ഡല്ഹി റെയില്വേ സ്റ്റേഷനില് വെച്ച് ഇന്തൊനീഷ്യന് യുവതിയുടെ ദുപ്പട്ട റെയില്വേ ട്രാക്കിലേക്ക് വീണപ്പോള്, സ്വന്തം ജീവന് പോലും വകവെക്കാതെ അത് എടുത്തു നല്കിയ ഇന്ത്യന് യുവാവാണ് ഇപ്പോള് സോഷ്യല് മീഡിയയിലെ താരം. ഇന്തൊനീഷ്യയിലെ പ്രമുഖ സോഷ്യല് മീഡിയ ഇന്ഫ്ലുവന്സറായ 'ഇന്ദഹ' എന്ന യുവതി ഇന്സ്റ്റഗ്രാമില് പങ്കുവെച്ച ഈ റിയല് ലൈഫ് ബോളിവുഡ് ദൃശ്യങ്ങള് ഇതിനോടകം കോടിക്കണക്കിന് ആളുകളാണ് കണ്ടുകഴിഞ്ഞത്.
റെയില്വേ സ്റ്റേഷനില് നിര്ത്തിയിട്ടിരുന്ന ട്രെയിന്റെ വാതിലിന് സമീപം നില്ക്കുകയായിരുന്നു ഇന്ദഹ. ഈ സമയം പെട്ടെന്നുണ്ടായ കാറ്റില് യുവതിയുടെ ദുപ്പട്ട പറന്ന് പ്ലാറ്റ്ഫോമിനും ട്രെയിനിനും ഇടയിലുള്ള വിടവിലൂടെ ട്രാക്കിലേക്ക് വീഴുകയായിരുന്നു. കൈയില് സെല്ഫി സ്റ്റിക്ക് ഉണ്ടായിരുന്നതിനാല് യുവതിക്ക് ദുപ്പട്ട പിടിക്കാന് കഴിഞ്ഞില്ല. ഇത് ശ്രദ്ധയില്പ്പെട്ട പ്ലാറ്റ്ഫോമിലുണ്ടായിരുന്ന ഒരു ഇന്ത്യന് യുവാവ് ഒട്ടും മടിക്കാതെ യുവതിയെ സഹായിക്കാന് മുന്നോട്ടുവരികയായിരുന്നു.
ആദ്യം പ്ലാറ്റ്ഫോമില് കിടന്ന് ട്രാക്കിലേക്ക് കൈയിട്ട് ദുപ്പട്ട എടുക്കാന് യുവാവ് ശ്രമിച്ചെങ്കിലും അത് വിഫലമായി. ഇതോടെ ട്രെയിനിനും പ്ലാറ്റ്ഫോമിനും ഇടയിലുള്ള ഇടുങ്ങിയ വിടവിലൂടെ അയാള് നേരിട്ട് ട്രാക്കിലേക്ക് ഇറങ്ങി ദുപ്പട്ട എടുത്ത് യുവതിക്ക് കൈമാറുകയായിരുന്നു. തിരികെ പ്ലാറ്റ്ഫോമിലേക്ക് കയറാന് യുവതി കൈ നീട്ടിയെങ്കിലും, ആ സഹായം സ്വീകരിക്കാതെ ട്രെയിന്റെ സ്റ്റെപ്പില് പിടിച്ച് അയാള് സ്വയം പ്ലാറ്റ്ഫോമിലേക്ക് കയറി. യുവതി നന്ദി പറഞ്ഞപ്പോള് ഒരു മനോഹരമായ ചിരിയോടെ അയാള് അവിടെനിന്നും നടന്നുപോയി.
പ്രസിദ്ധ ബോളിവുഡ് ചിത്രം 'കുച്ച് കുച്ച് ഹോത്താ ഹേ'യിലെ ഷാരൂഖ് ഖാന്റെ കഥാപാത്രമായ രാഹുലിനെപ്പോലെയാണ് ആ യുവാവ് എന്നാണ് ഇന്ദഹ ഇന്സ്റ്റഗ്രാമില് കുറിച്ചത്. 'രാഹുല് കൃത്യസമയത്താണ് വന്നത്, ആരും എന്നെ ശ്രദ്ധിക്കില്ലെന്ന് കരുതിയിരിക്കുമ്പോഴാണ് അയാള് വന്ന് സഹായിച്ചത്' എന്ന് യുവതി കുറിച്ചു. കഴിഞ്ഞ ദിവസം പങ്കുവെച്ച ഈ വീഡിയോ ഇതിനോടകം ആറ് കോടിയിലധികം ആളുകള് കാണുകയും 19 ലക്ഷത്തിലധികം പേര് ലൈക്ക് ചെയ്യുകയും ചെയ്തു. യുവാവിന്റെ ഈ നല്ല മനസ്സിനെ അഭിനന്ദിച്ച് നിരവധി പേരാണ് വീഡിയോയ്ക്ക് താഴെ കമന്റുകളുമായി എത്തുന്നത്.
