'മുള്ളിനെ മുള്ളുകൊണ്ട് എടുക്കുക' എന്ന പഴഞ്ചൊല്ല് അന്വര്‍ത്ഥമാക്കുന്ന വേറിട്ടൊരു പരീക്ഷണവുമായി ടെക് ഭീമനായ ഗൂഗിള്‍ രംഗത്ത്. ഡെങ്കിപ്പനി, സിക്ക വൈറസ്, ചിക്കന്‍ഗുനിയ തുടങ്ങിയ മാരക രോഗങ്ങള്‍ പടര്‍ത്തുന്ന കൊതുകുകളെ നിയന്ത്രിക്കുന്നതിനായി അമേരിക്കയിലെ കാലിഫോര്‍ണിയ, ഫ്‌ലോറിഡ എന്നീ സംസ്ഥാനങ്ങളിലായി 3.2 കോടി കൊതുകുകളെ തുറന്നുവിടാനാണ് ഗൂഗിളിന്റെ പദ്ധതി. പ്രത്യേകം ലാബുകളില്‍ വളര്‍ത്തിയെടുത്ത, ഒരു പ്രത്യേക ബാക്ടീരിയ ബാധിച്ച കൊതുകുകളെയാണ് ഇത്തരത്തില്‍ പ്രകൃതിയിലേക്ക് തുറന്നുവിടുന്നത്. ഗൂഗിളിന്റെ ആരോഗ്യ സാങ്കേതിക വിഭാഗമാണ് വിപ്ലവകരമായ ഈ വിവരങ്ങള്‍ പുറത്തുവിട്ടത്.
ഉയര്‍ന്ന തോതില്‍ കൊതുക് ജന്യ രോഗവ്യാപനം രേഖപ്പെടുത്തിയ പ്രദേശങ്ങളെ കേന്ദ്രീകരിച്ചാണ് ഈ പദ്ധതി നടപ്പിലാക്കുന്നത്. പെട്ടെന്ന് ഒരുമിച്ച് നടപ്പാക്കുന്നതിന് പകരം ഘട്ടം ഘട്ടമായിട്ടാകും കൊതുകുകളെ തുറന്നുവിടുകയെന്ന് ഗൂഗിള്‍ അറിയിച്ചിട്ടുണ്ട്. ഇത് ഗവേഷകര്‍ക്ക് പദ്ധതിയുടെ പുരോഗതി കൃത്യമായി നിരീക്ഷിക്കാനും, ആവശ്യമായ ഘട്ടങ്ങളില്‍ ഉചിതമായ മാറ്റങ്ങള്‍ വരുത്താനും കൃത്യമായ അവസരം നല്‍കും.
ലബോറട്ടറിയില്‍ പ്രത്യേകമായി വളര്‍ത്തിയെടുക്കുന്ന ഈഡിസ് ഈജിപ്തി വിഭാഗത്തില്‍പെട്ട ആണ് കൊതുകുകളെയാണ് ഇതിനായി ഉപയോഗിക്കുന്നത്. ഇവയില്‍ സ്വാഭാവികമായി കാണപ്പെടാത്ത 'വോള്‍ബാഷിയ' എന്ന ബാക്ടീരിയ നിക്ഷേപിച്ചിരിക്കും. ഈ ആണ് കൊതുകുകള്‍ പ്രകൃതിയിലുള്ള പെണ്‍ കൊതുകുകളുമായി ഇണചേരുമ്പോള്‍, അവയുടെ പ്രജനന ശേഷി നഷ്ടമാവുകയും മുട്ടകള്‍ വിരിയാതെ വരികയും ചെയ്യും. ഇതുവഴി അടുത്ത തലമുറയിലെ കൊതുകുകളുടെ എണ്ണം ഗണ്യമായി കുറയ്ക്കാന്‍ സാധിക്കുമെന്നാണ് ഗവേഷകരുടെ കണ്ടെത്തല്‍. ഈ ആണ് കൊതുകുകള്‍ മനുഷ്യരെ കടിക്കുകയോ രോഗം പടര്‍ത്തുകയോ ചെയ്യാത്തതിനാല്‍ മനുഷ്യര്‍ക്ക് നേരിട്ട് യാതൊരുവിധ ആരോഗ്യ ഭീഷണിയുമില്ലെന്നും വിദഗ്ധര്‍ വ്യക്തമാക്കുന്നു.
ഗൂഗിളിന്റെ മാതൃകമ്പനിയായ ആല്‍ഫബെറ്റിന്റെ ലൈഫ് സയന്‍സ് വിഭാഗമായ 'വെറിലി' ആണ് ഈ പദ്ധതിക്ക് പിന്നില്‍ പ്രവര്‍ത്തിക്കുന്നത്. മുന്‍പ് കാലിഫോര്‍ണിയയിലെ ചില പ്രത്യേക മേഖലകളില്‍ കമ്പനി നടത്തിയ പ്രാരംഭ പരീക്ഷണങ്ങളില്‍ കൊതുകുകളുടെ എണ്ണം 80 ശതമാനത്തിലധികം കുറയ്ക്കാന്‍ സാധിച്ചിരുന്നു. ഈ വിജയത്തിന്റെ ആത്മവിശ്വാസത്തിലാണ് പദ്ധതി ഇപ്പോള്‍ വന്‍തോതില്‍ നടപ്പിലാക്കാന്‍ കമ്പനി ഒരുങ്ങുന്നത്.
Comments