2018-ലാണ് സ്വന്തം മകളെ വിവാഹം കഴിച്ചുവെന്ന ഒരു പിതാവിന്റെ ഫെയ്സ്ബുക്ക് പോസ്റ്റ് ലോകത്തെ ഞെട്ടിച്ചത്. യുഎസിലെ ട്രാവിസ് ഫീല്ഡ്ഗ്രോവ് എന്ന വ്യക്തി തന്റെ മകളായ സമാന്തയെ വിവാഹം കഴിച്ച സംഭവം വലിയ നിയമപോരാട്ടങ്ങള്ക്കും വിവാദങ്ങള്ക്കുമാണ് വഴിവെച്ചത്. തന്റെ 17-ാം വയസ്സില് ആദ്യമായി കണ്ടുമുട്ടിയ പിതാവുമായി മൂന്ന് വര്ഷത്തിന് ശേഷമാണ് സമാന്ത വിവാഹിതയായത്. എന്നാല് രക്തബന്ധമുള്ളവര് തമ്മിലുള്ള ഈ വിവാഹം നിയമവിരുദ്ധമാണെന്ന് കണ്ടെത്തിയതോടെ ട്രാവിസ് ജയിലിലായി.
കോടതിയില് തങ്ങള് തമ്മില് രക്തബന്ധമില്ലെന്ന് ഇരുവരും വാദിച്ചിരുന്നെങ്കിലും ഡിഎന്എ പരിശോധനയില് ട്രാവിസ് സമാന്തയുടെ പിതാവാണെന്ന് ശാസ്ത്രീയമായി തെളിഞ്ഞു. ഇതോടെ മകളെ വിവാഹം കഴിച്ചതിനും ലൈംഗികാതിക്രമം നടത്തിയതിനും ട്രാവിസിനെതിരെ കോടതി കര്ശന നടപടിയെടുത്തു. പിന്നീട് 2020ല് ഇയാള് അറസ്റ്റിലായതോടെ ഈ അസ്വാഭാവിക ബന്ധത്തിന് അന്ത്യമായി. ട്രാവിസ് മുമ്പും നിരവധി ക്രിമിനല് കേസുകളില് ശിക്ഷിക്കപ്പെട്ട വ്യക്തിയായിരുന്നു.
അതിക്രമങ്ങള്ക്കും ഭീഷണികള്ക്കും പുറമെ ട്രാവിസ് വീണ്ടും ശിക്ഷിക്കപ്പെട്ട വിവരങ്ങള് പുറത്തുവരുന്നുണ്ട്. 2025 നവംബറില് മൂന്ന് വര്ഷത്തെ തടവുശിക്ഷയാണ് കോടതി പുതുതായി വിധിച്ചത്. കുട്ടികളെ ലൈംഗികമായി പീഡിപ്പിക്കല്, വ്യാജരേഖ ചമയ്ക്കല്, മദ്യപിച്ച് വാഹനമോടിക്കല് എന്നിങ്ങനെ നീണ്ട കുറ്റകൃത്യങ്ങളുടെ പട്ടിക തന്നെ ഇയാള്ക്കെതിരെയുണ്ട്. നിലവില് തടവില് കഴിയുന്ന ട്രാവിസുമായി തനിക്ക് യാതൊരു ബന്ധവുമില്ലെന്ന് സമാന്ത ഇപ്പോള് വ്യക്തമാക്കുന്നു.
ഭീകരമായ ആ കാലഘട്ടത്തില് നിന്ന് മോചിതയായ സമാന്ത ഇപ്പോള് തന്റെ പുതിയ ജീവിതത്തെക്കുറിച്ച് സോഷ്യല് മീഡിയയില് കുറിപ്പ് പങ്കുവെച്ചിരിക്കുകയാണ്. നിലവില് നെബ്രാസ്കയിലെ ഒരു ഗ്രാമത്തില് മകള്ക്കും പ്രതിശ്രുത വരനുമൊപ്പമാണ് സമാന്ത താമസിക്കുന്നത്. ട്രാവിസുമായുള്ള ബന്ധം പൂര്ണ്ണമായും അവസാനിച്ചുവെന്നും അടുത്ത വര്ഷം താന് വിവാഹിതയാകുമെന്നും അവര് അറിയിച്ചു. വിചിത്രമായ ഒരു പീഡനകഥയുടെ ഇര എന്ന നിലയില് നിന്ന് സാധാരണ ജീവിതത്തിലേക്ക് മടങ്ങുകയാണ് സമാന്തയിപ്പോള്.
