ട്ടുകളുമായി സ്റ്റേഷന് പുറത്തേക്ക് വരുന്ന യുവാക്കള് തങ്ങളുടെ ചെവിയില് പിടിച്ചുകൊണ്ട് ഇനി ഒരിക്കലും തെറ്റ് ആവര്ത്തിക്കില്ലെന്ന് മാപ്പപേക്ഷിക്കുന്നത് വീഡിയോയില് കാണാം. കുറ്റവാളികള്ക്ക് കൃത്യമായ ശിക്ഷ ലഭിച്ചതില് സോഷ്യല് മീഡിയയില് വലിയ പിന്തുണയാണ് പോലീസിന് ലഭിച്ചുകൊണ്ടിരിക്കുന്നത്.
उत्तर प्रदेश : जिला फतेहपुर में बाइक सवार 2 लफंगों ने छात्राओं से खुलेआम छेड़छाड़ की, हाथ पकड़कर खींचने का प्रयास किया !!@bnetshukla pic.twitter.com/fhwmwLJEMR
— Sachin Gupta (@Sachingupta) April 20, 2026
