സോഷ്യല് മീഡിയയില് അടുത്തിടെ പ്രത്യക്ഷപ്പെട്ട ഒരു ചിത്രം ആളുകളെ അക്ഷരാര്ത്ഥത്തില് ഞെട്ടിച്ചിരിക്കുകയാണ്. ഒരു യുവാവിന്റെ പാന്റില് ആയിരക്കണക്കിന് തേനീച്ചകള് കൂട്ടത്തോടെ വന്നിരിക്കുന്ന ദൃശ്യങ്ങളാണ് 'medisarasu' എന്ന എക്സ് പേജിലൂടെ പുറത്തുവന്നത്. ഇന്ത്യക്കാരനെന്ന് കരുതപ്പെടുന്ന 25 വയസുകാരനായ ഈ യുവാവ്, തേനീച്ചകളുമായി ഏകദേശം 30 മിനിട്ടോളം ഒരേ നില്പ്പ് നില്ക്കേണ്ടി വന്നതായാണ് പോസ്റ്റില് വ്യക്തമാക്കുന്നത്.
പതിവ് നടത്തത്തിനായി ഇറങ്ങിയ യുവാവിന്റെ പാന്റില് ആദ്യം ഒരു റാണി തേനീച്ച വന്നിരിക്കുകയും, തൊട്ടുപിന്നാലെ മറ്റ് തേനീച്ചകള് അവിടെ താവളമാക്കുകയുമായിരുന്നു. തന്റെ ഭാഗത്തുനിന്നുണ്ടാകുന്ന ചെറിയൊരു ചലനം പോലും തേനീച്ചകളെ പ്രകോപിപ്പിക്കുമെന്നും, കൂട്ടത്തോടെ ആക്രമിച്ചാല് മരണം വരെ സംഭവിക്കാമെന്നും തിരിച്ചറിഞ്ഞ യുവാവ് ഒട്ടും പരിഭ്രമിക്കാതെ, അനങ്ങാതെ നിന്നു. ഒടുവില് 30 മിനിട്ടിന് ശേഷം യുവാവിന് ഒരു കുത്തുപോലും ഏല്പ്പിക്കാതെ തേനീച്ചകള് സ്വയം പറന്നുപോവുകയായിരുന്നു.
ഭയപ്പെടുത്തുന്ന ഈ സാഹചര്യത്തിലും യുവാവ് കാണിച്ച അസാധ്യ ധൈര്യത്തെ പ്രശംസിച്ച് നിരവധി പേരാണ് രംഗത്തെത്തുന്നത്. എന്നാല് ഈ ചിത്രങ്ങള് കുറച്ചു വര്ഷങ്ങള്ക്ക് മുന്പ് നടന്ന സംഭവത്തിന്റെതാണെന്നും ചിലര് കമന്റുകളില് ചൂണ്ടിക്കാണിക്കുന്നുണ്ട്. തേനീച്ചകള്ക്ക് വിശ്രമിക്കാന് നീല നിറത്തിലുള്ള വസ്തുക്കള് ഇഷ്ടമാണെന്നും, അതുകൊണ്ടായിരിക്കാം യുവാവിന്റെ നീല പാന്റില് അവ വന്നിരുന്നതെന്നും ചിലര് കൗതുകത്തോടെ കുറിക്കുന്നു.
