കൊല്ലം: പാലരുവി എക്സ്പ്രസില് ആറു വയസുകാരിയെ പീഡിപ്പിക്കാന് ശ്രമിച്ച പ്രതിയെ പിടികൂടാന് സഹായകമായത് സഹയാത്രികയായ യുവതിയുടെ ഇടപെടല്. കൊട്ടാരക്കര കോട്ടത്തല സ്വദേശിനി വി.എസ്. വീണയുടെ ധീരമായ ഇടപെടലാണ് പ്രതിയെ നിയമത്തിനു മുന്നിലെത്തിച്ചത്. സംഭവത്തില് കൊല്ലം അയത്തില് സ്വദേശി ഡാനിഷി(46)നെയാണ് പുനലൂര് റെയില്വേ പോലീസ് അറസ്റ്റ് ചെയ്തത്.
പുനലൂര്-ചെങ്കോട്ട യാത്രയ്ക്കിടെ കഴിഞ്ഞദിവസം പുലര്ച്ചെ ഒന്നരയോടെയായിരുന്നു സംഭവം. മുത്തച്ഛനോടൊപ്പം തീര്ഥാടനത്തിനു പോയി മടങ്ങുകയായിരുന്നു പെണ്കുട്ടി. ജനറല് കമ്പാര്ട്ട്മെന്റിലെ യാത്രക്കാര് ഉറക്കമായതോടെയാണ് തറയില് ബന്ധുക്കളോടൊപ്പം കിടന്നിരുന്ന കുട്ടിയെ പ്രതി എടുത്ത് മടിയിലിരുത്തിയത്. അമ്മയുടെ ചികിത്സാര്ത്ഥം യാത്ര ചെയ്യുകയായിരുന്ന വീണയ്ക്ക് പ്രതിയുടെ പെരുമാറ്റത്തില് തുടക്കം മുതലേ സംശയം തോന്നിയിരുന്നു. പ്രതി ശല്യപ്പെടുത്തിയതിനെത്തുടര്ന്ന് ഉറക്കം മതിയാക്കി ഇവര് ഇയാളെ നിരീക്ഷിച്ചു.
കുട്ടിയെ മടിയിലിരുത്തി ഉപദ്രവിക്കാന് ശ്രമിക്കുന്നത് കണ്ടതോടെ വീണ മൊബൈലില് ദൃശ്യങ്ങള് പകര്ത്തി. തുടര്ന്ന് ബഹളമുണ്ടാക്കി കുട്ടിയെ രക്ഷിക്കുകയും മാതാപിതാക്കളെയും മറ്റു യാത്രക്കാരെയും വിവരം അറിയിക്കുകയുമായിരുന്നു. കുട്ടി തന്റെ ബന്ധുവാണെന്നാണ് പ്രതി ആദ്യം പറഞ്ഞത്. എന്നാല്, പകര്ത്തിയ ദൃശ്യങ്ങള് കാണിച്ചതോടെ പ്രതിക്ക് മറുപടി ഇല്ലാതായി. ആ ദേഷ്യത്തില് വീണ പ്രതിയുടെ മുഖത്തടിക്കുകയും ചെയ്തു. അപ്പോഴേക്കും മറ്റുള്ളവരും ഇടപെട്ടു.
തക്കസമയത്ത് പ്രതികരിക്കാന് കഴിഞ്ഞതുകൊണ്ട് മാത്രമാണ് കുട്ടിയെ രക്ഷിക്കാനായതെന്നു വീണ പറഞ്ഞു. വീണ കൈമാറിയ ദൃശ്യങ്ങളുടെ അടിസ്ഥാനത്തില് പുനലൂര് റെയില്വേ പോലീസ് പ്രതിയെ പിടികൂടി റിമാന്ഡ് ചെയ്തു. യുവതിയുടെ അവസരോചിതമായ ഇടപെടലും ജാഗ്രതയുമാണ് പ്രതിയെ പിടികൂടാന് സഹായിച്ചതെന്നു പോലീസ് പറഞ്ഞു.
