ലോകത്തെ ഏറ്റവും പ്രായമുള്ള കോഴിയെന്ന് ഗിന്നസ് റെക്കോര്ഡ് സ്വന്തമാക്കി യുഎസിലെ മെയ്ന് സ്വദേശിയായ ഫ്രാങ്ക് ട്യൂറെക്കിന്റെ ഓമനക്കോഴി ഗെര്ട്ടി. 15 വയസ്സും 100 ദിവസവും പ്രായമുള്ളപ്പോഴാണ് ഈ ഔദ്യോഗിക നേട്ടം ഗെര്ട്ടിയെ തേടിയെത്തിയത്. ടെക്സസിലെ പേള് എന്ന കോഴിയുടെ പേരിലുണ്ടായിരുന്ന മുന് റെക്കോര്ഡിനേക്കാള് ആറുമാസത്തിലധികം പ്രായം ഗെര്ട്ടിക്കുണ്ട്. വിരിഞ്ഞിറങ്ങിയ കോഴിക്കുഞ്ഞായിരിക്കുമ്പോള് ഫ്രാങ്ക് തന്റെ വീട്ടിലെത്തിച്ച ഈ 'ഗോള്ഡന് സെെ്രെബറ്റ്' ഇനം കോഴി, ഇന്ന് തന്റെ പതിനാറാം പിറന്നാള് ആഘോഷിക്കാനുള്ള തയ്യാറെടുപ്പിലാണ്.
ചെറിയ ഇനം കോഴിയാണെങ്കിലും ഫ്രാങ്കിന്റെ കോഴിക്കൂട്ടിലെ നേതാവ് ഗെര്ട്ടിയായിരുന്നു. എന്നാല് പ്രായമായതോടെ കാഴ്ച മങ്ങിയതിനെത്തുടര്ന്ന് മറ്റു കോഴികളുമായുള്ള സംഘര്ഷം ഒഴിവാക്കാന് 2024 മുതല് ഗെര്ട്ടിയെ വീടിനുള്ളിലെ പ്രത്യേക കൂട്ടിലേക്ക് മാറ്റി. മനുഷ്യരുടെ സാമീപ്യം ഏറെ ഇഷ്ടപ്പെടുന്ന ഗെര്ട്ടി, പേര് വിളിക്കുമ്പോള് ശബ്ദമുണ്ടാക്കി പ്രതികരിക്കാറുണ്ട്. പാട്ടുകള് കേള്ക്കുന്നതും ഫ്രാങ്കിനോട് സംഭാഷണത്തില് ഏര്പ്പെടുന്നതും ഗെര്ട്ടിയുടെ പ്രധാന വിനോദങ്ങളാണ്. വീടിനകത്തെ ഏകാന്ത ജീവിതത്തിലും അവള് അതീവ സന്തോഷവതിയാണെന്ന് ഫ്രാങ്ക് സാക്ഷ്യപ്പെടുത്തുന്നു.
പത്തൊന്പതാം നൂറ്റാണ്ടില് ഇംഗ്ലണ്ടില് വികസിപ്പിച്ചെടുത്ത അപൂര്വ്വമായ 'ഗോള്ഡന് സെെ്രെബറ്റ്' ഇനത്തില്പ്പെട്ടതാണ് ഗെര്ട്ടി. സ്വര്ണ്ണനിറത്തിലുള്ള തൂവലുകള്ക്കിടയിലെ കറുത്ത വരകളാണ് ഇവയെ സുന്ദരികളാക്കുന്നത്. പൂവന്കോഴികളും പിടക്കോഴികളും ഒരേപോലെയിരിക്കുന്ന 'ഹെന്ഫെതറിങ്' എന്ന സവിശേഷതയും ഈ ഇനത്തിനുണ്ട്. മനുഷ്യരുമായി വളരെ വേഗത്തില് സൗഹൃദത്തിലാകുന്ന ഇവ അതീവ ഊര്ജ്ജസ്വലരാണ്. അപൂര്വ്വമായ ഈ ഇനത്തിന്റെ പ്രത്യേകതയും ഗെര്ട്ടിയുടെ ദീര്ഘായുസ്സും ഇപ്പോള് ലോകമെമ്പാടുമുള്ള പക്ഷികളെ സ്നേഹിക്കുന്നവര്ക്കിടയില് ചര്ച്ചയായിരിക്കുകയാണ്.
