ലോകത്തിലെ ഏറ്റവും പഴക്കമുള്ള ഒന്നേതെന്ന ചോദ്യത്തിന് സൂര്യനോ ഭൂമിയോ എന്നാകും പലരുടെയും ഉത്തരം. എന്നാല് നമ്മെ വിസ്മയിപ്പിച്ചുകൊണ്ട്, ഭൂമിയേക്കാളും സൂര്യനേക്കാളും പഴക്കം നമ്മുടെ കുടിവെള്ളത്തിനുണ്ടെന്ന് ആധുനിക ജ്യോതിശാസ്ത്രം വെളിപ്പെടുത്തുകയാണ്. ഭൂമിയിലെ ജലത്തിന്റെ വലിയൊരു ഭാഗം നമ്മുടെ സൗരയൂഥം രൂപപ്പെടുന്നതിനും കോടിക്കണക്കിന് വര്ഷങ്ങള്ക്ക് മുമ്പ് ബഹിരാകാശത്ത് നിലനിന്നിരുന്നവയാണ്.
സൗരയൂഥം രൂപപ്പെടുന്നതിന് മുന്പ് ഈ പ്രദേശം 'തന്മാത്രാ മേഘങ്ങള്' എന്ന് വിളിക്കപ്പെടുന്ന വാതകപൊടിപടലങ്ങളാല് നിറഞ്ഞിരുന്നു. അതിശൈത്യം നിലനിന്നിരുന്ന ഈ മേഘങ്ങളില് വെള്ളം ഐസ് രൂപത്തില് അടങ്ങിയിരുന്നു. സൂര്യന്റെ ഉദയത്തിന് എത്രയോ മുന്പേ ബഹിരാകാശത്തിന്റെ ശൂന്യതയില് ജലതന്മാത്രകള് പിറവിയെടുത്തു കഴിഞ്ഞിരുന്നു എന്നാണ് ശാസ്ത്രീയ പഠനങ്ങള് വ്യക്തമാക്കുന്നത്.
ജലത്തിന്റെ പഴക്കം നിര്ണ്ണയിക്കാന് ശാസ്ത്രജ്ഞര് പ്രധാനമായും ആശ്രയിച്ചത് 'ഹെവി വാട്ടര്' എന്ന പ്രത്യേക തന്മാത്രയെയാണ്. സാധാരണ ഹൈഡ്രജനു പകരം അതിന്റെ ഭാരമേറിയ രൂപമായ ഡ്യൂട്ടീരിയം അടങ്ങിയതാണ് ഇവ. ബഹിരാകാശത്തെ കഠിനമായ തണുപ്പില് രൂപംകൊള്ളുന്ന ജലത്തിലാണ് ഡ്യൂട്ടീരിയത്തിന്റെ അളവ് കൂടുതലായി കാണപ്പെടുന്നത്. ഭൂമിയിലെ ജലത്തെ 'ഇന്റര്സ്റ്റെല്ലാര് ഐസുമായി' താരതമ്യം ചെയ്തപ്പോള് അവ തമ്മിലുള്ള സമാനമായ രാസഘടന ഈ കണ്ടെത്തലിന് അടിവരയിട്ടു.
ഏകദേശം 4.6 ബില്യണ് വര്ഷങ്ങള്ക്ക് മുന്പ് വാതകങ്ങളുടെയും പൊടിയുടെയും കൂട്ടിയിടിയിലൂടെ സൂര്യന് രൂപം കൊണ്ടപ്പോള് ഉണ്ടായ കൊടിയ ചൂടില് വലിയ അളവ് ജലം നശിപ്പിക്കപ്പെട്ടിരുന്നു. എങ്കിലും, അന്തരീക്ഷത്തിലുണ്ടായിരുന്ന മഞ്ഞിന്റെ 30 മുതല് 50 ശതമാനം വരെ നശിക്കാതെ അതിജീവിച്ചു എന്ന് പഠനങ്ങള് സൂചിപ്പിക്കുന്നു. ഈ അതിജീവനമാണ് സൗരയൂഥത്തിലെ ഏറ്റവും പഴയ വസ്തുവായി ജലത്തെ മാറ്റിയത്.
പിന്നീട് ഈ ഇന്റര്സ്റ്റെല്ലാര് ഐസ് വാല്നക്ഷത്രങ്ങളുടെയും ഛിന്നഗ്രഹങ്ങളുടെയും ഭാഗമായി മാറുകയും, അവ ഭൂമിയില് പതിച്ചതിലൂടെ ജലം ഇവിടെ എത്തുകയും ചെയ്തു. നമ്മുടെ സമുദ്രങ്ങളിലുള്ള വെള്ളത്തിന്റെ നല്ലൊരു ശതമാനം ഇത്തരത്തില് ബഹിരാകാശത്ത് നിന്ന് വന്നതാണ്. ജീവന്റെ അടിസ്ഥാന ഘടകങ്ങള് ഭൂമിയില് മാത്രം ഉണ്ടായതല്ലെന്നും, അവ പ്രപഞ്ചത്തിന്റെ പുരാതനമായ ചരിത്രവുമായി അഭേദ്യമായി ബന്ധപ്പെട്ടിരിക്കുന്നുവെന്നും ഈ കണ്ടെത്തല് നമ്മെ ഓര്മ്മിപ്പിക്കുന്നു.
