സാമ്പത്തിക തട്ടിപ്പിന് ഇരയായ വിവരം പങ്കുവെച്ചതിന് പിന്നാലെ ഉയര്ന്ന വ്യാജ പ്രചാരണങ്ങള്ക്കും നെഗറ്റീവ് കമന്റുകള്ക്കും മറുപടിയുമായി ഗായികയും സംരംഭകയുമായ അഭിരാമി സുരേഷ്. തട്ടിപ്പു നടന്ന രീതി വിശദമായി വിശദീകരിച്ചുകൊണ്ടാണ് അഭിരാമി രംഗത്തെത്തിയത്.
കേവലമൊരു ഓണ്ലൈന് തട്ടിപ്പിലല്ല താന് ചെന്നുപെട്ടതെന്നും ആരുടെയും സഹതാപം പിടിച്ചുപറ്റാനല്ല ഇത് വിശദീകരിച്ചതെന്നും അഭിരാമി വ്യക്തമാക്കി. ഇനിയാരും ഇത്തരം തട്ടിപ്പുകളില് ചെന്ന് പെടരുത്. അതിനാണ് ഈ മുന്നറിയിപ്പ് നല്കുന്നതെന്നും ഗായിക വിശദീകരിച്ചു. സമൂഹമാധ്യമങ്ങളില് പങ്കുവെച്ച വീഡിയോയിലൂടെയാണ് അഭിരാമി വിശദീകരണം നല്കിയത്.
ഇത് വെറുമൊരു സാധാരണ ഓണ്ലൈന് തട്ടിപ്പല്ലായിരുന്നു. ആദ്യം ഇന്സ്റ്റഗ്രാം വഴയാണ് ബിസിനസ് പ്രൊപ്പോസലുമായി അവര് സമീപിക്കുന്നത് തുടര്ന്ന് നമ്മുടെ കമ്പനിയുടെ വിവരങ്ങളെല്ലാം പല ഘട്ടങ്ങളിലായി അവര് പരിശോധിച്ചു. ഒരു ബാങ്ക് ചെയ്യുന്നതുപോലെ, അല്ലെങ്കില് അതിനേക്കാള് ഒരുപടി മുന്നില് നിന്നുകൊണ്ടാണ് അവര് നമ്മളെ കാര്യങ്ങള് വിശ്വസിപ്പിച്ചത്. നമ്മുടെ കമ്പനിക്ക് പണം തിരിച്ചുനല്കാന് ശേഷിയുണ്ടോ എന്നൊക്കെ മനസ്സിലാക്കാന് അവര് സര്പ്രൈസ് വിസിറ്റുകള് അടക്കം നടത്തി.
കാര്യങ്ങള് വളരെ കൃത്യമായ ഘട്ടങ്ങളിലൂടെ നടന്നതുകൊണ്ടും വളരെ കണ്വിന്സിങ് ആയതുകൊണ്ടും ഇതൊരു തട്ടിപ്പാണെന്ന് ചിന്തിക്കാന് പറ്റിയില്ല. നിരന്തരം കോള് ചെയ്ത് വളരെ വിശ്വസനീയമായാണ് അവര് കാര്യങ്ങള് നീക്കിയത്. വലിയ തുകകള് സെക്യൂരിറ്റി ഇല്ലാതെ ലോണായി തരാം എന്ന് പറയുമ്പോള് നമ്മുടെ സ്വപ്നങ്ങളുമായി നമ്മള് അതിനെ കണക്ട് ചെയ്തു പോകും. അല്ലാതെ ഒറ്റ കോളില് പൈസ അയച്ചുതരൂ എന്ന് പറയുന്ന രീതിയായിരുന്നില്ല. അവസാന ഘട്ടത്തില് അങ്ങോട്ട് പ്രൊസസിങ് ഫീ കൊടുക്കേണ്ടി വന്നപ്പോള് ചെറിയ സംശയം തോന്നിയിരുന്നു. എങ്കിലും ആദ്യ ഘട്ട നടപടികളൊക്കെ പൂര്ത്തിയായതുകൊണ്ടാണ് പണം നല്കിയത്.
കഷ്ടപ്പെട്ട് ഉണ്ടാക്കിയ പണം വെറുതേ പോകുമ്പോള് ആര്ക്കായയാലും സങ്കടം ഉണ്ടാകും. അതുകൊണ്ടാണ് ഇക്കാര്യങ്ങള് പങ്കുവെച്ചത്. അല്ലാതെ എനിക്ക് ആരുടെയും സഹതാപം ആവശ്യമില്ല. നിയമനടപടികള് നടക്കുന്നതുകൊണ്ടാണ് അയാളുടെ പേര് പറയാത്തത്. കേസ് നടക്കുമ്പോള് അയാള്ക്ക് ഗുണകരമായതൊന്നും നമ്മുടെ ഭാഗത്ത് നിന്നുണ്ടാകരുത്.
കലിയുഗത്തില് നല്ലത് പങ്കുവെച്ചിട്ടും കാര്യമൊന്നുമില്ല. എങ്കിലും ഇങ്ങനത്തെ ഉടായിപ്പുകള് നടക്കുന്നുണ്ടെന്ന് നിങ്ങളെ അറിയിക്കാനാണ് വീഡിയോ ചെയ്തത്. ബിസിനസിലെ സാമ്പത്തിക പ്രതിസന്ധി നീക്കിത്തരാമെന്ന് പറഞ്ഞ് നിങ്ങളെ പലരും സമീപിക്കും പല രീതിയിലും അവര് നിങ്ങളെ വിശ്വസിപ്പിക്കാന് ശ്രമിക്കും അങ്ങനെയൊക്കെയുളള ആളുകള് വന്നാല് വിശ്വസിക്കരുത് എന്ന് പറയാന് മാത്രമാണ് ഞാന് വന്നത്.
തട്ടിപ്പ് നടന്ന രീതി വിശദീകരിച്ചുകൊണ്ട് അഭിരാമി കഴിഞ്ഞ ദിവസം വീഡിയോ പങ്കുവെച്ചിരുന്നു. തട്ടിപ്പുകാരന് തന്നെ സമീപിച്ച രീതിയും പിന്നീടുണ്ടായ സംഭവങ്ങളും അഭിരാമി വീഡിയോയില് വ്യക്തമാക്കിയിരുന്നു. ഇതിന് പിന്നാലെയാണ് മറ്റൊരു വീഡിയോയുമായി താരം വീണ്ടും രംഗത്തെത്തിയത്. ഇത്തരം സാമ്പത്തിക തട്ടിപ്പുകളില് ആരും വീഴരുതെന്നാണ് താരം ആവര്ത്തിച്ചുപറയുന്നത്.
