കോട്ടയം: നീറ്റ് ചോര്ച്ചയ്ക്കെതിരേ ദേശീയ വ്യാപകമായി എന്.എസ്.യു. സമരം നടത്തിയപ്പോള് മുഖ്യമന്ത്രി ചര്ച്ചയില് മിണ്ടാനാകാതെ സംസ്ഥാനത്തെ കെ.എസ്.യു. നേതൃത്വം. എസ്.എഫ്.ഐ. സംസ്ഥാന വ്യാപകമായി കേന്ദ്ര ഓഫീസുകളിലേക്കു മാര്ച്ച് നടത്തിയപ്പോള് കെ.എസ്.യുവിന് ഒരു പ്രസ്താവന പോലും പുറത്തിറക്കാന് കഴിഞ്ഞില്ല. ലോക്സഭയിലെ പ്രതിപക്ഷ നേതാവ് രാഹുല് ഗാന്ധിയാണ് നീറ്റ് ചോദ്യക്കടലാസ് ചോര്ച്ചയ്ക്കെതിരേ ശക്തമായ പ്രതിഷേധവുമായി ആദ്യം രംഗത്തുവന്നത്.
ദേശീയ വ്യാപകമായി കേന്ദ്ര സര്ക്കാരിനെതിരേ പ്രക്ഷോഭം നടത്തുമെന്ന് എന്.എസ്.യു. ആഹ്വാനം ചെയ്യുകയും ചെയ്തിരുന്നു. എന്നാല് കേരളത്തില്മാത്രം കോണ്ഗ്രസ് നേതാക്കളോ യൂത്ത് കോണ്ഗ്രസ് നേതാക്കളോ കെ.എസ്.യു. നേതാക്കളോ പ്രതികരിച്ചില്ല. കെ.എസ്.യു. സംസ്ഥാന അധ്യക്ഷന് അലോഷ്യസ് സേവ്യര് മുഖ്യമന്ത്രി തര്ക്കത്തില് കെ.സി. വേണുഗോപാല് പക്ഷത്താണ്. സാമൂഹിക മാധ്യമങ്ങളില് കെ.സി. വേണുഗോപാലിനെ അനുകൂലിച്ച് പോസ്റ്റ് ഇടുകയും ചെയ്തിരുന്നു. കെ.എസ്.യുവിന്റെ മറ്റ് ഭാരവാഹികളില് ഒരു വിഭാഗം വി.ഡി. സതീശനൊപ്പവും മറ്റു ചിലര് രമേശ് ചെന്നിത്തല പക്ഷത്തുമാണ്. മുഖ്യമന്ത്രി തര്ക്കത്തില് കെ.എസ്.യു. പോലും മൂന്നു തട്ടിലായതോടെയാണ് യോജിച്ചൊരു പരിപാടി നടത്താന് കെ.സ്.യുവിനു കഴിയാതിരിക്കുന്നത്. സമാനമായ സാഹചര്യമാണു കോണ്ഗ്രസിനും യൂത്ത് കോണ്ഗ്രസിനും മറ്റു പോഷക സംഘടനകള്ക്കുമുള്ളത്.
പത്തു വര്ഷം സമരം നടത്താതിരുന്ന എസ്.എഫ്.ഐ, എല്ലാ ജില്ലകളിലും ആലസ്യം വിട്ടുണര്ന്ന് ശക്തമായ സമരത്തിനിറങ്ങി. പോലീസുമായി പലയിടത്തും ഏറ്റുമുട്ടലും നടത്തിയത്. കേന്ദ്ര സര്ക്കാരിനെതിരേയുള്ള സമരത്തിന്റെ ഭാഗമായിട്ടാണ് ഇന്നലെ എല്ലാ കേന്ദ്ര ഓഫീസുകള്ക്കു മുമ്പിലും എസ്.എഫ്.ഐ. സമരം നടത്തിയതെങ്കിലും പോലീസിനെതിരേയുള്ള വെല്ലുവിളികൂടിയായിരുന്നു സമരം. യു.ഡി.എഫ്. സര്ക്കാരിനെതിരേയുള്ള സമരത്തിന്റെ തുടക്കമെന്ന നിലയിലായിരുന്നു നേതാക്കളുടെ പ്രസംഗം.
