നേപ്പാളിലെ പ്രശസ്ത വിനോദസഞ്ചാര കേന്ദ്രമായ സൗരഹയില് രണ്ട് ഒറ്റക്കൊമ്പന് കാണ്ടാമൃഗങ്ങള് പൊതുനിരത്തില് ഏറ്റുമുട്ടിയത് പ്രദേശവാസികളെയും വിദേശ വിനോദസഞ്ചാരികളെയും ഒരുപോലെ അമ്പരപ്പിച്ചിരിക്കുകയാണ്. ചിത്വാന് നാഷണല് പാര്ക്കിന്റെ അതിര്ത്തിയിലുള്ള ജനവാസ മേഖലയിലേക്ക് ഇരച്ചുകയറിയ മൃഗങ്ങള്, റോഡരികില് തടിച്ചുകൂടിയ ആളുകളെ സാക്ഷിയാക്കിയാണ് ഉഗ്രന് പോരാട്ടം നടത്തിയത്. വന്യജീവി സഫാരിക്ക് പേരുകേട്ട ഈ പ്രദേശത്ത് വച്ച് കാണ്ടാമൃഗങ്ങള് പരസ്പരം കരുത്ത് തെളിയിക്കാന് ശ്രമിക്കുന്നതിന്റെ ദൃശ്യങ്ങള് സമൂഹമാധ്യമങ്ങളില് നിമിഷ നേരങ്ങള്കൊണ്ടാണ് വൈറലായത്.
തങ്ങളുടെ ആധിപത്യം ഉറപ്പിക്കാനോ ഇണയെ സ്വന്തമാക്കാനോ വേണ്ടിയുള്ള 'അതിര്ത്തി തര്ക്ക'മാണ് ഈ പോരാട്ടത്തിന് പിന്നിലെന്ന് വന്യജീവി വിദഗ്ധര് വിലയിരുത്തുന്നു. സാധാരണഗതിയില് വനത്തിനുള്ളില് നടക്കുന്ന ഇത്തരം ഏറ്റുമുട്ടലുകള് മനുഷ്യര്ക്ക് ഇത്ര അടുത്തുനിന്ന് കാണാന് സാധിക്കുന്നത് അപൂര്വ്വമാണ്. സംഭവത്തിന് സാക്ഷിയായ ഒരു സഞ്ചാരി ഇന്സ്റ്റാഗ്രാമില് കുറിച്ചതുപോലെ, വന്യജീവികളെ തേടി കാട്ടിലേക്ക് പോകുന്നവര്ക്ക് മുന്നിലേക്ക് വന്യത നേരിട്ട് തെരുവിലേക്ക് എത്തിയ കാഴ്ച ഭയവും അത്ഭുതവും ഉളവാക്കുന്നതായിരുന്നു. ഭാഗ്യവശാല് ഈ സംഭവത്തില് ആര്ക്കും പരിക്കേറ്റിട്ടില്ല.
സംഭവം വന്തോതില് പ്രചരിച്ചതോടെ, വന്യജീവികളെ കാണുമ്പോള് പാലിക്കേണ്ട സുരക്ഷാ മുന്കരുതലുകളെക്കുറിച്ച് അധികൃതര് കര്ശന മുന്നറിയിപ്പ് നല്കി. മൃഗങ്ങളെ പ്രകോപിപ്പിക്കാനോ ചിത്രങ്ങള് പകര്ത്താനായി അവയുടെ അടുത്തേക്ക് പോകാനോ ശ്രമിക്കരുതെന്ന് വന്യജീവി വകുപ്പ് ഉദ്യോഗസ്ഥര് നിര്ദ്ദേശിച്ചു. ഇത്തരം സന്ദര്ഭങ്ങളില് വന്യമൃഗങ്ങളുടെ പെരുമാറ്റം പ്രവചനാതീതമായിരിക്കുമെന്നും, മനുഷ്യരുടെയും മൃഗങ്ങളുടെയും സുരക്ഷയ്ക്കായി കൃത്യമായ അകലം പാലിക്കുന്നത് അനിവാര്യമാണെന്നും അധികൃതര് ഓര്മ്മിപ്പിച്ചു.
