മലയാള സിനിമ പ്രേക്ഷകർക്ക് കരുത്തുറ്റ ഒരുപാട് കഥാപാത്രങ്ങളെ സമ്മാനിച്ച് പ്രേക്ഷകമനസ്സ് കീഴടക്കിയ താരമാണ് സുരേഷ് ഗോപി. സിനിമകളിൽ നിന്ന് മാറി രാഷ്ട്രീയത്തിൽ ഇറങ്ങിയ ശേഷം ഭാരതീയ ജനതാ പാർട്ടിയിൽ താരം അംഗമായി.
പിന്നീട് 2016 ഏപ്രിലിൽ രാജ്യസഭാ എം പി ആവുകയും ചെയ്ത താരം ഒരു കേന്ദ്രമന്ത്രി കൂടിയാണിപ്പോൾ. രാഷ്ട്രീയത്തിലും സിനിമയിലും ഒരുപോലെ തിളങ്ങി നില്ക്കുന്ന താരം സോഷ്യല് മീഡിയയിലും സജീവമാണ്.
ഇപ്പോഴിതാ 182 മീറ്റർ ഉയരമുള്ള സർദാർ വല്ലഭായ് പട്ടേലിന്റെ പ്രതിമയ്ക്ക് മുന്നിലൂടെ നടന്നു വരുന്ന തന്റെ ചിത്രം പങ്കിടുകയാണ് സുരേഷ് ഗോപി. ഗുജറാത്തിലെ സർദാർ സരോവർ ഡാമിന് സമീപം സ്ഥിതി ചെയ്യുന്ന ലോകത്തിലെ ഏറ്റവും വലിയ പ്രതിമയായ സ്റ്റാച്യു ഓഫ് യൂണിറ്റി സന്ദർശിച്ച ചിത്രമാണ് താരം പങ്കിട്ടിരിക്കുന്നത്.
‘‘ഇതിഹാസങ്ങൾ ഒരിക്കലും മങ്ങുന്നില്ല; അവ ഉയർന്നുനിൽക്കുന്നു....’’ എന്ന ക്യാപ്ഷന് നല്കിയാണ് സുരേഷ്ഗോപി ചിത്രം പങ്കിട്ടിരിക്കുന്നത്. നിമിഷങ്ങൾക്കകം തന്നെ ആരാധകർ കമന്റ് ബോക്സിൽ ആവേശകരമായ പ്രതികരണങ്ങളുമായി എത്തി. ‘ഇന്ത്യയെ ഒരുമിപ്പിച്ച സർദാറിന് മുന്നിൽ, സ്നേഹം കൊണ്ട് ജനങ്ങളെ ഒരുമിപ്പിക്കുന്ന നമ്മുടെ സ്വന്തം SG, ഉരുക്കുമനുഷ്യന്റെ കൂടെ ഉറപ്പോടെ സുരേഷ് ഗോപി ജി, ഗോപി ഏട്ടന് തൂക്കി, സിംഗം ഈസ് ബാക്ക്...’ എന്നതടക്കമാണ് കമന്റുകള്.
ഏക്താ നഗറിൽ എത്തിയ താരം സര്ദാര് വല്ലഭായ് പട്ടേലിന്റെ ഐക്യത്തെക്കുറിച്ചുള്ള ദർശനത്തെ പ്രശംസിച്ചുകൊണ്ട് ചരിത്രപരവും അവിസ്മരണീയവുമായ ദിവസമാണിതെന്ന് വിശേഷിപ്പിക്കുകയും ചെയ്തു.
