ന്യൂഡല്ഹി: ഇന്ത്യയില് ഇന്ധനവില വര്ദ്ധിപ്പിച്ചിട്ടും എണ്ണക്കമ്പനികള്ക്ക് 500 കോടിയുടെ നഷ്ടം ഉണ്ടാകുന്നെന്നും പെട്രോളിനും ഡീസലിനും ഇനിയും വില കൂടിയേക്കുമെന്നും റിപ്പോര്ട്ട്. പെട്രോള്, ഡീസല് വിലയില് ലിറ്ററിന് 3 രൂപയാണ് വര്ദ്ധിപ്പിച്ചത്.
വരും ദിവസങ്ങളില് ഇനിയും വില വര്ദ്ധനവ് ഉണ്ടായേക്കുമെന്നാണ് സൂചന. വിലവര്ദ്ധനവ് എണ്ണ വിപണന കമ്പനികള്ക്ക് ഭാഗികമായ ആശ്വാസം മാത്രമാണ് നല്കുന്നത്. ഇതോടെ ദേശീയ തലസ്ഥാനമായ ഡല്ഹിയില് പെട്രോള് വില ലിറ്ററിന് 94.77 രൂപയില് നിന്ന് 97.77 രൂപയായി ഉയര്ന്നു. ഡീസല് വില ലിറ്ററിന് 89.67 രൂപയില് നിന്ന് 90.67 രൂപയായും വര്ദ്ധിച്ചു. ഈ വര്ദ്ധനവോടെ മുംബൈ, കൊല്ക്കത്ത, ചെന്നൈ ഉള്പ്പെടെയുള്ള നിരവധി നഗരങ്ങളില് ഇന്ധനവില 100 രൂപ കടന്നു.
ആഗോള വിപണിയില് ക്രൂഡ് ഓയിലിനുണ്ടായ വന് വിലവര്ദ്ധനവാണ് നിലവിലെ ആഭ്യന്തര ഇന്ധനവില വര്ദ്ധനവിന് കാരണമെന്നാണ് റിപ്പോര്ട്ടുകള് സൂചിപ്പിക്കുന്നത്. ഇത് വിപണിയില് പണപ്പെരുപ്പത്തിന് കാരണമായേക്കാമെങ്കിലും, ദീര്ഘകാലാടിസ്ഥാനത്തില് ഇത് ഇലക്ട്രിക് വാഹനങ്ങളിലേക്കുള്ള മാറ്റത്തിന് വേഗത കൂട്ടുകയും ഇറക്കുമതിയെ ആശ്രയിക്കുന്നത് കുറയ്ക്കുകയും ചെയ്യുമെന്നും പറയുന്നു.
റീട്ടെയ്ല് വിലയില് വരുത്തിയ 3 രൂപയുടെ ചെറിയ വര്ദ്ധനവ് എണ്ണ വിപണന കമ്പനികള്ക്ക് വളരെ പരിമിതമായ ആശ്വാസം മാത്രമാണ് നല്കുന്നതെന്നാണ് ബിസിനസ് വിദഗ്ദ്ധര് പറയുന്നത്. ഇറാന് ഉള്പ്പെടുന്ന പശ്ചിമേഷ്യയിലെ നിലവിലുള്ള ഭൗമരാഷ്ട്രീയ സംഘര്ഷങ്ങള് ആഗോള എണ്ണവിലയെ സാരമായി ബാധിച്ചിട്ടുണ്ട്. ഇന്ധനത്തിനായി ഇറക്കുമതിയെ പ്രധാനമായി ആശ്രയിക്കുന്ന രാജ്യമെന്ന നിലയില്, ഇന്ത്യയ്ക്ക് ഇതോടെ ഇറക്കുമതിച്ചെലവ് വര്ദ്ധിക്കുകയും ഇത് ആഭ്യന്തര ഇന്ധനവിലയെ സമ്മര്ദ്ദത്തിലാക്കുകയും ചെയ്തു.
പണപ്പെരുപ്പം നിയന്ത്രിക്കുന്നതിനും സാമ്പത്തിക സ്ഥിരത നിലനിര്ത്തുന്നതിനും ഈ സംഘര്ഷങ്ങള് തുടരുകയാണെങ്കില് പെട്രോള്, ഡീസല് വിലകള് ഇനിയും വര്ദ്ധിപ്പിക്കേണ്ടി വരുമെന്ന് റിസര്വ് ബാങ്ക് ഓഫ് ഇന്ത്യ പറയുന്നത്.
