സൂര്യ-ആര് ജെ ബാലാജി ചിത്രം ‘കറുപ്പ്’ തിയറ്ററുകളില് വിജയകരമായി പ്രദര്ശനം തുടരുകയാണ്. സിനിമയില് സംഗീതസംവിധായകന് ഇജയരാജയെ കുറിച്ചുളള പരാമര്ശം ആണ് ഇപ്പോള് വിവാദമായിരിക്കുന്നത്. ഇജയരാജ കോപ്പിറൈറ്റ് വാങ്ങും എന്ന തരത്തില് ചിത്രത്തിലെ സംഭാഷണമാണ് വിവാദമായത്.
ഇത് ചര്ച്ചയായതോടെ കറുപ്പിന്റെ നിര്മാതാക്കളായ ഡ്രീം വാരിയര് പിക്ചേഴ്സ് ക്ഷമാപണം നടത്തി. ചിത്രത്തില് ഇളയരാജയെക്കുറിച്ചുളള പരാമര്ശം നീക്കം ചെയ്യുമെന്നും ഡ്രീം വാരിയര് പിക്ചേഴ്സ് പറഞ്ഞു. ഇളയരാജയെ അപമാനിക്കാന് ഉദ്ദേശിച്ചില്ലെന്നും പരാമര്ശം നീക്കം ചെയ്യുകയോ ആവശ്യമായ മാറ്റങ്ങള് വരുത്തുകയോ ചെയ്യുമെന്നും നിര്മാണ കമ്പനി അറിയിച്ചു.
ഇന്ത്യന് സിനിമയ്ക്കും സംഗീതത്തിനും ഇളയരാജ നല്കിയ സംഭാവനയോട് അങ്ങേയറ്റം ആദരവുണ്ട്. അദ്ദേഹവും അദ്ദേഹത്തിന്റെ സംഗീതവും തലമുറകളെ പ്രചോദിപ്പിക്കുകയും ലോകമെമ്പാടുമുളള പ്രേക്ഷകരുടെ ഹൃദയങ്ങളില് പ്രത്യേക സ്ഥാനം നേടുകയും നിലനിര്ത്തുകയും ചെയ്തതാണ്.
കറുപ്പ് എന്ന സിനിമയിലെ ഒരു സംഭാഷണം അദ്ദേഹത്തെയും ആരാധകരെയും വേദനിപ്പിച്ചിട്ടുണ്ടെന്ന് ഞങ്ങള് മനസ്സിലാക്കുന്നു. ഈ സംഭാഷണം അത്തരം വികാരങ്ങള്ക്ക് കാരണമായതില് ഞങ്ങള് ആത്മാര്ഥമായി ഖേദിക്കുന്നു. ഇളയരാജയെയോ അദ്ദേഹത്തിന്റെ സംഭാവനയെയോ അദ്ദേഹത്തിന്റെ അവകാശങ്ങളെയോ ഏതെങ്കിലും തരത്തില് വേദനിപ്പിക്കാനോ, അപമാനിക്കാനോ യാതൊരു ഉദ്ദേശവും ഉണ്ടായിരുന്നില്ല.
ഈ പരമാര്ശം സിനിമയിലെ ഒരു സന്ദര്ഭത്തിന്റെ ഭാഗമായിരുന്നു,അല്ലാതെ അദ്ദേഹത്തെ വ്യക്തിപരമായി ഉദ്ദേശിച്ചുളളതായിരുന്നില്ല. എങ്കിലും അദ്ദേഹത്തിന്റെ വികാരങ്ങളെ ഞങ്ങള് വളരെ വിലമതിക്കുകയും ബഹുമാനിക്കുകയും ചെയ്യുന്നു. ഞങ്ങളുടെ ബഹുമാനത്തിന്റെ പ്രതീകമായി സിനിമയുടെ ഭാവി പതിപ്പുകളിലും തുടര്ച്ചയായുളള പ്രദര്ശനങ്ങളിലും ബന്ധപ്പെട്ട ഭാഗം നീക്കം ചെയ്യാനോ മാറ്റങ്ങള് വരുത്താനോ ഞങ്ങള് തീരുമാനിച്ചിരിക്കുന്നു- ഡ്രീം വാരിയേഴ്സ് പിക്ചേഴ്സിന്റെ വാക്കുകള്
#Pressrelease #PublicAnnouncement #Karuppu #MaestroIlayaraaja pic.twitter.com/hdgP3wZhBL
— DreamWarriorPictures (@DreamWarriorpic) May 19, 2026
സൂര്യയും തൃഷയും പ്രധാന കഥാപാത്രങ്ങളാക്കി ആര് ജെ ബാലാജി സംവിധാനം ചെയ്ത ഫാന്റസി ആക്ഷന് ഡ്രാമയാണ് കറുപ്പ്. ഏറെ നാളുകള്ക്കൊടുവില് സൂര്യക്ക് തിയറ്റര് ഹിറ്റ് ലഭിച്ച ചിത്രം കൂടിയാണ് കറുപ്പ്.
