ബാല്ക്കണിയിലെ പ്രാവുകളുടെ ശല്യം ഒഴിവാക്കാന് കൃത്രിമബുദ്ധി ഉപയോഗിച്ച് യുവാവ് നിര്മ്മിച്ച അത്യാധുനിക പ്രതിരോധ സംവിധാനം സമൂഹ മാധ്യമങ്ങളില് തരംഗമാകുന്നു. പരമ്പരാഗത രീതികളെല്ലാം പരാജയപ്പെട്ടപ്പോഴാണ്, പ്രാവുകളെ തത്സമയം തിരിച്ചറിഞ്ഞ് സ്വയം വെള്ളം ചീറ്റുന്ന സ്മാര്ട്ട് സിസ്റ്റം യുവാവ് വികസിപ്പിച്ചെടുത്തത്. സമൂഹ മാധ്യമ പ്ലാറ്റ്ഫോമായ റെഡ്ഡിറ്റില് പങ്കുവെച്ച ഈ വേറിട്ട കണ്ടുപിടുത്തം ഇതിനകം തന്നെ ലക്ഷക്കണക്കിന് ആളുകളുടെ ശ്രദ്ധ നേടിക്കഴിഞ്ഞു.
ഒരു ഓറഞ്ച് പൈ 5 മിനി കമ്പ്യൂട്ടറുമായി ബന്ധിപ്പിച്ച യുഎസ്ബി ക്യാമറയാണ് ഈ സംവിധാനത്തില് ഉപയോഗിച്ചിരിക്കുന്നത്. ക്യാമറ ദൃശ്യങ്ങളില് പ്രാവുകള് പതിയുമ്പോള് തന്നെ അവയെ കൃത്യമായി തിരിച്ചറിയാന് 'YOLO World V2' എന്ന അത്യാധുനിക എഐ വിഷന് മോഡല് സഹായിക്കുന്നു. പ്രാവിനെ കണ്ടെത്തിയാലുടന്, രണ്ട് സെര്വോ മോട്ടോറുകളില് ഘടിപ്പിച്ചിരിക്കുന്ന വാട്ടര് ഗണ് പ്രാവുള്ള ദിശയിലേക്ക് തിരിയുകയും സ്വയം വെള്ളം ചീറ്റുകയും ചെയ്യും. മനുഷ്യ സഹായമില്ലാതെ സിസ്റ്റം 24 മണിക്കൂറും പ്രവര്ത്തിക്കാന് 'റോക്ക്ചിപ്പ് 3588' ചിപ്പിലെ ബില്റ്റ് ഇന് ന്യൂറല് പ്രോസസ്സിംഗ് യൂണിറ്റാണ് ഉപയോഗിച്ചിരിക്കുന്നത്.
'ഓപ്പണ് വൊക്കാബുലറി ഡിറ്റക്ഷന്' സാങ്കേതിക വിദ്യ ഉപയോഗിക്കുന്ന ഈ എഐ സിസ്റ്റത്തിന്റെ സെറ്റിങ്സില് മാറ്റം വരുത്തിയാല് പ്രാവുകള്ക്ക് പകരം അണ്ണാന്, പൂച്ച, എലി തുടങ്ങിയ മറ്റ് ജീവികളെയും തിരിച്ചറിഞ്ഞ് തുരത്താന് സാധിക്കുമെന്ന് നിര്മ്മാതാവ് അവകാശപ്പെടുന്നു. വന്കിട കമ്പനികളിലും ലബോറട്ടറികളിലും മാത്രം ഒതുങ്ങിനിന്നിരുന്ന ആര്ട്ടിഫിഷ്യല് ഇന്റലിജന്സ്, സാധാരണക്കാരുടെ ദൈനംദിന ആവശ്യങ്ങളിലേക്ക് കൂടി കടന്നുവരുന്നതിനെക്കുറിച്ചുള്ള ചര്ച്ചകള്ക്ക് ഈ പ്രോജക്റ്റ് വഴിതുറന്നു. യുവാവിന്റെ ഈ ക്രിയേറ്റീവ് ബുദ്ധിയെ പലരും പ്രശംസിക്കുമ്പോള്, മൃഗങ്ങളോടുള്ള ക്രൂരതയാണോ ഇതെന്ന രീതിയിലുള്ള വിമര്ശനങ്ങളും ഉയരുന്നുണ്ട്.
Posts from the sideproject
community on Reddit
