സംസ്ഥാനത്തെ നിര്മ്മാണ മേഖലയിലടക്കം തൊഴിലാളി ക്ഷാമം രൂക്ഷമാകുന്നു. അതിഥി തൊഴിലാളികള് കൂട്ടത്തോടെ വോട്ട് ചെയ്യാനായി സ്വദേശങ്ങളിലേക്ക് പോയി മടങ്ങിയെത്താത്തതാണ് പ്രതിസന്ധിക്ക് കാരണം.
നിര്മ്മാണ മേഖലക്ക് പുറമേ ഹോട്ടല്, പ്ലൈവുഡ് തുടങ്ങി മേഖലകളേയും പ്രതിസന്ധി ബാധിച്ചിട്ടുണ്ട്. സംസ്ഥാനത്തെ നിര്മ്മാണ മേഖലയില് തൊണ്ണൂറ് ശതമാനത്തിലേറെയും ജോലി ചെയ്യുന്നത് അതിഥി തൊഴിലാളികളാണ്.
ബംഗാള്, ബീഹാര് എന്നിവിടങ്ങളില് നിന്നുള്ളവരാണ് ഇതില് കൂടുതലും. വോട്ട് ചെയ്യാനായി ബംഗാളിലേക്ക് മിക്കവരും പോയത് ഏപ്രില് ആദ്യ വാരം. അന്നു തൊട്ട് നിര്മ്മാണ മേഖലയുടെ താളം തെറ്റി. ഒന്നരമാസത്തിലേറെയായി ആ പ്രതിസന്ധി തുടരുകയാണ്. കരാറുകാര് തൊഴിലാളികളെ ബന്ധപ്പെടുന്നുണ്ടെങ്കിലും എപ്പോള് മടങ്ങിയെത്തുമെന്ന കാര്യത്തില് അനിശ്ചിതത്ത്വമുണ്ട്. ഇതിൽ ചെറുകിട കരാറുകാരാണ് ഏറെ പ്രതിസന്ധിയിലായിരിക്കുന്നത്.
