മൂന്ന് തവണ മരണത്തെ മുഖാമുഖം കണ്ട് ജീവിതത്തിലേക്ക് തിരിച്ചുവന്ന ഒരപൂര്വ അനുഭവം പങ്കുവെച്ചിരിക്കുകയാണ് മുന് നാസ ശാസ്ത്രജ്ഞയായ ഇന്ഗ്രിഡ് ഹോങ്ക. സോഷ്യല് മീഡിയയില് ഇപ്പോള് വലിയ രീതിയില് ചര്ച്ചയാകുന്നത് 55-കാരിയായ ഈ സമുദ്ര ശാസ്ത്രജ്ഞയുടെ വാക്കുകളാണ്. താന് മരണപ്പെട്ട ശേഷം തിരികെ ജീവനിലേക്ക് വന്ന മൂന്ന് സന്ദര്ഭങ്ങളിലും മനുഷ്യര്ക്ക് സാധാരണ ഗതിയില് അനുഭവിക്കാന് കഴിയാത്ത പ്രത്യേക ബോധാവസ്ഥയിലൂടെയാണ് കടന്നുപോയതെന്ന് അടുത്തിടെ നല്കിയ ഒരു അഭിമുഖത്തില് ഇവര് അവകാശപ്പെടുന്നു.
തന്റെ രണ്ട് വയസ്സുള്ളപ്പോഴായിരുന്നു ആദ്യമായി മരണത്തെ അറിഞ്ഞതെന്ന് ഇന്ഗ്രിഡ് ഓര്ക്കുന്നു. അന്ന് കൊളംബിയയിലെ ബൊഗോട്ടയില് മാതാപിതാക്കള്ക്കൊപ്പം താമസിക്കുമ്പോള് വീട്ടിലെ ഒരു ഐസ് വാട്ടര് ടാങ്കില് ഇവര് വീഴുകയായിരുന്നു. വെള്ളത്തിനടിയില് ശ്വാസമെടുക്കാന് കഴിയാതെ വന്നപ്പോള് ആദ്യം ഭയന്നെങ്കിലും, വളരെ പെട്ടെന്ന് തന്നെ ആ ഭയം മാറി തികച്ചും ശാന്തമായ ഒരവസ്ഥയിലേക്ക് താന് മാറിയെന്ന് അവര് പറയുന്നു. സ്വന്തം ശരീരവുമായി യാതൊരു ബന്ധവുമില്ലാത്ത, സ്നേഹവും സമാധാനവും മാത്രം നിറഞ്ഞ തികച്ചും വ്യത്യസ്തമായ ഒരു ലോകത്തായിരുന്നു അപ്പോള് താനെന്നാണ് ഇന്ഗ്രിഡ് വ്യക്തമാക്കുന്നത്. അബോധാവസ്ഥയിലായിരുന്നിട്ടും ദൂരെ നില്ക്കുകയായിരുന്ന അമ്മയെ കാണാനും, സംസാരിക്കാതെ തന്നെ അമ്മയുമായി ആശയവിനിമയം നടത്താനും തനിക്ക് കഴിഞ്ഞെന്നും അവര് കൂട്ടിച്ചേര്ത്തു.
പിന്നീട് വീട്ടിലേക്ക് ഓടിയെത്തിയ അമ്മയാണ് ടാങ്കില് നിന്നും ഇന്ഗ്രിഡിനെ കണ്ടെത്തി രക്ഷപ്പെടുത്തിയത്. ഇതിനുശേഷം തന്റെ 25-ാമത്തെ വയസ്സില് ഒരു വാഹനാപകടത്തില് പെട്ടപ്പോഴും, പിന്നീട് 52-ാമത്തെ വയസ്സില് ഒരു ശസ്ത്രക്രിയയ്ക്കിടെയുമാണ് രണ്ടാമതും മൂന്നാമതും ഇവര്ക്ക് സമാനമായ അനുഭവങ്ങള് ഉണ്ടായത്. ആദ്യമായി മരണത്തിന്റെ വക്കിലെത്തിയപ്പോള് ഉണ്ടായ അതേ ശാന്തതയും അനുഭവങ്ങളും തന്നെയാണ് ഈ രണ്ടു ഘട്ടങ്ങളിലും ആവര്ത്തിച്ചതെന്ന് ഇവര് സാക്ഷ്യപ്പെടുത്തുന്നു.
ശരീരത്തില് നിന്ന് ആത്മാവ് വേറിട്ടുമാറി നില്ക്കുന്ന അവസ്ഥയാണ് ഈ മൂന്ന് സന്ദര്ഭങ്ങളിലും തനിക്കുണ്ടായതെന്ന് ഇന്ഗ്രിഡ് ഹോങ്ക വ്യക്തമാക്കുന്നു. അപകടസമയങ്ങളില് ഭയമെല്ലാം പൂര്ണ്ണമായി അപ്രത്യക്ഷമാവുകയും, വിവരിക്കാനാകാത്ത ശാന്തതയിലേക്ക് മനസ്സ് മാറുകയും ചെയ്യുമെന്നാണ് ഈ ശാസ്ത്രജ്ഞയുടെ അനുഭവം. ശാസ്ത്ര ലോകത്തിന് ഇന്നും കൃത്യമായ ഉത്തരം നല്കാന് കഴിയാത്ത മരണാനന്തര അനുഭവങ്ങളെക്കുറിച്ചുള്ള ചര്ച്ചകള്ക്ക് ഇന്ഗ്രിഡിന്റെ വെളിപ്പെടുത്തല് വീണ്ടും വഴിവെച്ചിരിക്കുകയാണ്.
