മലയാള സിനിമയിലെ ക്ലാസിക് ചിത്രങ്ങളിലൊന്നായ ‘സര്ഗ’ത്തിലെ കുട്ടന് തമ്പുരാനെ മാത്രം ഓര്ത്താല് മതി മനോജ് കെ.ജയന് എന്ന അഭിനേതാവിന്റെ കാലിബര് മനസ്സിലാക്കാന്. മൂന്ന് പതിറ്റാണ്ടിലേറെ നീണ്ട അഭിനയ ജീവിതത്തിനിടയിൽ, മനോജ് കെ. ജയൻ മലയാള സിനിമയിലെ അവിസ്മരണീയമായ നിരവധി കഥാപാത്രങ്ങൾക്ക് ജീവന് നല്കിയിട്ടുണ്ട്. മണിരത്നം സംവിധാനം ചെയ്ത ദളപതിയിലൂടെ തമിഴ് സിനിമയിൽ എത്തിയ മനോജിന് അവിടെയും ഏറെ അവസരങ്ങൾ ലഭിച്ചു. തമിഴ് സിനിമയിലും ശ്രദ്ധേയമായ വേഷങ്ങൾ ചെയ്തിട്ടുണ്ട്. പകിട്ട് ഒട്ടും കുറയാതെ ഇന്നും ബിഗ്സ്ക്രീനില് തിളങ്ങി നില്ക്കുകയാണ് താരം.
താരം രണ്ടാമത് വിവാഹം ചെയ്തത് യു.കെ. ഫാമിലി വിസയുള്ള ആശയെയാണ്. അതില്പ്പിന്നെ താരവും കുടുംബവും പതിയെ വിദേശത്തേക്ക് ചേക്കേറി. അവിടുത്തെ ഗ്രാമർ സ്കൂളിലാണ് മനോജ്. കെ. ജയന്റെ മകൻ അമൃത് പഠിക്കുന്നത്.
സോഷ്യല് മീഡിയയില് സജീവമായ താരം വിദേശത്ത് നിന്ന് പകര്ത്താറുള്ള നിരവധി ചിത്രങ്ങള് അതിലൂടെ പങ്കിടാറുണ്ട്. ഈ പ്രായത്തിലും ചെറുപ്പക്കാരെ വെല്ലുന്ന ഫാഷന് സെന്സാണ് താരത്തിന്. ആരും നോക്കിനിന്നു പോകുന്ന ട്രെന്ഡിംഗായ ഔട്ട്ഫിറ്റുകളിലും ആക്സസറീസിലുമാണ് താരം ചിത്രങ്ങളില് പ്രത്യക്ഷപ്പെടാറുള്ളത്. പലപ്പോഴും താരത്തിന്റെ ചിത്രങ്ങള് കണ്ട് ചെറുപ്പക്കാര് അസൂയപ്പെടുകയും കമന്റുകളിലൂടെ അത് പ്രകടമാക്കുകയും ചെയ്യാറുണ്ട്.
ഇപ്പോഴിതാ തന്റെ വിദേശയാത്രയ്ക്കിടെ മെർലിൻ മൺറോയുടെ ഡ്യൂപ്പിനെ കണ്ടതിനെക്കുറിച്ചും ചിത്രം പകര്ത്തിയതിനെക്കുറിച്ചുമാണ് താരം സോഷ്യല് മീഡിയയില് പങ്കിട്ടിരിക്കുന്നത്. ഐക്കോണിക് താരം മെര്ലിന് മൺറോയുടെ 100-ാം ജന്മദിനത്തില് ഈ ചിത്രം പങ്കിടാന് കഴിഞ്ഞതിന്റെ സന്തോഷവും താരം കുറിപ്പില് പങ്കുവച്ചിട്ടുണ്ട്.
‘‘കഴിഞ്ഞ മാസം അമേരിക്കയിലെ യൂണിവേഴ്സല് സ്റ്റുഡിയോസില് കറങ്ങി നടക്കുമ്പോൾ, ദാ നിൽക്കുന്നു..പഴയ ഹോളിവുഡ് ഇതിഹാസം മെർലിൻ മൺറോ...ഡ്യൂപ്പ് ആണെങ്കിലും കൂടെ നിന്ന് ഒരു പടമെടുത്തു..ഡ്യൂപ്പ് എങ്കിൽ ഡ്യൂപ്പ്... ഇത് പോസ്റ്റ് ചെയ്യാൻ ഇതിലും പെര്ഫക്ട് ആയ ദിവസം വേറെ ഉണ്ടാവില്ല എന്ന് കരുതുന്നു...കാരണം ഇന്ന് ഇന്ന്...ദി ഗ്രേറ്റ്.. ഐക്കോണിക്...‘മെർലിൻ മൺറോ’യുടെ...100-ാം ജന്മദിനമാണ്
ജനിച്ച് ഒരു നൂറ്റാണ്ട് കഴിഞ്ഞിട്ടും മെർലിൻ മൺറോ ഇപ്പോഴും ഒരു ആകർഷകമായ പ്രഹേളികയാണ്. അമേരിക്കൻ ഐക്കണോഗ്രാഫിൽ ആഴത്തിൽ വേരൂന്നിയ നടിയും മോഡലും ഗായികയുമാണ്....’ എന്നാണ് ചിത്രങ്ങള് പങ്കിട്ട് മനോജ് കെ. ജയന് കുറിച്ചിരിക്കുന്നത്.
