ആലപ്പുഴ: പ്രസവത്തിന് തൊട്ടുപിന്നാലെ നവജാത ശിശുവിനെ കക്കൂസിന്റെ ജനാലവഴി പുറത്തേക്ക് വലിച്ചെറിഞ്ഞു അമ്മ. ഹരിപ്പാട് താലൂക്ക് ആശുപത്രിയില് ഇന്നലെ അര്ദ്ധരാത്രിയോടെ നടന്ന സംഭവത്തില് വയറുവേദനയുമായി എത്തിയ 19 കാരിയാണ് ശുചിമുറിയില് പ്രസവിച്ചത്. കുഞ്ഞിനെ ആശുപത്രി ജീവനക്കാര് ഉടന് തന്നെ കണ്ടെത്തിയതിനാല് കുഞ്ഞിന്റെ ജീവന് രക്ഷിക്കാന് കഴിഞ്ഞു.
പെണ്കുഞ്ഞിനെയും മാതാവിനെയും ഉടന് തന്നെ വണ്ടാനം മെഡിക്കല് കോളേജിലേക്ക് പറഞ്ഞുവിടുകയും ചെയ്തു. വൈകിട്ട് 9 മണിയോടെ പിതാവിനും ബന്ധുക്കള്ക്കുമൊപ്പം വയറുവേദനയുമായി അത്യാഹിതത്തില് എത്തിയ പെണ്കുട്ടിയാണ് പ്രസവിച്ചത്. രാത്രി 12 മണിയോടെയായിരുന്നു പ്രസവം നടന്നത്. കുഞ്ഞും അമ്മയും ആരോഗ്യമായിട്ടിരിക്കുന്നു എന്നാണ് വിവരം. സമയത്ത് തന്നെ കുഞ്ഞിനെ കണ്ടെത്താന് കഴിഞ്ഞതാണ് ദുരന്തം ഒഴിവാക്കിയത്. രണ്ടുപേരെയും പിന്നീട് വണ്ടാനം മെഡിക്കല് കോളേജിലേക്ക് മാറ്റുകയായിരുന്നു.
വയറുവേദനയാണെന്നും വയറ്റില് കൊഴുപ്പടിഞ്ഞിട്ടുണ്ടെന്നും അതിന് മരുന്നുവേണമെന്നും പറഞ്ഞായിരുന്നു യുവതി എത്തിയത്. എന്നാല് ഗര്ഭാവസ്ഥ സംശയിച്ച ഡോക്ടര്മാര് സ്കാനിംഗ് റിപ്പോര്ട്ടും മറ്റു കാര്യങ്ങളും ചോദിച്ചെങ്കിലും വേദനയ്ക്കുള്ള മരുന്ന് മാത്രം നല്കിയാല് മതിയെന്ന് യുവതി പറഞ്ഞു. എന്നാല് സമയോചിതമായി ഇടപെട്ട ഡോക്ടര്മാര് യുവതിയോടും ബന്ധുക്കളോടും വണ്ടാനം മെഡിക്കല് കോളേജിലേക്ക് മാറ്റാന് ആവശ്യപ്പെടുകയും യുവതിയെ ഒബ്സെര്വേഷനില് വെച്ചിരിക്കുകയും ആയിരുന്നു.
ഇതിനിടയിലാണ് യുവതി ബാത്ത് റൂമില് പോയി പ്രസവിക്കുകയും കുഞ്ഞിനെ ജനാലവഴി പുറത്തേക്ക് എറിയുകയും ചെയ്തത്. എന്നാല് ശബ്ദം കേട്ട അറ്റന്റര്മാരും സെക്യുരിറ്റി ജീവനക്കാരും നടത്തിയ തെരച്ചിലില് കുഞ്ഞിനെ ബാത്ത്റൂമിന്റെ പിന്നിലെ കുറ്റിക്കാട്ടില് നിന്നും കണ്ടെത്തുകയായിരുന്നു. പിന്നില് കുറ്റിക്കാട് ആയിരുന്നതിനാലും പെട്ടെന്ന് തന്നെ കണ്ടെത്താന് കഴിഞ്ഞതിനാലും കുഞ്ഞിനെ രക്ഷിക്കാനായി. ആശുപത്രിയുടെ ഈ ഭാഗം തെരുവ് നായ്ക്കളുടെ കേന്ദ്രമാണ് സമീപത്ത് കെട്ടിടം പണി നടക്കുന്നതിനാല് സാധനങ്ങള് സൂക്ഷിച്ചിരുന്നതും ഇവിടെയാണ്.
