വസ്ത്രധാരണം ഓരോരുത്തരുടെയും വ്യക്തിപരമായ സ്വാതന്ത്ര്യമാണെന്ന് പറയുമ്പോഴും പൊതുസ്ഥലങ്ങളില് ആളുകളുടെ വസ്ത്രധാരണത്തെ വിചാരണ ചെയ്യുന്ന നിരവധിപേര് ഇന്നും നമ്മുടെ സമൂഹത്തിലുണ്ട്. അത്തരമൊരു മോശം അനുഭവമാണ് ഡല്ഹി മെട്രോയില് യാത്ര ചെയ്ത ഒരു യുവതിക്ക് കഴിഞ്ഞ ദിവസം നേരിടേണ്ടി വന്നത്. യുവതി തന്നെയാണ് ജീന്സും ഫുള്സ്ലീവ് കോര്സെറ്റ് ടോപ്പും ധരിച്ചെത്തിയ തനിക്കെതിരെ മറ്റൊരു സ്ത്രീ അകാരണമായി തര്ക്കത്തില് ഏര്പ്പെടുകയും അസഭ്യം പറയുകയും ചെയ്തതായി സോഷ്യല് മീഡിയ പ്ലാറ്റ്ഫോമായ 'ത്രെഡ്സി'ല് കുറിച്ചത്. അനുചിതമായ ഒന്നും ധരിച്ചിരുന്നില്ലെങ്കിലും യാത്രാമധ്യേ ആ സ്ത്രീ തന്റെ പിന്നില് രണ്ടുതവണ അടിച്ചെന്നും ആദ്യം അബദ്ധത്തില് തട്ടിയതാണെന്നാണ് കരുതിയതെന്നും യുവതി വ്യക്തമാക്കുന്നു.
എന്നാല് യാത്രയിലുടനീളം ആ സ്ത്രീ തന്നെ കുറ്റപ്പെടുത്തുകയും മോശം വാക്കുകള് ഉപയോഗിക്കുകയും ചെയ്തതായി യുവതി പറയുന്നു. തര്ക്കത്തിനൊടുവില് ഈ സ്ത്രീ മെട്രോയിലിരുന്ന് ഉറങ്ങിപ്പോവുകയും തനിക്ക് ഇറങ്ങേണ്ട സ്റ്റേഷന് നഷ്ടപ്പെടുകയും ചെയ്തു. തന്റെ അവസാന സ്റ്റോപ്പ് എത്തിയപ്പോള് അവര് പരിഭ്രാന്തിയോടെ ഉണരുന്നതായിരുന്നു ഈ മോശം അനുഭവത്തിനിടയിലെ രസകരമായ കാഴ്ചയെന്നും യുവതി തന്റെ കുറിപ്പില് പരിഹാസത്തോടെ കൂട്ടിച്ചേര്ത്തു.
യുവതിയുടെ കുറിപ്പ് വൈറലായതോടെ സമാനമായ അനുഭവങ്ങള് പങ്കുവെച്ച് നിരവധി പെണ്കുട്ടികളാണ് രംഗത്തെത്തിയത്. പൊതുസ്ഥലങ്ങളില് മുതിര്ന്ന സ്ത്രീകള് യുവതികളുടെ വസ്ത്രധാരണത്തെ നിരന്തരം അധിക്ഷേപിക്കുന്നത് പതിവാണെന്ന് പലരും കമന്റ് ചെയ്തു. അമ്മായിമാരും പ്രായമുള്ള കസിന് സഹോദരിമാരും ഇപ്പോഴും കുറ്റപ്പെടുത്തലും ഭീഷണിയും തുടരുന്നെന്നും ഇന്ത്യയിലെ ഇന്ത്യയിലെ 70 മുതല് 80% വരെ സ്ത്രീകളും സ്ത്രീവിരുദ്ധതയുടെയും പുരുഷ/സ്ത്രീ വര്ഗീയതയുടെയും കാവല്ക്കാരുമാണെന്നായിരുന്നു ഒരു കാഴ്ചക്കാരന് കുറിച്ചത്. സമൂഹത്തില് ഇപ്പോഴും ഇത്തരം സ്വയം പ്രഖ്യാപിത മോറല് പോലീസിങ് നടത്തുന്നവര് ഉണ്ടെന്നും, ഇവരോട് പ്രതികരിച്ച് സമയം കളയാതെ മാറിനില്ക്കുന്നതാണ് നല്ലതെന്നും പലരും ഉപദേശിക്കുന്നുണ്ട്.
