ഇന്ന് നമ്മുടെ തിരക്കേറിയ ജീവിതത്തിന്റെ അവിഭാജ്യ ഘടകമായി മാറിയിരിക്കുകയാണ് ഓൺലൈൻ ഫുഡ് ഡെലിവറി ആപ്പുകൾ. വീടിന്റെ സുരക്ഷിതത്വത്തിലിരുന്ന് ഭക്ഷണം ആസ്വദിക്കാൻ ഇത്തരം സേവനങ്ങൾ സഹായിക്കുമ്പോൾ, പലപ്പോഴും നാം കണക്കിലെടുക്കാത്ത ചില സുരക്ഷാ പ്രശ്നങ്ങൾ കൂടി ഇതിലുണ്ട്. സുരക്ഷിതവും എളുപ്പവുമായ സേവനമാണ് കമ്പനികൾ വാഗ്ദാനം ചെയ്യുന്നതെങ്കിലും, അപ്രതീക്ഷിതമായ ചില സംഭവങ്ങൾ ഈ വിശ്വാസത്തെ ചോദ്യം ചെയ്യുകയാണ്. അത്തരമൊരു ഞെട്ടിപ്പിക്കുന്ന സംഭവമാണ് ഇപ്പോൾ ബെംഗളൂരുവിൽ നിന്നും പുറത്തുവരുന്നത്. സ്വിഗ്ഗി ഡെലിവറി പങ്കാളി വീട്ടിൽ അതിക്രമിച്ച് കയറി യുവതിയെയും അമ്മയെയും ക്രൂരമായി മർദ്ദിക്കുന്നതിന്റെ ദൃശ്യങ്ങൾ സോഷ്യൽ മീഡിയയിൽ വലിയ ചർച്ചയാവുകയാണ്.
അനിത ജി എന്ന ഡെലിവറി പങ്കാളി വീട്ടിൽ അതിക്രമിച്ച് കയറുകയും, തന്നെയും പ്രായമായ അമ്മയെയും ശാരീരികമായി ഉപദ്രവിക്കുകയും ചെയ്തുവെന്നാണ് യുവതിയുടെ പരാതി. അക്രമത്തിനിടെ അമ്മയുടെ കൈയ്യിലുണ്ടായിരുന്ന മൊബൈൽ ഫോൺ തട്ടിയെടുക്കാനും ഇയാൾ ശ്രമിച്ചു.
ഭക്ഷണം വീടിന്റെ വാതിൽക്കൽ എത്തിക്കാൻ വിസമ്മതിച്ചതാണ് ഈ തർക്കത്തിന് തുടക്കമിട്ടതെന്ന് യുവതി എക്സ് പ്ലാറ്റ്ഫോമിൽ കുറിച്ചു. ഭക്ഷണം വാതിൽക്കൽ നൽകാൻ വിസമ്മതിച്ചതിനെത്തുടർന്ന് ഉണ്ടായ വാക്കുതർക്കം പെട്ടെന്നുതന്നെ അക്രമത്തിലേക്ക് വഴിമാറുകയായിരുന്നു. അനുവാദമില്ലാതെ ഡെലിവറി പങ്കാളി വീടിനുള്ളിലേക്ക് അതിക്രമിച്ചു കയറുകയായിരുന്നുവെന്നും യുവതി വിശദീകരിക്കുന്നു.
സംഭവം നടന്ന് മണിക്കൂറുകൾ കഴിഞ്ഞിട്ടും മൈക്കോ ലേഔട്ട് പോലീസ് സ്റ്റേഷനിൽ പരാതി നൽകാനോ എഫ്ഐആർ രജിസ്റ്റർ ചെയ്യാനോ സാധിക്കാത്ത അവസ്ഥയാണെന്ന് യുവതി പരാതിപ്പെടുന്നു. പോലീസ് സ്റ്റേഷനിൽ മണിക്കൂറുകളോളം കാത്തിരുന്നിട്ടും നടപടികൾ വൈകുന്നത് ഏറെ മാനസിക പ്രയാസം ഉണ്ടാക്കുന്നതായി അവർ പറഞ്ഞു. സോഷ്യൽ മീഡിയയിൽ പ്രചരിക്കുന്ന ഈ പോസ്റ്റിന് വലിയ തോതിലുള്ള പിന്തുണയും വിമർശനങ്ങളും ഇപ്പോൾ ഉയരുന്നുണ്ട്.
ഈ സംഭവം ഓൺലൈൻ ഡെലിവറി പ്ലാറ്റ്ഫോമുകളുടെ സുരക്ഷാ മാനദണ്ഡങ്ങളെക്കുറിച്ചുള്ള പുതിയ ചോദ്യങ്ങൾ ഉയർത്തുകയാണ്. ഡെലിവറി ജീവനക്കാരുടെ പശ്ചാത്തല പരിശോധന എത്രത്തോളം കർശനമാണെന്നും ഇത്തരം സംഭവങ്ങളിൽ പോലീസ് സ്വീകരിക്കുന്ന നിലപാടുകളും ജനങ്ങൾ ചോദ്യം ചെയ്യുന്നു. സ്വിഗ്ഗി വിഷയത്തിൽ പ്രതികരണം അറിയിച്ചിട്ടുണ്ടെങ്കിലും, കുറ്റക്കാർക്കെതിരെ ശക്തമായ നടപടി വേണമെന്നാണ് പൊതുജനങ്ങളുടെ ആവശ്യം.
