ഭക്തര് തങ്ങളുടെ ആഗ്രഹങ്ങളും പ്രാര്ത്ഥനകളും ദൈവത്തിന് മുന്നില് സമര്പ്പിക്കുന്നത് പതിവാണ്, എന്നാല് ആന്ധ്രാപ്രദേശിലെ ഒരു ക്ഷേത്രത്തില് വഞ്ചിയില് നിന്ന് ലഭിച്ച നേര്ച്ചപ്പണം കണ്ട് ഭാരവാഹികളും പൂജാരിമാരും ഒരുപോലെ ഞെട്ടിയിരിക്കുകയാണ്. ഒരു ഭക്തന് തന്റെ സ്വന്തം അമ്മായിയെ കൊന്നൊടുക്കാനായി ദൈവത്തിന് 'ക്വട്ടേഷന്' നല്കിക്കൊണ്ട് 20 രൂപയുടെ നോട്ടില് എഴുതിയ കുറിപ്പാണ് ഇപ്പോള് സോഷ്യല് മീഡിയയില് വലിയ രീതിയില് വൈറലാകുന്നത്. ക്ഷേത്രത്തിലെ വഴിപാട് വഞ്ചി തുറന്ന് പണം എണ്ണുന്നതിനിടയിലാണ് ജീവനക്കാരുടെ കണ്ണില് ഈ വിചിത്രവും ഭയപ്പെടുത്തുന്നതുമായ കത്ത് പെട്ടത്.
20 രൂപ നോട്ടില് തെലുങ്ക് ഭാഷയിലാണ് ഈക്കാര്യം എഴുതിയിരിക്കുന്നത്. തന്റെ അമ്മായി കുടുംബത്തില് വലിയ പ്രശ്നങ്ങളുണ്ടാക്കുന്നുണ്ടെന്നും, അവര് കാരണം തങ്ങള്ക്ക് ജീവിക്കാന് കഴിയുന്നില്ലെന്നും കുറിപ്പില് പറയുന്നു. അതിനാല് ദൈവമേ, ആ അമ്മായിയെ എത്രയും പെട്ടെന്ന് ഈ ഭൂമിയില് നിന്ന് തട്ടിയേക്കണമേ എന്നാണ് നോട്ടില് എഴുതിയിരിക്കുന്നത്. ഇതിനായി താന് 20 രൂപ മുന്കൂറായി വഞ്ചിയില് ഇടുന്നുണ്ടെന്നും, കാര്യം സാധിച്ചു തന്നാല് ബാക്കി തുക പിന്നീട് വഴിപാടായി സമര്പ്പിക്കാമെന്നും ഈ വിരുതന് നോട്ടില് കുറിച്ചിട്ടുണ്ട്.
കത്തിന്റെ ചിത്രം സോഷ്യല് മീഡിയയില് പ്രചരിച്ചതോടെ ട്രോളുകളുടെയും ചര്ച്ചകളുടെയും പൂരമാണ് നടക്കുന്നത്. ദൈവത്തിന് പോലും ക്വട്ടേഷന് നല്കുന്ന തരത്തിലേക്ക് മനുഷ്യന്റെ ചിന്തകള് മാറിയോ എന്ന് ചിലര് അത്ഭുതപ്പെടുമ്പോള്, 20 രൂപയ്ക്ക് അമ്മായിയെ തീര്ക്കാന് നോക്കിയ ഭക്തന്റെ കടുംകൈ കണ്ട് ചിരിയടക്കാന് വയ്യെന്നാണ് ഭൂരിഭാഗം പേരും കമന്റ് ചെയ്യുന്നത്. കുടുംബ വഴക്കുകള് ആളുകളെ എത്രത്തോളം അന്ധവിശ്വാസികളാക്കുന്നു എന്നതിന്റെ തെളിവാണ് ഇതെങ്കിലും, ഈ 'ദൈവിക ക്വട്ടേഷന്' ഇപ്പോള് ഇന്റര്നെറ്റിലെ ഏറ്റവും വലിയ തമാശയായി മാറിയിരിക്കുകയാണ്.
