കാന്സര് ബാധിതയായ ഭാര്യയുടെ ചികിത്സയ്ക്ക് ഐക്യദാര്ഢ്യം പ്രഖ്യാപിച്ച് ഭര്ത്താവ് സ്വന്തം തല മുണ്ഡനം ചെയ്ത വാര്ത്തയാണ് ഇപ്പോള് സോഷ്യല് മീഡിയയില് തരംഗമാകുന്നത്. കീമോതെറാപ്പിയെത്തുടര്ന്ന് മുടി കൊഴിഞ്ഞു തുടങ്ങിയ നമ്രത നിതിന് ഗോയല്, വേദന അസഹനീയമായതോടെയാണ് മുടി മുറിക്കാന് തീരുമാനിച്ചത്. മുടി മുറിക്കുന്നതില് തന്നെ സഹായിച്ച ഭര്ത്താവ്, തൊട്ടുപിന്നാലെ തന്നെ തന്റെ മുടിയും നീക്കം ചെയ്ത് ഭാര്യയോടുള്ള സ്നേഹവും പിന്തുണയും പ്രകടിപ്പിക്കുകയായിരുന്നു.
രണ്ടാമത്തെ കീമോതെറാപ്പിക്ക് ശേഷം മുടി കൊഴിയുന്നതിനൊപ്പം തലയോട്ടിയില് അനുഭവപ്പെട്ട കഠിനമായ വേദനയെക്കുറിച്ച് നമ്രത ഇന്സ്റ്റാഗ്രാമിലൂടെ പങ്കുവെച്ചിരുന്നു. വൈകാരികമായി ഈ മാറ്റത്തെ നേരിടുക പ്രയാസകരമായിരുന്നുവെന്നും എന്നാല് ആ പ്രതിസന്ധിയില് ഭര്ത്താവ് തനിക്കൊപ്പം നിന്നത് വലിയ ആശ്വാസമായെന്നും അവര് കുറിച്ചു. ഭര്ത്താവ് തന്നെ തല മൊട്ടയടിക്കാന് സഹായിക്കുന്നതിനൊപ്പം അദ്ദേഹം സ്വന്തം മുടി മുറിക്കുന്ന വീഡിയോയും നമ്രത പങ്കുവെച്ചു.
സമൂഹമാധ്യമങ്ങളില് പങ്കുവെച്ച ഈ വീഡിയോ നിമിഷങ്ങള്ക്കകം വൈറലായി. സ്നേഹത്തിനും സൗഹൃദത്തിനും അപ്പുറമുള്ള ഈ ദാമ്പത്യത്തെ പ്രശംസിച്ചുകൊണ്ട് ആയിരക്കണക്കിന് ആളുകളാണ് രംഗത്തെത്തിയത്. ഇരുവരും ഒരു മികച്ച ടീമാണെന്നും രോഗത്തെ അതിജീവിച്ച് സന്തോഷകരമായ ജീവിതത്തിലേക്ക് വേഗത്തില് തിരിച്ചുവരാന് സാധിക്കട്ടെയെന്നും സോഷ്യല് മീഡിയ ഉപയോക്താക്കള് ആശംസിച്ചു. കുടുംബം എന്നാല് പ്രയാസകാലത്ത് ഒപ്പം നില്ക്കുന്നതാണെന്ന വലിയ സന്ദേശമാണ് ഈ ദൃശ്യങ്ങള് നല്കുന്നത്.
