സുഷിയെക്കുറിച്ച് കുറച്ചുപേരെങ്കിലും കേട്ടിട്ടുണ്ടാകും. മത്സ്യം, സമുദ്രവിഭവങ്ങള്, പച്ചക്കറികള് എന്നിവയ്ക്കൊപ്പം വിനാഗിരി ചേര്ത്ത ചോറ് പ്രത്യേക രീതിയില് തയ്യാറാക്കിയെടുക്കുന്ന പ്രശസ്തമായ ജാപ്പനീസ് വിഭവമാണ് സുഷി. വേവിക്കാത്ത മീനും ഇറച്ചിയും ഉള്പ്പെടെയുള്ളവ ചേര്ത്ത സുഷിയ്ക്ക് ലോകമെമ്പാടും നിരവധി ആരാധകരുണ്ട്. എന്നാല്, ഹോങ്കോങ്ങിലെ ഒരു പ്രശസ്തമായ ജാപ്പനീസ് റെസ്റ്റോറന്റില് വിളമ്പിയ സുഷിയില് ജീവനുള്ള പരാദത്തെ കണ്ടെത്തിയെന്ന ഞെട്ടിക്കുന്ന വാര്ത്തയാണ് ഇപ്പോള് പുറത്തുവരുന്നത്. ഹോങ്കോങ്ങിലെ കോസ്വേ ബേയിലുള്ള 'ഗട്ടെന് സുഷി' എന്ന റെസ്റ്റോറന്റിലാണ് ഈ സംഭവം ഉണ്ടായത്.
റെസ്റ്റോറന്റ് സന്ദര്ശിച്ച ഒരു ഉപഭോക്താവ് താന് ഓര്ഡര് ചെയ്ത 'ഗോള്ഡന് ഐ സ്നാപ്പര്' സുഷി കഴിക്കുന്നതിന് മുന്പായി അതിന്റെ ഫോട്ടോ എടുക്കാന് ശ്രമിക്കുകയായിരുന്നു. ഈ സമയത്താണ് സുഷിക്കുള്ളില് നിന്നും നൂല് പോലുള്ള ഒരു വെളുത്ത പരാദം ജീവനോടെ ഇഴഞ്ഞു വരുന്നത് അദ്ദേഹത്തിന്റെ ശ്രദ്ധയില് പെട്ടത്. ഫോട്ടോ എടുക്കാന് നോക്കിയതുകൊണ്ട് മാത്രമാണ് താന് ഇത് കഴിക്കാതെ അത്ഭുതകരമായി രക്ഷപ്പെട്ടതെന്ന് ഉപഭോക്താവ് പറഞ്ഞു. ഈ ഭയാനകമായ ദൃശ്യങ്ങള് സോഷ്യല് മീഡിയയില് വൈറലായതോടെ റെസ്റ്റോറന്റ് അധികൃതര് പരസ്യമായി മാപ്പപേക്ഷയുമായി രംഗത്തെത്തിയിട്ടുണ്ട്.
സംഭവത്തെക്കുറിച്ച് ഉപഭോക്താവ് ഹോങ്കോങ്ങിലെ ഭക്ഷ്യപരിസ്ഥിതി ശുചിത്വ വകുപ്പിന് ഇമെയില് വഴി ഔദ്യോഗികമായി പരാതി നല്കിയിട്ടുണ്ട്. ഹോങ്കോങ്ങില് അടുത്തിടെ പ്രവര്ത്തനം ആരംഭിച്ച ഈ പ്രമുഖ ജാപ്പനീസ് ഭക്ഷണ ശൃംഖലയ്ക്ക് ഈ സംഭവം വലിയൊരു തിരിച്ചടിയായിരിക്കുകയാണ്. പച്ചയായ സമുദ്രവിഭവങ്ങള് ഉപയോഗിച്ച് തയ്യാറാക്കുന്ന ഇത്തരം വിഭവങ്ങളുടെ ഗുണനിലവാരത്തെയും സുരക്ഷിതത്വത്തെയും കുറിച്ച് വലിയ രീതിയിലുള്ള ആശങ്കയും ചര്ച്ചകളുമാണ് ഈ വാര്ത്ത പുറത്തുവന്നതോടെ സോഷ്യല് മീഡിയയില് ഉയരുന്നത്.
