സമുദ്രത്തിലൂടെ നീന്തുന്നതിനിടെ അപ്രതീക്ഷിതമായി ഒരു കടലാമയില് നിന്ന് തല്ലുകിട്ടിയ അനുഭവം പങ്കുവെച്ചിരിക്കുകയാണ് പ്രമുഖ ട്രാവല് വ്ലോഗര് ക്രിസ്റ്റഫര് ചാങ്ങ്. സാധാരണയായി മനുഷ്യരെ കണ്ടാല് ഒഴിഞ്ഞുമാറി പോകാറുള്ള കടലാമകളില് നിന്ന് വ്യത്യസ്തമായി, ഈ ആമ തന്നെ ദൂരെ മാറി നിന്ന് നിരീക്ഷിക്കുന്നുണ്ടായിരുന്നുവെന്ന് ചാങ്ങ് പറയുന്നു. ഒടുവില് ചാങ്ങിന് നേരെ നീന്തി വന്ന ആമ അദ്ദേഹത്തിന്റെ മുഖത്ത് പതുക്കെ ഒന്ന് 'തല്ലിയ' ശേഷം ഒന്നുമറിയാത്ത ഭാവത്തില് നീന്തിപ്പോവുകയായിരുന്നു.
കടലിനടിയിലെ ഈ വിചിത്രമായ പെരുമാറ്റം തന്നെ അമ്പരപ്പിച്ചുവെന്ന് ചാങ്ങ് ഇന്സ്റ്റഗ്രാമില് പങ്കുവെച്ച വീഡിയോയില് പറയുന്നു. വന്യജീവികളുടെ എനര്ജി നമുക്ക് തിരിച്ചറിയാന് സാധിക്കുമെന്നും, ഈ ആമ തുടക്കം മുതലേ തന്നെ തുറിച്ചുനോക്കി പ്രകോപനപരമായ രീതിയിലാണ് പെരുമാറിയതെന്നും അദ്ദേഹം വ്യക്തമാക്കി. ആമയുടെ ഭാഗത്തുനിന്നും അപ്രതീക്ഷിത നീക്കം ഉണ്ടായതോടെ പന്തികേട് തോന്നി താന് ഉടന് തന്നെ ബോട്ടിലേക്ക് മടങ്ങിയതായും അദ്ദേഹം കൂട്ടിച്ചേര്ത്തു.
സോഷ്യല് മീഡിയയില് പത്തുലക്ഷത്തിലധികം ആളുകളാണ് ഈ വീഡിയോ ഇതുവരെ കണ്ടത്. 'മറ്റൊരാളുടെ വീട്ടില് അനുവാദമില്ലാതെ കയറി വീഡിയോ എടുത്താല് ഇങ്ങനെയൊക്കെ ഇരിക്കും' എന്നും 'മിണ്ടാതിരിക്കാനാണ് ആമ തല്ലിയത്' എന്നുമൊക്കെയുള്ള രസകരമായ കമന്റുകളാണ് വീഡിയോയ്ക്ക് താഴെ വരുന്നത്. തങ്ങള്ക്കും കടലിനടിയില് സമാനമായ അനുഭവങ്ങള് ഉണ്ടായിട്ടുണ്ടെന്ന് നിരവധി ഡൈവിംഗ് പ്രേമികള് വീഡിയോയ്ക്ക് താഴെ കുറിച്ചു.
