ന്യൂയോര്ക്ക്: കൃത്രിമബുദ്ധി(എഐ) സാങ്കേതികവിദ്യയുടെ ദ്രുതഗതിയിലുള്ള വളര്ച്ച പരിസ്ഥിതിക്ക് വന് ഭീഷണിയാകുന്നുവെന്ന് ഐക്യരാഷ്ട്ര സംഘടനയുടെ യൂണിവേഴ്സിറ്റി റിപ്പോര്ട്ട്. വരും വര്ഷങ്ങളില് എഐ ഉപയോഗം കുതിച്ചുയരുന്നതോടെ, ഡേറ്റ സെന്ററുകള് വരുത്തിവെക്കുന്ന മലിനീകരണവും വെള്ളത്തിന്റെയും ഊര്ജ്ജത്തിന്റെയും ഉപയോഗവും അടുത്ത നാല് വര്ഷത്തിനകം ഇരട്ടിയാകുമെന്നാണ് മുന്നറിയിപ്പ്. കംപ്യൂട്ടിങ് സാമഗ്രികളും വലിയ ഡേറ്റ സംഭരണികളും അടങ്ങുന്ന വമ്പന് കേന്ദ്രങ്ങളായ ഡേറ്റ സെന്ററുകളുടെ പാരിസ്ഥിതിക ആഘാതം നിലവില് തന്നെ ലോകത്തിലെ പല വന്കിട രാജ്യങ്ങളോടും കിടപിടിക്കുന്നതാണെന്നും റിപ്പോര്ട്ട് ചൂണ്ടിക്കാണിക്കുന്നു. എഐ സാങ്കേതികവിദ്യയുടെ പാരിസ്ഥിതിക ദോഷങ്ങളെക്കുറിച്ച് വെളിച്ചം വീശുന്ന ആദ്യത്തെ ഔദ്യോഗിക യുഎന് റിപ്പോര്ട്ടാണിത്.
റിപ്പോര്ട്ടിലെ പ്രധാന കണ്ടെത്തലുകള് താഴെ പറയുന്നവയാണ്:
കഴിഞ്ഞ വര്ഷം മാത്രം ആഗോളതലത്തിലെ ഡേറ്റ സെന്ററുകള് ഉപയോഗിച്ചു തീര്ത്തത് 448 ലക്ഷം കോടി വാട്ട് അവര് വൈദ്യുതിയാണ്.
ഈ ഭീമമായ ഊര്ജ്ജ ഉപഭോഗം കാരണം അന്തരീക്ഷത്തിലേക്ക് ഏകദേശം 20.8 കോടി ടണ് കാര്ബണ് ഡയോക്സൈഡ് പുറന്തള്ളപ്പെട്ടു. ഇത് അര്ജന്റീന എന്ന രാജ്യം ഒരു വര്ഷം പുറന്തള്ളുന്ന ആകെ മലിനീകരണത്തിന് തുല്യമാണ്. കൂടാതെ, ഇത്രയും ഊര്ജ്ജം ഉല്പ്പാദിപ്പിക്കാനായി മാത്രം 4.5 ലക്ഷം കോടി ലീറ്റര് വെള്ളവും ഉപയോഗിക്കേണ്ടി വന്നു.
നിലവില് ഡേറ്റ സെന്ററുകളിലെ ആകെ ഊര്ജ്ജ ഉപയോഗത്തിന്റെ 20 ശതമാനവും എഐ സാങ്കേതികവിദ്യകള് കാരണമാണ്. എന്നാല് 2030-ഓടെ ഇത് 40 ശതമാനമായി ഉയരുമെന്നാണ് കണക്കാക്കുന്നത്.
