തങ്ങളുടെ പ്രിയപ്പെട്ട മുത്തശ്ശിയുടെ കാലങ്ങളായുള്ള ഒരു ആഗ്രഹം സാധിച്ചുനല്കുന്ന ഒരു കുടുംബത്തിന്റെ ഹൃദയസ്പര്ശിയായ വീഡിയോ സോഷ്യല് മീഡിയയില് തരംഗമാകുന്നു. പ്രിയപ്പെട്ടവര്ക്കൊപ്പം സമയം ചിലവഴിക്കേണ്ടതിന്റെയും മനോഹരമായ ഓര്മ്മകള് സൃഷ്ടിക്കേണ്ടതിന്റെയും പ്രാധാന്യത്തെക്കുറിച്ച് ചിന്തിക്കാന് പ്രേരിപ്പിക്കുന്നതാണ് ഈ ദൃശ്യങ്ങള്. ഹെര്ഷി ഇനേനി എന്ന ഇന്സ്റ്റാഗ്രാം ഉപയോക്താവാണ് ഈ മനോഹരമായ വീഡിയോ പങ്കുവെച്ചിരിക്കുന്നത്.
തന്റെ 87 വര്ഷത്തെ ജീവിതത്തിനിടയില് മറ്റുള്ളവരെ പരിചരിക്കാന് മാത്രം സമയം കണ്ടെത്തിയ മുത്തശ്ശിക്ക് ഇതുവരെ കടല് കാണാന് സാധിച്ചിരുന്നില്ല എന്ന് വീഡിയോയ്ക്കൊപ്പം പങ്കുവെച്ച കുറിപ്പില് പറയുന്നു. മുത്തശ്ശിയുടെ ഈ വലിയ ആഗ്രഹം സാക്ഷാത്കരിക്കാനായി കുടുംബം ഒന്നടങ്കം അവരെ കടല്ത്തീരത്ത് എത്തിക്കുകയായിരുന്നു. കുടുംബാംഗങ്ങള്ക്കൊപ്പം തിരമാലകളെ നോക്കി ആസ്വദിക്കുന്ന പ്രായമായ ദമ്പതികളുടെ ഈ യാത്ര, അവിടെയുണ്ടായിരുന്നവരെയും വീഡിയോ കണ്ടവരെയും ഒരുപോലെ വൈകാരികമായി സ്പര്ശിച്ചു.
സോഷ്യല് മീഡിയയില് പങ്കുവെച്ചതിന് പിന്നാലെ ലക്ഷക്കണക്കിന് ആളുകളാണ് ഈ വീഡിയോ കണ്ടത്. 'ഇത് ശരിക്കും എന്റെ ദിവസത്തെ മനോഹരമാക്കി', 'കുടുംബത്തിന്റെ ജീവിതത്തിലേക്ക് സന്തോഷം കൊണ്ടുവരുന്ന ഇത്തരം മാന്ത്രിക നിമിഷങ്ങള് കാണുമ്പോള് ജീവിതം വളരെ ലളിതമായി തോന്നും' എന്നിങ്ങനെ നിരവധി കമന്റുകളാണ് വീഡിയോയ്ക്ക് ലഭിച്ചുകൊണ്ടിരിക്കുന്നത്. സ്വന്തം മുത്തശ്ശിയെയും ഇതുപോലെ യാത്ര കൊണ്ടുപോകാന് ഈ വീഡിയോ തങ്ങള്ക്ക് പ്രചോദനമായി എന്നും ചിലര് കുറിച്ചു.
