ബോളിവുഡിന്റെ താരറാണിയായി തിളങ്ങി നില്ക്കുന്ന താരമാണ് ആലിയ ഭട്ട്. ഇന്ത്യൻ ചലച്ചിത്ര മേഖലയിലെ ഏറ്റവും പ്രധാനപ്പെട്ട മുഖങ്ങളിൽ ഒന്നാണ് താരത്തിന്റേത്. സിനിമ പാരമ്പര്യമുള്ള കുടുംബത്തിൽ നിന്നെത്തിയെങ്കിലും അഭിനയ മികവിലൂടെയാണ് താരം തന്റേതായ ഇടം ബിഗ് സ്ക്രീനിൽ നേടിയെടുത്തത്.
കാൻ ഫിലിം ഫെസ്റ്റിവലിൽ ഇത്തവണയും ബോളിവുഡ് സെലിബ്രിറ്റികളിൽ നിന്ന് ആലിയ എത്തിയിരുന്നു. നിരവധി ട്രോളുകൾ അതിന്റെ പേരിൽ വന്നെങ്കിലും അതൊന്നും മൈൻഡ് ചെയ്യാതെ താരം പൊതുവേദികളിൽ തിളങ്ങുന്നുണ്ട്.
ഇപ്പോഴിതാ താൻ ശരിക്കും സംവിധായകരുടെ അഭിനേത്രിയാണ് എന്ന് പറയുകയാണ് ആലിയ. സംവിധായകരുടെ കാഴ്ചപ്പാടുകൾ സ്ക്രീനിൽ പകർത്താൻ ലക്ഷ്യമിടുന്ന ഒരു സഹകാരിയായിട്ടാണ് സ്വയം കണക്കാക്കുന്നത് എന്നും തന്നിലെ അഭിനേത്രിയെ രൂപപ്പെടുത്തിയത് കഥാപാത്രങ്ങളെ തന്ന സംവിധായകർ ആണെന്നും ആലിയ പറയുന്നു.
‘‘ഞാൻ ഇന്ന് ഏതുതരത്തിലുള്ള ഒരു അഭിനേത്രിയാണോ, അത് ഞാൻ ഇതുവരെ ഒപ്പം പ്രവർത്തിച്ചിട്ടുള്ള എല്ലാ സംവിധായകരും കാരണമാണ്. വര്ഷങ്ങളായി എന്നിലെ അഭിനേത്രിയെ രൂപപ്പെടുത്തിയത് എന്നെ സെലക്ട് ചെയ്ത മികച്ച സംവിധായകരാണ്. ഞാൻ വെറുതെ പറയുന്നതല്ല ഇത്. ഞാൻ ഒരു 'ഡയറക്ടേഴ്സ് ആക്ടർ' (സംവിധായകരുടെ അഭിനേത്രി) ആണ്. എനിക്ക് അഭിനയത്തിൽ വലിയൊരു പ്രക്രിയയൊന്നുമില്ല. എന്റെ പ്രക്രിയ എന്നത് എന്റെ സംവിധായകനാണ്.
അതിനാൽ, ഞാൻ ഒപ്പം പ്രവർത്തിച്ചിട്ടുള്ള എല്ലാ സംവിധായകരും...അത് ഇംതിയാസ് അലി ആകട്ടെ, അഭിഷേക് ചൗബേ, സഞ്ജയ് ലീല ബൻസാലി, രാജമൗലി സർ, വാസൻ ബാല, കരൺ, ശിവ് റവെയ്ൽ, കരൺ ജോഹർ... അങ്ങനെ ഇപ്പോൾ എന്റെ മനസ്സിലേക്ക് വരുന്ന പേരുകൾ ഞാൻ പറയുന്നു എന്നേയുള്ളൂ... എല്ലാവരും ഗൗരി ഷിൻഡെ ഉൾപ്പെടെയുള്ള എല്ലാ സംവിധായകരും എപ്പോഴും ഒരു കഥാപാത്രത്തെക്കുറിച്ചുള്ള ചർച്ചകളിലൂടെ എന്നിൽ സ്വാധീനം ചെലുത്തിയിട്ടുണ്ട്. അവരിൽ നിന്ന് ഞാൻ എപ്പോഴും ഉൾക്കൊള്ളുന്ന ഒരു കാര്യം അതാണ്. അത് ആ കഥാപാത്രത്തെക്കുറിച്ച് സംസാരിക്കുക എന്നത് മാത്രമാണ്; അവർ എന്നിൽ നിന്ന് എന്താണ് ആഗ്രഹിക്കുന്നത് എന്നതിനെ ആശ്രയിച്ചാണ് ഓരോ കഥാപാത്രവും... സംവിധായകർ അവരുടെ കഥാപാത്രത്തെ എങ്ങനെ കാണുന്നു എന്നത് ഒരു വ്യക്തി എന്ന നിലയിൽ എന്നിൽ മായാത്ത മുദ്ര പതിപ്പിക്കുന്നു....’’ ആലിയ പറഞ്ഞു. 79-ാമത് കാൻ ഫിലിം ഫെസ്റ്റിവലിൽ ദി ഹോളിവുഡ് റിപ്പോർട്ടർ ഇന്ത്യയ്ക്കു വേണ്ടി അനുപമ ചോപ്രയുമായുള്ള ഒരു പ്രത്യേക സംഭാഷണത്തിലാണ് ആലിയ ഇത് പറഞ്ഞത്.
