വര്ക്ക് ഫ്രം ഹോം സൗകര്യങ്ങള് വന്നതിനുശേഷം ആളുകള് വിവിധയിടങ്ങളില് ഇരുന്ന് ജോലി ചെയ്യുന്ന ചിത്രങ്ങളും വീഡിയോകളും നമ്മള് കണ്ടിട്ടുണ്ട്. എന്നാല് ഇപ്പോള് സോഷ്യല് മീഡിയയില് വൈറലാകുന്ന ഒരു വീഡിയോ എല്ലാവരെയും ഒരേസമയം ചിരിപ്പിക്കുകയും അതിശയിപ്പിക്കുകയും ചെയ്യുകയാണ്. കടുത്ത ചൂടുള്ള സഹാറ മരുഭൂമിയിലൂടെ ഒട്ടകപ്പുറത്ത് സഞ്ചരിക്കുന്നതിനിടയിലും ലാപ്ടോപ്പ് തുറന്ന് ജോലി ചെയ്യുന്ന ഒരു യുവാവിന്റെ ദൃശ്യങ്ങളാണ് നെറ്റിസണ്സ് ഏറ്റെടുത്തിരിക്കുന്നത്.
ഡിജിറ്റല് ക്രിയേറ്ററായ ഒമര് അല് ഹെലോ ആണ് ഈ രസകരമായ വീഡിയോ തന്റെ ഇന്സ്റ്റാഗ്രാം അക്കൗണ്ടിലൂടെ പങ്കുവെച്ചിരിക്കുന്നത്. 'സഹാറ മരുഭൂമിയില് ഒട്ടകപ്പുറത്തിരുന്ന് ജോലി ചെയ്യുന്നു. നിങ്ങളുടെ 'വര്ക്ക് ഫ്രം ഹോം' ഇതിലും മികച്ചതാണോ?' എന്ന അടിക്കുറിപ്പോടെയാണ് വീഡിയോ പോസ്റ്റ് ചെയ്തിരിക്കുന്നത്. കാറ്റും മണലുമുള്ള കഠിനമായ സാഹചര്യത്തിലും യാതൊരു ഭാവവ്യത്യാസവുമില്ലാതെ അതീവ ശ്രദ്ധയോടെ ലാപ്ടോപ്പില് ടൈപ്പ് ചെയ്യുന്ന യുവാവിനെ വീഡിയോയില് കാണാം.
ഈ വേറിട്ട 'വര്ക്ക് ഫ്രം എനിവെയര്' വീഡിയോ സോഷ്യല് മീഡിയയില് വലിയ രീതിയിലുള്ള പ്രതികരണങ്ങളാണ് നേടുന്നത്. കോര്പ്പറേറ്റ് ലോകത്തെ കടുത്ത ജോലി സമ്മര്ദ്ദത്തെ കളിയാക്കിക്കൊണ്ട് നിരവധി ആളുകള് പോസ്റ്റിന് താഴെ കമന്റുകളുമായി എത്തിയിട്ടുണ്ട്. 'ബോസ് മീറ്റിംഗ് വിളിച്ചാല് മരുഭൂമിയിലാണെങ്കിലും പങ്കെടുത്തേ പറ്റൂ' എന്നും, 'ഇതാണ് യഥാര്ത്ഥ ഡെസേര്ട്ട് സഫാരി' എന്നും തുടങ്ങി നിരവധി രസകരമായ കമന്റുകളാണ് വീഡിയോയ്ക്ക് ലഭിച്ചുകൊണ്ടിരിക്കുന്നത്.
അതേസമയം, കോര്പ്പറേറ്റ് ജോലികളിലെ വിശ്രമമില്ലായ്മയെയും എവിടെപ്പോയാലും ജോലി ചെയ്യേണ്ടി വരുന്ന അവസ്ഥയെയും ചിലര് വിമര്ശനാത്മകമായി കാണുന്നുണ്ട്. യാത്രകളില് പോലും ജോലിയില് നിന്ന് മാറിനില്ക്കാന് കഴിയാത്ത ഇന്നത്തെ തൊഴില് സംസ്കാരത്തിന്റെ പ്രതിഫലനമാണ് ഇതെന്നാണ് ഒരു വിഭാഗം ആളുകള് അഭിപ്രായപ്പെടുന്നത്. എന്തായാലും മരുഭൂമിയിലെ ഈ അപൂര്വ്വ ഓഫീസ് ദൃശ്യം ഇതിനകം ലക്ഷക്കണക്കിന് ആളുകളാണ് കണ്ടുകഴിഞ്ഞത്.
